Budyšin (SN/BŠe). Najebać dźeń a wjace nadawkow we wobłuku twarstwa, je dźeń a mjenje wučomnikow. Twarske přede­wzaća Budyskeho wokrjesa pytaja nuznje za dorostom. Tuchwilu je 161 wukubłanskich městnow branše njewobsadźene, wuchadźa z ličbow Budyskeje dźěłoweje agentury. „Na tym so wjele změnić njebudźe. Předewzaćeljo wokrjesa maja so na to nastajić, zo budźe přichodnje dale a ćešo, wučomnikow nańć“, zdźěli předsyda wobwoda dźěłarnistwa IG BAU za wuchodnu Saksku Peter Schubert. Zdobom wón firmownikow wótrje kritizuje a žada sej polěpšenje dźěłowych wuměnjenjow, wosebje hladajo na mzdu.

Hakle njedawno su tarifowe jednanja twarskeje branše zwrěšćili. IG BAU je sej šěsć procentow wjace mzdy w běhu dwanaće měsacow a 13. mzdu za dźěłaćerjow žadała. „Tohorunja je wažne, zo dóstanu přistajeni jězbu k twarnišću zapłaćenu. Runje tak měli dźěłodawarjo wukubłanske kóšty přewzać, k čemuž na přikład tež jězby do powołanskeje šule liča. Wučomnikam měło so wjace skićeć“, Peter Schubert podšmórny. Zdobom chce dźěłarnistwo samsnu mzdu we wuchodźe kaž na zapadźe přesadźić.

Berlin (dpa/SN). Šef kanclerskeho zarjada Peter Altmaier (CDU) je so we wikowanskej zwadźe z USA za to wuprajił, Washingtonej poskitk jako zakład jednanjow předpołožić. Tež Europska unija dyrbjała zwólniwa być, poskitk na blido połožić, „wo kotrymž smy zwólniwi jednać“, rjekny wón wčera w sćelaku ARD. „Sym měnjenja, zo njesměli ani USA ani Europjenjo riziko wikowanskeje wójny na so wzać“, wón zwurazni. Tohodla dyrbjałoj so zwjazkowe knježerstwo kaž tež komisija EU najebać rozsud prezidenta USA Donalda Trumpa za to zasadźeć, tajkej wikowanskej wójnje zadźěwać.

USA a EU so w prašenju nowych cłow USA na wukrajny wocl a aluminij wadźitej. EU je wot tutych cłow dotal wuwzata. Přechodna doba pak so jutře skónči. Rozrisanje njeje wotwidźomne. Tež zwjazkowa kanclerka Angela Merkel (CDU) njeje na swojim wopyće pola Trumpa ničo docpěła. EU rozmysluje nětko wo cłach na wudźěłki z USA.

Pytajo za do wody padnjenymi klučemi je wodosportowc w Ruppinskim jězoru staru granatu namakał. Z pomocu magneta bě muž sobotu njedaloko pobrjoha za klučemi pytał a při tym němsku granatu z Druheje swětoweje wójny z wody wućahnył. Fachowcy za znješkódnjenje municije granatu zrumowachu.

Powostanki stareho Romskeho sydlišća su w Bołharskej namakali. Při twarskich dźěłach za nowu awtodróhu na juhozapadźe storčichu dźěłaćerjo na zbytki twarjenjow, kupjele, cyrkwje a kanalizacije. Namakanki pochadźeja z 3. hač do 6. lětstotka. Hakle njedawano běchu derje zdźeržane rownišćo z časa Romjanjow wotkryli. Archeologiska drohoćinka drje twar awtodróhi do Grjekskeje nachwilnje přetorhnje. Iniciatiwa žada sej přepołoženje trasy a wobydlerski referendum wo awtodróze.