Pohonja kraje zapadneho Balkana
Strasbourg (dpa/SN). Zapadobalkanske staty, kaž Serbiska a Montenegro, móhli z wotpowědnymi reformami w kraju hač do lěta 2025 Europskej uniji přistupić. Mjenowanej krajej stej tuchwilu „hišće daloko wot toho zdalenej, wuměnjenja za to spjelnić“, rjekny prezident komisije EU wčera w Europskim parlamenće w Strasbourgu. Datum 2025 pak móhł jej pohnuć, so koncentrowanej na puć podać. Zo kraje zapadneho Balkana wuměnjenja za přistup k EU dawno hišće njespjelnjeja, wuchadźa ze strategijoweho dokumenta, kotryž su wčera w Strasbourgu oficialnje předstajili. W nim kritizuja awtorojo mjez druhim wubědźowanjanjekmane hospodarstwo, korupciju a njerozrisane mjezystatne konflikty.
K tak mjenowanym zapadobalkanskim krajam słušeja nimo Montenegra a Serbiskeje Albanska, Bosniska-Hercegowina, Kosowo a Makedonska. Při tym njejstej Bosniska-Hercegowina a Kosowo ani oficialnej, ale jenož potencielnej kandidataj. Montenegro a Serbiska matej najlěpše wuhlady na přistup k EU.
Koaliciske zrěčenje steji
CDU, CSU a SPD so tež wo rozdźělenju ministerstwow dojednali
Berlin (dpa/SN). CDU, CSU a SPD su so po informacijach powěsćernje dpa w koaliciskich jednanjach zasadnje dojednali. Naposledk poradźi so jim dźensa rano tež přełamk w prašenju rozdźělenja ministerstwow. Tak dóstanje SPD wonkowne a financne ministerstwo kaž tež dźěłowy a socialny ressort. Za noweho financneho ministra chcedźa Hamburgskeho prěnjeho měšćanostu Olafa Scholza (SPD) powołać. Nimo toho dóstanu socialdemokraća zamołwitosć za swójbne, justicne a wobswětowe ministerstwo. Předsyda SPD Martin Schulz ma so z nowym wonkownym ministrom stać, dpa rozprawja. Po wólbach zwjazkoweho sejma bě wón hišće kategorisce wuzamknył, zo w kabineće Angele Merkel (CDU) sobu dźěła.
To a tamne (07.02.18)
Rybjacy hat wurubili su njeznaći sewjernje Drježdźan. Nětko pobrachuje tam 300 karpow, šćukow a mjeńšich rybow. Wobsedźer hata je njeskutk póndźelu zwěsćił. Skućićeljo běchu prawdźepodobnje w času wot 1. do 5. februara deski spušćadła wućahnyli a wodu hata w měšćanskim dźělu Weixdorf wotpušćili.
Na wšě 660 eurow za wotamknjenje duri je sej chětro „drohi“ zamkar w badensko-württembergskim Albbrucku žadał, čehoždla ma nětko mjerzanje z policiju. Kaž ta zdźěli, bě 56lětna žona bydlenske durje zawrěła, kluč pak wotnutřka tčacy wostajiła, na čož wołaše zamkarja. Monter, kiž hakle połdra hodźiny pozdźišo přijědźe, wšak trjebaše dlěje hač dwě hodźinje, zo by durje wotamknył. A za to měješe jemu žona 660 eurow nablaku z ec-kartku zapłaćić. Z wašnjom by najwjace 200 eurow było.
Za a přećiwo ćěkancam demonstrowali
Choćebuz (dpa/SN). Hnydom dwě demonstraciji w zwisku z ćěkancami su minjenu sobotu w Choćebuzu dožiwili.
Na Starym torhošću wosrjedź města je so něhdźe 600 demonstrantow zhromadźiło. Woni chcychu po rozestajenjach minjeny čas mjez ćěkancami a domoródnymi jasne znamjo za měrniwu zhromadnosć a přećiwo hidźe na wukrajnikow sadźić. Zo je Choćebuz nětko jako přećiwo wukrajnikam nastajene město wuwołane, maja tam za njesprawne. „To njeje sej město zasłužiło“, bě słyšeć.
