Fatalne poselstwo Merkel skónčnje přewinyli
Berlin (dpa/SN/MkWj). Hospodarska rada CDU je wolóžena na připowědź zwjazkoweje kanclerki Angele Merkel reagowała, złožić předsydstwo CDU. „Unija je porno wólbam lěta 2013 něhdźe pjećinu wolerjow přisadźiła“, rjekny generalny sekretar CDU přichileneho zwjazka Wolfgang Steiger powěsćerni dpa. Personalny kaž tež wobsahowy poskitk CDU dyrbjał po změnje nawodnistwa strony signalizować, „zo su fatalne poselstwo po wólbach zwjazkoweho sejma ‚njewěmy, što dyrbjeli hinak činić‘ skónčnje přewinyli. Jenož tak móže nahladnosć CDU mjez wolerjemi zaso přiběrać.“
Zapósłanc AfD Budyskeho wólbneho wokrjesa w zwjazkowym sejmje Karsten Hilse sej žada, zo měła Angela Merkel nětko tež jako zwjazkowa kanclerka wotstupić. CDU je pod jeje nawodnistwom konserwatiwne hódnoty spušćiła a so „na socialistisku stronu“ změniła. Strona njeje hižo konserwatiwno-byrgarska, dokelž je najwjetši dźěl čłonow we wodźacych pozicijach na ryzy ‚haj-prajerjow‘ mutěrował, Hilse twjerdźi. Merkel ma zastojnstwo kanclerki złožić a tak nowowólby zmóžnić, sej wón žada.
Němska reparacije wotpokazuje
Berlin (dpa/SN). Něšto dnjow do nowych němsko-pólskich knježerstwowych konsultacijow je zwjazkowe knježerstwo žadanja, płaćić Pólskej za škody w Druhej swětowej wójnje, wotpokazało. „Stejišćo zwjazkoweho knježerstwa w tym prašenju je znate. Na tym njeje so ničo změniło“, informowaše rěčnik knježerstwa Steffen Seibert wčera w Berlinje.
Pólski prezident Andrzej Duda bě do toho w rozmołwje z nowinu Bild rjekł, zo njejsu reparaciske płaćenja za njeho „žana wotbyta tema“. Zdobom skedźbni wón na přepytowanja, kotrež bě bywši pólski prezident Lech Kaczyński zhotowić dał. Z toho wuchadźa, „zo njebuchu nam nastate straty zarunane“.
Za Němsku je tema reparacijow porno tomu z lěta 1990 podpisanym zrěčenjom „Dwaj-plus-štyri“ wotzamknjena, kotrež bě mjezynarodny zakład znowazjednoćenja Němskeje. W nim rěka, zo „njejsu žane dalše reparacije“ předwidźane. Pólska argumentuje, zo njebu w tym nastupanju prašana. Pjatk chcetej so knježerstwje konsultować.
Nowa doba zahajena
To a tamne (30.10.18)
Při mjetanju gumijowych škórnjow je britiski princ Harry (34) swojej mandźelskej Meghan podležał. Wójwoda ze Sussexa dyrbješe po kurioznym wubědźowanju w Aucklandźe, najwjetšim měsće Nowoseelandskeje, swoju poražku přiznać, po tym zo bě wójwodka Meghan (37) škórń cyły meter dale ćisnyła hač wón. Přihladowarjo pak Harryja chwalachu, zo měješe pječa lěpšu techniku.
Na wjacore dny bjez pitneje wody hotuja so w Mexiku-měsće. Wot jutřišeho chcedźa w 13 z cyłkownje 16 zarjadniskich štwórćow wodowody porjedźeć, kotrež stolicu z dźewjeć milionami wobydlerjow z pitnej wodu z wokolnych horow zastaruja. Ludźo dyrbja znajmjeńša hač do 4. nowembra znjesć, zo njezměja žanu abo jenož jara mało wody. Měšćanske zarjadnistwo je 500 nakładnych awtow skazało, kotrež maja w tym času čerstwu wodu do města wozyć.
Zwón měra swój cil docpěł
Wjeliki Nowgorod (B/SN). Konjacy zapřah měra z Braniborskeje do Ruskeje je po něhdźe 2 300 kilometrach jězby swój cil we Wjelikim Nowgorodźe pola Pětrohroda docpěł. Po historiskim puću su zastupjerjo ewangelskeje wosady Brück zwón měra do Ruskeje dowjezli.
Złóstnistwa wozjewić
Berlin (B/SN). Zamołwity za antisemitizm Němskeho zwjazkoweho knježerstwa Felix Klein planuje nowy system registracije njepřećelskosćow a złóstniskich podawkow přećiwo Židam z mjenom MIRA. Tež podeńdźenja, kotrež njesłušeja hišće k direktnej namocy, maja so po cyłej Němskej zaměrnje zapisować, kaž na přikład, hdyž skućićeljo wospjet před durje židowskich hosćencow skažene swinjace mjaso kładu. Nimo toho chce Klein z nowymi medijemi přećiwo přiběracemu antisemitizmej wojować.
Třo rabinerojo zapokazani
Pro a kontra
Njebjelčicy (SN/JaW). Nimale 1 300 Serbowkow a Serbow je so do wolerskeje lisćiny za wólby Serbskeho sejma zapisało. Wo tym informuje wólbny nawoda Hagen Domaška w nowinskej zdźělence. Čas zapisanja so minjenu sobotu zakónči. Kaž w zdźělence rěka „... bu 1 270 próstwow wo wólbne lisćiki zapodatych. Z nich je něhdźe 70 procentow z Łužicy, 15 proc. z Berlina, Lipska a Drježdźan a 15 proc. ze zbytneho zwjazkoweho kraja. Poslednje podłožki je wólbny wuběrk dźensa rozesłał. Hač do soboty, 3. nowembra, maja wšitcy zapisani wolerjo chwile wolić. Na poslednim dnju wólbow je hišće móžno wólbne listy hač do 10 hodź. wosobinsce wotedać, po tym započnje wólbny wuběrk hłosy wuličeć.
