Zaso raz su ministerscy prezidenća nowych zwjazkowych krajow ze zwjazkowej kanclerku Angelu Merkel (CDU) wo tym rěčeli, kak hodźeli so žiwjenske poměry w starych a nowych krajach přiměrić. Kak dołho chcemy to poprawom hišće činić? Mjeztym je 30 lět po powalenju murje. Tehdy bě nam zwjazkowy kancler Helmut Kohl kćějate krajiny připowědźił. Třiceći lět po tym su rozdźěle mjez wuchodom a zapadom přeco hišće widźomne. A nadźija, zo móže nam Angela Merkel jako wuchodna Němka pomhać, wšak so tež spjelnili njejsu. Wuchodnym ministerskim prezidentam poněčim čas ćěka: Třo z nich dyrbja lětsa wólby krajneho sejma přetrać a trjebaja wuslědki, kotrež móža wolerjam prezentować. Nimo toho Merkel jako­ kanclerku wjace dołho njezmějemy. W lěće 2021 rěka ta snadź Annegret Kramp-Karrenbauer. Dwěluju pak, zo so Posaarčanka za problemy wuchoda wulce zajimuje. Marko Wjeńka

Saarbrücken (dpa/SN). Wobchadni ministrojo zwjazkowych krajow chcedźa smalerjow, nuzowarjow a naduwakow w nadróžnym wobchadźe přichodnje raznišo chłostać. Tež na druhe přeńdźenja z „wosebitym potencialom wohroženja“ chcedźa z wyšimi pokutami reagować. To wuchadźa z naćiska wobzamknjenja, kotrež chcedźa jutře a pjatk na konferency wobchadnych ministrow w Saarbrückenje wobjednawać. K tomu słuša jězdźenje pod wliwom alkohola kaž tež wužiwanje mobilnych telefonow za wodźidłom. Razniše chłostanja maja „wottrašacy efekt“ měć a wěstotu na dróhach Němskeje powjetšić.

Ministrojo chcedźa po naćisku dźěłowu skupinu wutworić, kotraž ma so z tak mjenowanym „auto-posingom“ rozestajeć. Při tym dźe wo wupěranje ze sylnymi jězdźidłami, wo „bjezzmysłowe tam-a-sem-jězdźenje“ a wo „techniske naprawy we wobłuku tuninga“. Što móhli z toho jako delikty zastopnjować, ma so hišće rozjimać. Fakt pak je, zo su tajcy šofe­rojo-naduwacy w někotrych městach mjeztym chutny problem, na přikład w Mann­heimje.

Pjeršćenjej z porsta zemrěteje pokradnył je sobudźěłaćer kěrchowa w porynskim Oberhausenje. Dźowce 88lětneje běštej policiju wołałoj, jako mać na marach žane debjenki na ruce wjace nje­měješe. Dokelž měješe jenož mało ludźi přistup do ćěłownje, móžachu spěšnje 30lětneho sobudźěłaćerja jako skućićela zwěsćić. Pjeršćenjej su zastojnicy mjeztym swójbje wróćili. Paduch bě jej hižo na zastawk dał (ver­pfänden).

Byrnjež 162 milionow eurow w loteriji dobyła, chodźi Šwicarka dale na dźěło, kaž tamniše nowiny rozprawjeja. Z tipowanku 22 eurow bě žona, kotraž chce anonymna wostać, loni w oktobru 162 milionow eurow w loteriji „Euro-Millions“ dobyła. Tež swojej wsy w kantonje Aargau wostanje wona swěrna, byrnjež sej Zwjazk, kanton a gmejna wot dobyćerki tójšto dawkow za dobyće žadali.

Smochćicy (SN/BŠe). „Institucija w Smochćicach so rozžohnuje“, zwurazni nowinski rěčnik Drježdźansko-Mišnjanskeho biskopstwa Michael Baudisch na wčerawšej nowinskej rozmołwje, na kotrejž su noweho nawodu Domu biskopa Bena Sebastiana Kieslicha předstajili a wjace hač dwacećilětne dźěło dotalneho šefa zarjadnišća dr. Petera-Paula Strauby hódnoćili. Kaž nawodnica pastoralneho wotrjada ordinariata Elisabeth Neuhaus wuzběhny, „njehodźi so jeho žiwjenski skutk scyła dospołnje zapřimnyć. Wón dźě je profil wutworił, kotryž daloko přez mjezy biskopstwa skutkuje.“ Za kompetencu dr. Strauby su tuž jara dźakowni. Nimo tójšto twarskich naprawow zašłych 24 lět je wón njeličomne poskitki w kubłanskim wobłuku iniciěrował kaž tež politiske a wuměłstwowe zarjadowanja organizował. Runje tak je z přewjedźenymi, tak mjenowanymi Wuchodoeuropskimi seminarami nowe rumy wotkrył. „Wón je ‚Steve Jobs regiona‘, hdźež je hižo wobstejace wěcy hromadu zwjedł, z kotrychž su zmysłapołne nowe wěcy nastali“, radźićelka biskopskeho ordinariata rozłoži.