Moskwa (dpa/K/SN). Prawosławni wěriwi swjeća po cyłym swěće wotpowědnje julianskemu­ kalendrej dźensa hody. W Moskwje, kotrejž Rusojo jeje wulkeho nabožinskeho wuznama dla „třeći Rom“ rěkaja, je so na nócnych kemšach ně­hdźe milion ludźi wobdźělił, piše dpa. W katedrali Chrysta­ Wumóžnika swjećeše w přitomnosći ministerskeho prezidenta Dmitrija Mjedwjedewa Božu słužbu patriarch Kyril. Prezident Wladimir Putin překwapi ze swojej přitomnosću wjes Turginowo w Twjerskim regionje. W cyrkwi zapali wón swěčku a na hodownej Božej mši wobdźěli so hromadźe z dźěćimi, kotrež budu přichodnje we wsy do nowonatwarjeneje cyrkwinskeje šule chodźić.

Skutkuje lětsa jako prezident Zwjazkoweje rady

Drježdźany/Berlin (dpa/K/SN). Skutkowanje jako prezident Zwjazkoweje rady wunjese sakskemu ministerskemu pre­zidentej Stanisławej Tilichej (CDU) lětsa přewšo bohaty program pućowanjow do wukraja. „K dobremu zwukej słuša, zo w tejle funkciji wopytaš Francosku a Pólsku, ale tež beneluxske staty“, zwurazni wón tele dny napřećo powěsćerni dpa. Kruće předwidźanej stej dale wiziće Singapura kaž tohorunja Južneje Koreje.

Köln (dpa/SN). Po namócnosćach napřećo žonam silwestersku nóc w Kölnje je ličba zapodatych skóržbow na 121 rozrostła. Policija wuslědźi dotal 16 podhladnych, kotřiž móhli z njeskutkami něšto činić měć, zdźěli rěčnik policije medijam. Najwjetši dźěl podhladnych drje dotal z mjenom njeznaja, jich mjezwoča su pak na fotach a widejach spóznajomne. Pola štwórćiny přizjewjenych njeskutkow wopory informuja, zo běchu je tež splažnje wobćežowali. W dwěmaj pa­domaj rěča samo wo wumocowanju. Swědcy­ kaž tež wopory po namócnosćach rozprawjachu, zo jedna so pola skućićelow zwjetša wo ludźi sewjero­afriskeho a arabskeho pochada. Silwester w nocy běchu so w Kölnje mjeńše skupiny muži tworili, kotřiž žony wurubjachu a seksuelnje wobćežowachu. Policija bě z tym wočiwidnje přećežena.

Nahi muž na balkonje bydlenja w Bad Hersfeldźe je starosćiweho wobydlerja pohnuł policiju wołać. Zastojnikam wón rozprawješe, zo je naheho muža wuhladał, kiž bě zymy dla hižo cyle čerwjeny. Na jeho wołanje wšak njebě reagował. Hač bě so mylnje wuzamknył abo hač bě to něchtó druhi činił, swědka tohorunja zajimowaše. Policisća móžachu problem spěšnje rozrisać: Muž na balkonje bě wulka klanka z wukładneho wokna, kotruž běše wobsedźer tam wotstajił.

Nimale cyłu tonu palenca su paduši w badensko-württembergskim Lahru spakosćili. Po tym zo běchu wčera wječor běrow spediciskeje firmy přeborkali, zadobychu so do składu, hdźež bě paleta z 834 kilogramami palenca za transport spřihotowana. Tu paduši wězo rady sobu wzachu. „Runje hakle běchu hody. To drje je něchtó hižo zaso něšto k piću trjebał“, rěka w policajskej rozprawje.