Mjeztym je skupina Kukowske prašaki po prěnim tydźenju naprašowanja wjace hač 500 podpismow nazběrała. „483 Serbow je so přećiwo aktualnje namjetowanej formje Serbskeho sejma wuprajiło. Třicećo, to je 5,8 procentow, su za nju hłosowali“, zdźěli skupina Serbskim Nowinam. Podpismowu akciju přewjeduja Kukowske prašaki hač do kónca lěta. Spočatnje dwanaće wosobam, kotrež běchu akciju zahajili, je so mjeztym tójšto podpěraćelow přidružiło.
Lětadło znjezbožiło
Jakarta (dpa/SN). W Indoneskej je lětadło z wjace hač 180 pasažěrami znjezbožiło. Boeing 737 indoneskeho tunjolětarskeho předewzaća Lion Air zhubi so dźensa krótko po wotlěće z radarowych wobrazowkow. Pomocnicy su w běhu dnja powostanki lětadła w morju wuhladali. Nadźija, přežiwjenych namakać, je jara snadna. Pilot bě bjezposrědnje po starće problemy signalizował a wo to prosył so zawróćić směć.
Prawicar wólby dobył
Rio de Janeiro (dpa/SN). Prawicarski populist Jair Bolsonaro je prezidentske wólby w Brazilskej jasnje dobył. Po dotalnym wuličenju dósta wón nimale 56 procentow hłosow. Dobyće ultraprawicarskeho politikarja móhło radikalnu politisku změnu w Brazilskej zahajić. Bywši oficěr chcył přistup k brónjam wolóžić, wažne ministerstwa ze zastupnikami wójska wobsadźić a politiskich přećiwnikow „wutupić“.
Bamž: Wohnišća hidy hašeć
Merkel wzda so předsydstwa CDU
Berlin/Wiesbaden (dpa/SN). Zwjazkowa kanclerka Angela Merkel (CDU) je po masiwnych wólbnych stratach CDU w Hessenskej zwólniwa, zastojnstwo předsydki strony spušćić. To je wona na dźensnišim posedźenju prezidija strony w Berlinje připowědźiła, kaž powěsćernja dpa z kruhow wobdźělnikow zhoni. Zdobom pak chce Merkel zwjazkowa kanclerka wostać. Dotal bě wona stajnje na tym wobstawała, zo wobě zastojnstwje hromadźe słušatej.
Naslědnistwo na čole CDU móhli hižo na přichodnym zjězdźe strony spočatka decembra w Hamburgu zrjadować. Při wólbach Krajneho sejma Hessenskeje stej CDU a SPD wčera razne straty poćerpjełoj. CDU dósta jenož hišće 27 procentow hłosow, wostanje pak přiwšěm najsylniša politiska móc kraja. SPD spadny na 19,8 proc. a je nětko runje tak sylna kaž Zeleni, kotřiž dóstachu tohorunja 19,8 proc. Tak móža CDU a Zeleni swoju dotalnu koaliciju dale wjesć, maja pak runje hišće wjetšinu jeničkeho hłosa we Wiesbadenskim parlamenće.
Zasadźa nětko elektriski bus
Frankfurt n. M. (dpa/SN). Předewzaće Flixbus zasadźa nětko ryzy elektriski bus na dróhach Němskeje. Wot dźensnišeho ma bus z chinskeje produkcije mjez Frankfurtskim lětanišćom a Mannheimom tam a sem jězdźeć, zdźěli wčera wobchadne předewzaće. Bus modela C9 ze 40 městnami móže po informacijach twarca BYD hač do 320 kilometrow daloko jěć. Na něhdźe 115 km dołhej čarje ma bus tež w Heidelbergu zastać.
Jězdźidło je po informacijach wobchadneho předewzaća dwójce tak drohe kaž normalne dieselowe. Manager němskeje wotnožki Flixbusa Fabian Stenger rěčeše wo signalu, zo je přewrót na polu mobility móžny. „Zdobom je prěni elektriski dalokobus w rjedźe našich wozydłow pohon busytwarcam, inowacije pospěšić a alternatiwy k ryzy dieselowym motoram wuwić. Flixbus chce jězdźidło jónu abo dwójce wodnjo a w nocy z ekomilinu partnera Greenpeace Energy nabiwać. Stacije za to maja w Frankfurće a Mannheimje. Flixbus bě hižo w měrcu ryzy elektriski bus na čarje Paris–Amiens zasadźił. Tež tón pochadźa wot chinskeho busytwarca Yutong.
To a tamne (29.10.18)
Mału granatu namakał je wudźer w Hamburgu. Po informacijach policije bě muž z pomocu magneta w rěce Alster wudźił, zo by metaliske wěcy we wodźe namakał. Při tym wućahny dwaj centimetraj šěroku granatu, kajkuž běchu za čas Druheje swětoweje wójny k wotwobaranju lětadłow wužiwali. Policija je ju wotwjezć dała. Po měnjenju fachowcow bě granata hišće strašna.
Za swój spontany koncert na balkonje w Praze je popspěwar z USA Jason Derulo w socialnych medijach wjele chwalby žnjał. „Balkonowa serenada móže so legendarna stać“, pisa fan na portalu Instagram. Koncert 29lětneho we wjacezaměrowej hali w Praze dyrbjachu štwórtk wječor techniskich přičin dla krótkodobnje wotprajić. Na to stupi so Derulo na balkon, zo by čakacym fanam zaspěwał. Koncert chce pozdźišo nachwatać.
