Startuja njedźelu ze swjedźenjom
Budyšin (SN). Z wosebitym zarjadowanjom zahaja so 1. Budyske tydźenje demokratije zajutřišim, njedźelu, na Žitnych wikach. Zastupjerjo towaršnostneho žiwjenja přeprošeja wobydlerjow sprjewineho města a dalšich zajimcow na swjedźeń, kotryž traje wot 14 hodź. do 19 hodź. Wo live-hudźbu postaraja so kapały Joker z Budyšina – wona doby wubědźowanje BEAT 2015 –, band Strom & Wasser z Heinzom Ratzom, znata přez projekt „...feat. The Refugees“, kaž tež Kamjeničanska skupina Expect. Jako prěni chce so Budyski wyši měšćanosta Alexander Ahrens (njestronjan) hosćom přiwobroćić, po nim tež pósłancy tydźenjow demokratije. Mjez pósłancami, dwanaće wosobami Budyskeho zjawneho žiwjenja, je tohorunja předsyda Domowiny Dawid Statnik.
Pod hesłom „Přidaj swój žonop“ skića hač do 3. oktobra najwšelakoriše zarjadowanja přiležnosć, w demokratiskim diskursu so pospytać. Hižo wot póndźele steja tež serbske poskitki w Kamjentnym domje na programje.
Tójšto mortwych
Islamabad (dpa/SN). Samomordar je so dźensa před twarjenjom sudnistwa w pakistanskim měsće Mardan rozbuchnył. Při tym je znajmjeńša jědnaće dalšich wosobow zahinyło, 30 ludźi so zrani. Mjez woporami su policisća a prawiznicy. Hakle rano běchu wobrónjeni mužojo křesćanske sydlišćo w měsće Peshawar nadpadnyli a znajmjeńša jednoho ciwilista morili. Po połdra lěta trajacym měrje bě minjene tydźenje w Pakistanje k wjacorym hroznym nadpadam dochadźało.
Galaxy Note 7 njepředawaja
Seoul (dpa/SN). Juhokorejski elektronikowy koncern Samsung je přestał nowy smartphone Galaxy Note 7 předawać a warnuje tych, kiž su sej tajki hižo kupili. Hrozy strach, zo aku rozbuchnje. Hižo předate smartphony předewzaće zaso wróćo woła. Někotre aparaty běchu so při nabiwanju zapalili. Dotal je 35 tajkich padow po cyłym swěće znatych. Zranił so po informacijach koncerna Samsung dotal nichtó njeje.
Nimaja hižo wulku nadźiju
Na kontejnerowej łódźi w Hamburgskim přistawje je woheń wudyrił. ...
Demokratiske strony mobilizuja wolerjow
Němska kłoni so Turkowskej
To a tamne (02.09.16)
Štóž z mopsom přińdźe, ma darmotny zastup. Tak je to znajmjeńša na mjezynarodnym zetkanju tejele psyčeje družiny jutře w Berlinje. Něhdźe 250 je přizjewjenych. Jedyn přijědźe samo z Italskeje. Wjeršk zetkanja je běh na 50 metrow. Dobyćerjam kiwaja trofeje w formje mopsa. Štóž chce sej wubědźowanje wobhladać a žanoho mopsa nima, wšak dyrbi dwaj euraj zastupa płaćić.
Wobkedźbowarjo tuchwilneho NSU- procesa w Mnichowje su całty a přikuski w hódnoće wjacorych tysac eurow kradnyli. Wot spočatka procesa móžachu sej ludźo a zastupjerjo medijow we wěstotnej conje sudnistwa całty, šokolodu abo tykanc kupić. Płaćić mějachu do kasy dowěry. Kaž sudnistwo zdźěli, pak su wjac zjědli hač zapłaćili. Hoberskeje škody dla njeje catering hižo zwólniwy přikuski poskićeć a je předań mjeztym zastajił.
Zakoń přiwótřić
Berlin (dpa/SN). Něhdźe lěto po zawjedźenju zakonja přećiwo nadměrnemu zwyšenju podružow tłóči frakcija SPD zwjazkoweho sejma na to, jón přiwótřić. Kaž z předłohi na dźensnišej klawsurje wuchadźa, sej frakcija mjez druhim žada, zo so přenajerjo zawjazaja wysokosć prjedawšeje podruže předpołožić. To ma so zakonsce zakótwić. Tak móža wotnajerjo posudźować, hač podruž zakonske hranicy překroča.
Ma Turkowsku kritizować
Brüsssel (dpa/SN). Zapósłanc FDP Alexander Graf Lambsdorff Europskeho parlamenta je prezidenta Martina Schulza namołwjał, na swojim wopyće w Turkowskej krajej wótru kritiku wuprajić. „Njeńdźe wo to Turkam wujasnić, zo smy solidarni“, wón dźensa rjekny. „Štož so tam tuchwilu stawa, njeje w porjadku, to ma so jasnje rjec.“ Schulz chcyše dźensa popołdnju jako prěni wyši zastupjer Europskeje unije po pospyće puča do Ankary jěć.
Wučomnicy pod ćišćom
