Za wyšu mzdu
Haß warnuje před centralizmom
Drježdźany (dpa/SN). Sakski financny minister Matthias Haß (CDU) boji so wjetšeje wotwisnosće wuchodoněmskich zwjazkowych krajow wot Zwjazka noweho zrěčenja wo financnym wurunanju dla. „Dźěći su přichodnje sylnišo wot nana wotwisne. To widźu z wulkimi starosćemi“, rjekny Haß w Drježdźanach. Z nowymi financnymi poćahami mjez Zwjazkom a krajemi je sej Zwjazk prawo soburěčenja a kontrolu nad financami krajow de facto kupił. Přiběrace wotwisnosće krajow su Haßej wuraz centralistiskeho wuwića. „To je krajam kaž Sakskej, kotrež maja sylny narok na samopostajowanje, wulke mjerzanje.“ Jako přikład mjenowaše Haß zwadu wo digitalny pakt.
Hladajo na konjunkturne wuwiće Haß rjekny, zo ma „złotu dekadu“ z bohatymi dawkowymi dochodami za skónčenu. Prěnje signale su po jeho słowach hižo widźomne, byrnjež hišće žane pokazki na krizu njebyli. „Rozrost wosłabnje. Tole je so hižo při najnowšim trochowanju dawkowych dochodow jasnje pokazało.“
Mosty w hubjenym stawje
Zastatki w železniskej syći nuznje nachwatać
Budyšin (SN/BŠe). Železniske mosty sakskeje wobchadneje syće su w hubjenym twarskim stawje. Cyłkownje 132 mostow – sydom procentow – ma so saněrować. To wuchadźa z naprašowanja zapósłanca zwjazkoweho sejma Torstena Herbsta (FDP), kiž skutkuje w zwjazkowym wuběrku za wobchad a digitalnu infrastrukturu. „Tuchwilu staw zatraša. Tu wjeća so dołholětne zastatki w zdźerženju a modernizaciji železniskeje syće. Bohužel je zwjazkowe knježerstwo minjene tydźenje znowa zapasło, konkretne naprawy k pospěšenju planowanjow we wosebitym zakonju zakótwić. Nimo pjenjez su mjenujcy planowanja a dowolenske jednanja přičina deficitow“, Torsten Herbst zwěsća.
Wo prawach rěčeć
Kretschmer za jasny profil CDU
To a tamne (27.12.18)
Jako prěni čłowjek scyła je Američan Antarktis bjez kóždeje pomocy přeprěčił. Wčera rano je 33lětny Colin O’Brady po swójskich informacijach swój cil Ross- Schelfeis docpěł. Na sněhakach bě wón w běhu 54 dnjow něhdźe 1 500 kilometrow w ekstremnej zymje zmištrował. Swoje wosobinske wěcy ćahaše wón na sankach za sobu. O’Brady bě swoje pućowanje internetnje dokumentował.
Bosy a w nócnym wobleku je dwulětny hólc druhi swjaty dźeń hód w Hornjej Frankskej po dróze běhał. Do toho bě so wón skradźu ze spanskeje stwy staršeju zminył. Wobydlerjej městačka Wildenheid pjerach napadny. Wón zawi jeho do přikrywa a dowjeze jeho na policajsku stražu, hdźež jeho z čajom zastarachu. Jako chcyše mać dźěćo wotewzać, hólc na tym wobsteješe, trikowy film dohladać, kiž běchu jemu zastojnicy zaswěćili.
Klětuše plany FUEN rozjimali
Berlin (SN/at). Federalistiska unija europskich narodnych mjeńšin (FUEN) wobsteji klětu 70 lět. W nowembrje 1949 we Versaillesu załožena organizacija wuhotuje składnostnje swojeho jubileja kongres. Tón steješe sobu w srjedźišću rozmołwy, na kotruž bě społnomócnjeny zwjazkoweho knježerstwa za wusydlencow a narodne mjeńšiny dr. Bernd Fabritius prezidenta FUEN Loránta Vinczeho a wiceprezidenta Bjarnata Cyža spočatk tydźenja do Berlina přeprosył. Fabritius chcyše so wo aktualnym połoženju europskich mjeńšin a wo klětušich planach FUEN wobhonić, kaž FUEN zdźěla.
Rozmołwni partnerojo běchu sej nastupajo prócowanja FUEN přezjedni, zasadźeć so za prawa narodnych mjeńšin a spěchować jich měrliwe zhromadne žiwjenje we wjetšinowych towaršnosćach, zachować narodnu suwerenitu čłonskich statow kaž tež striktnje wotpokazać separatizm a nacionalizm. Dr. Fabritius je podpěru Zwjazka za projekty FUEN připrajił. Wón a Loránt Vincze měnitaj, zo měli we wobłuku „Němsko-Danskeho lěta kulturneho přećelstwa“ 2020 w Flensburgu „Dom mjeńšin“ wotewrěć.
Orbán k protestam: Hysteriske
Budapest (dpa/SN). Do nowych protestow přećiwo prawicarskonarodnemu knježerstwu je madźarski ministerski prezident Viktor Orbán nowu žołmu protestow opozicije jako přehnatu reakciju wotbył. „Tajku hysterisku rjejeńcu smy hižo wospjet měli“, rjekny wón statnemu rozhłosej. Nastork najnowšich protestow je nowy dźěłowy zakoń. Tak móža přistajenych zawjazać, 400 město dotal 250 nadhodźin dźěłać. Dźensa wječor planuje opozicija dalšu wulkodemonstraciju w Budapesće.
VW chce městna šmórać
Wolfsburg (dpa/SN). W zwisku ze zahajenjom produkcije nowych elektroawtow awtotwarca Volkswagen móhli w twornjomaj w Emdenje a Hannoveru cyłkownje 7 000 dźěłowych městnow wotpadnyć. Za to chcedźa wšelake modele nałožować, na přikład starobny dźělny dźěłowy čas. To rozprawja powěsćernja dpa, powołaca so na derje informowane kruhi. Pozadk toho je, zo změja z produkciju elektroawtow mjenje dźěła.
Lětanišćo poněčim zaso dźěła
