Budyšin (SN/MiR). Serbski zapóslanc Sakskeho krajneho sejma Marko Šiman (CDU) žada sej wospjet zesylnić personal policije a cła w třikrajowym róžku. „Pola policije trjebamy w pomjeznej kónčinje 200 zastojnikow wjac, pola cła połsta“, rjekny Šiman minjeny pjatk na nowinarskej rozmołwje w Budyšinje. Zdobom pokaza wón na trěbne kooperacije mjez zastojnikami w Němskej, Čěskej a Pólskej, wosebje tež na polu rěče. Wón přeje sej sylniše pomjezne kontrole, bjez toho zo bychu so mjezy wotewrěli. „Perspektiwisce lubju sej synergijowe efekty z twarom policajskeje šule w Budyšinje, kotryž móhł so kónc přichodneho lěta zahajić.“ Policajska šula w Budyšinje budźe wotnožka wysokošulskeho policajskeho kubłanišća w Rózborku nad Nysu. Dale wočakuje Šiman sylniši angažement a přewzaće zamołwitosće Europskeje unije při kontrolach a wjetšu kedźbnosć při dalšej legalizaciji transportow z EU druhdźe. Přičina za jeho žadanja je přiběraca pomjezna kriminalita, wosebje na awtodróze A 4. Při tym hraje wikowanje z ludźimi, drogami a předewšěm tež z pokradnjenymi awtami wulku rólu.

Lipsk (dpa/SN). Markus Schlimbach (52) je nowy předsyda DGB Sakskeje. Dotalny městopředsyda naslěduje w funkciji Iris Kloppich. Do jeho dotalneho zastojnstwa su delegaća wobwodneje konferency DGB Sakskeje minjenu sobotu w Lipsku Anne Neuendorf (38) wuzwolili. Wobsahowje poda so nowe načolnistwo ze žadanjom za zapłaćenym kubłanskim dowolom do štyrilětneje wólbneje periody. Krajne knježerstwo měło skónčnje zakoń wo wuswobodźenju za kubłanje schwalić, rjekny Schlimbach. 14 tamnych zwjazkowych krajow tajki zakoń ma, Sakska pak nic, „tak maja dźěłopřijimarki a dźěłopřijimarjo w swobodnym staće jenož­ jara wobmjezowane móžnosće, so politisce dale kubłać“.

Na spočatku konferency přilubi nowy sakski ministerski prezident Michael Kretschmer (CDU) dźěławym wot zawrjenja wohroženeju twornjow Siemensa w Lipsku a Zhorjelcu swoju podpěru. Pozicija Siemensa njeje akceptabelna.

Adwentnička přistajenych Berlinskeho justicneho zarjadnistwa minjeny pjatk bě haru nastupajo chětro přehnata, tak zo dyrbješe policija zakročić. Přewšo wótreje hudźby na Salzburgskej w Schönebergu dla běchu wobydlerjo policiju wołali. Hakle ta postara so wo to, zo njebě hudźba na pózdnim wječoru na dróze wjace słyšeć, a 170 přizjewjenych hosći móžeše woměrje dale swjećić.

Po zdaću mortwe wowcy su w južnym Čornym lěsu zasadźenje policije zawinili. Wuchodźowar wuhlada njedźelu na pastwje w Kandernje tři wowcy stadła, kotrež na chribjeće ležachu. Myslo sej, zo su skoćata mortwe, informowaše wón policiju. Přichwatana patrulja je sej hromadźe z mějićelom wone tři wowcy wobhladała a spóznała, zo su strowe. Dokelž su subožne (trächtig), pak běchu padnyli a njemóžachu wjace stanyć.

Genf (B/SN). Šwicarska diplomatka Carla Del Ponte ćehnje so wróćo z přepytowanskeje komisije UNO w Syriskej. Gremij za wuswětlenje złóstnistwow za čas syriskeje wobydlerskeje wójny njeje poprawom scyła ničo docpěł. Dołhož wěstotna rada UNO žadyn wosebity tribunal za wójnske złóstnistwa w Syriskej njezasadźuje, su rozprawy dospołnje bjez zmysła. Chinska a Ruska wšitko blokujetej. Po Del Ponte je Syriska kraj bjez přichoda. „Woni wšitko niča, štož je jim někak čłowjeske. To je njemóžne! A wěrće mi: Tajke hrozne złóstnistwa, kajkež je Syriskej skućeja, njejsym ani w Ruandźe ani w Juhosłowjanskej widźała.“ wona dale praji.

Venecuela: Apel cyrkwje