Berlin (dpa/K/SN). SPD tči nastupajo akceptancu we hłubinje, a jeje šef Sigmar Gabriel chce stronu z njeje wućahnyć. To ma so na te wašnje stać, zo so SPD přichodnje widźomnišo wot unije wotmjezuje. Tohodla ma wona znowa bóle centrumna-lěwa być, su towaršojo kónc tydźenja na njezjawnym na małym stronskim zjězdźe w Berlinje wobzamknyli. Jako „lěwa ludowa strona chce so SPD zaso sylnišo wo swójby, samokubłacych a rentnarjow starać a sej dowěru wróćo zdobyć“, Gabriel potwjerdźi. Na decemberskim stronskim zjězdźe bě wón hišće bóle hospodarsku narěč měł. Koalici­skimaj partneromaj CDU a CSU Sigmar Gabriel­ wumjetowaše, zo ze swojej wadźeńcu dźěło zwjazkoweho knježerstwa chutnje kazytej.

Bagdad (dpa/SN). Irakske wojerske jednotki su po informacijach armeje při swojej ofensiwje na město Falludsha masowy­ row z něhdźe 400 ćěłami našli. Při tym jedna so přewažnje wo irakskich wojakow. Mjez woporami su pak tež ciwilisća. Prawdźepodobnje bě teroristiska milica IS potrjechenych při wojowanjach zajała a moriła. Oficialne wobkrućenje ze stron irakskeho knježerstwa dotal njepředleži. Irakske jednotki běchu sobotu wjes Saklawija sewjerozapadnje Fallud­she wot IS wuswobodźili. Masowy row nańdźechu, jako su dźesać kilometrow před Falludshu miny rumowali. Ekstremisća běchu město lěta 2014 zdobyli. Wot toho časa tam knježa.

Essen/Aichwald (dpa/K/SN). Wjedrowe wobstejnosće su tajke, zo je meteorologam ćežko abo samo njemóžno wěšćić, kak so wjedro wuwije. Po dny trajacych njewjedrach wosebje w južnej a zapadnej Němskej z dźesatkom mortwych a škodach po miliardach eurow su wočakowane nócne ćežke hrimanja z wulkeho dźěla wuwostali, a z mjezywyšinu je so wjedro nachwilnje polěpšiło.

Rěčnik Němskeje wjedroweje słužby dźensa rano rjekny, zo móže regionalnje přiwšěm k sylnym hrimanjam dochadźeć, wosebje na zapadźe a juhu. W Badensko-Württembergskej hroža wone hłownje w južnim hórskim kraju, zwjazane ze sylnymi dešćemi a wulkimi krupami. Móžne su 25 litrow dešća na kwadratny meter.

Swój prěni skok z parašutom wuspěšnje zmištrowała je 90lětna ćěłozwučowarka Johanna Quaas z Halle. Po Guinnessowej knize rekordow je wona najstarša ćěło­zwučowarka swěta, kotraž so aktiwnje na wubědźowanjach wobdźěla. Při wčerawšim skoku bě jej swětowy mišter w ćěło­zwučowanju Eberhard Gienger jako tandem poboku. Wobaj startowaštaj w lětadle AN-2 z lětanišća Böhlen južnje Lipska a přizemištaj bjez problemow. Skok bě dar k 90ćinam Johanny Quaas.

Přewótreje hudźby dla je policija w Frankfurće nad Wódru sobotu rano studentski swjedźeń skónčiła a wótřerěčaki sobu wzała. Party w internaće njebě přizjewjena. Dokelž studenća po prěnim napominanju policije dale swjećachu, přijědźechu zastojnicy z wjacorymi awtami hišće raz. Tónkróć ludźi domoj pósłachu a wótřerěčaki sćazachu.