W bjezposrědnim susodstwje na Naměsće Němskeje cyrkwje zhromadźi so něšto pozdźišo něhdźe 2 000 wosobow. Wone su porno tomu namócnosće, kotrež minjeny čas ze stron ćěkancow wuchadźachu, wótrje zasudźili. Mjez wobdźělnikami běchu tež čłonojo AfD a prawicarscy ekstremisća. Raznje šwikachu demonstranća politiku zwjazkoweho knježerstwa ćěkancam napřećo. „Islamizacija je kaž rak a najwjetši strach za čłowjestwo“, bě na transparentach čitać.
Schulz: Rozsudny dźeń
Berlin (dpa/SN). Koaliciske jednanja mjez CDU, CSU a SPD k wutworjenju zhromadneho knježerstwa so dale dlija. Jednanja dyrbjachu wčera wječor njedorozumjenjow na polach financow, strowotnistwa, dźěłoweho prawa a wonkowneje politiki znowa přetorhnyć. Přiwšěm wuprudźachu wobdźělnicy optimizm. „Wšitcy chcedźa, zo so jednanja poradźa“, rjekny generalny sekretar SPD Lars Klingbeil. Předsyda SPD Martin Schulz rěčeše dźensa rano wo „rozsudnym dnju“.
Putin jako kandidat zapisany
Moskwa (dpa/SN). Ruski statny šef Wladimir Putin je oficialnje jako prezidentski kandidat k wólbam 18. měrca registrowany. Jako bjezstronski kandidat je wón trěbnych 300 000 podpismow zapodał, centralna wólbna komisija dźensa w Moskwje zdźěli. Tuž smě Putin nětko z wólbnym bojom započeć. Dalšej wobkrućenaj kandidataj staj prawicarski populist Wladimir Žirinowskij a kandidat komunistiskeje strony Pawel Grudinin.
Wo tarifach so dojednali
Wopyt ministra we Waršawje wotprajeny
Jerusalem/Waršawa (dpa/SN). Diplomatiska kriza mjez Israelom a Pólskej noweho zakonja k holocaustej dla so dale přiwótřa, po tym zo je Waršawa wopyt israelskeho kubłanskeho ministra Naftalija Bennetta wotprajiła. Tón reagowaše chětro raznje na postupowanje Waršawy. „Pólska bě mój wopyt wotprajiła, dokelž sym złóstnistwa jeje ludu naspomnił“, praješe Bennett po informacijach swojeho rěčnika.
Spěšnje jednać
AfD a Pegida zhromadnje?
Krajny zjězd Alternatiwy za Němsku we Wojerecach nowe wuhibki stajił
Wojerecy (dpa/SN/MkWj). Alternatiwa za Němsku (AfD) wobhladuje wuchodnu Němsku jako wuchadźišćo, přewzać knježerstwowu zamołwitosć. Po wustupje Frauke Petry leži kluč k tomu w Sakskej, podšmórny rěčnik zwjazkoweho předsydstwa Jörg Meuthen na krajnym zjězdźe sakskeje AfD minjenu sobotu we Wojerecach.
Tež nowowuzwoleny sakski předsyda AfD Jörg Urban bě přeswědčeny, zo móže jeho strona po wólbach krajneho sema klětu ministerskeho prezidenta stajić. Při tym chcedźa tohorunja z antiislamskim hibanjom Pegida hromadźe dźěłać. AfD bě so při wólbach zwjazkoweho sejma loni w septembru ze 27 procentami z najsylnišej politiskej mocu w swobodnym staće stała. W Durinskej chcedźa runje tak z wólbow jako najsylniša politiska móc wuńć, kaž tamniši krajny předsyda Björn Höcke připowědźi.
To a tamne (06.02.18)
Hromady sněha na třěše měješe dalokobus ze Šwedskeje, jako bě w Šwicarskej po puću. Policija je jězdźidło na awtodróze zapadnje Züricha zadźeržała. Sněh bě so na 40 centimetrow nakopił a wažeše něhdźe 1 600 kilogramow. „Hdyž so tele hromady pušća, móže za nim jěducy wobchad chětro wohroženy być“, zdźěli rěčnik policije. Šofer dyrbješe sněh wotmjesć a nimo toho někotre sta eurow pokuty zapłaćić.
Šoferojo awtow w Berlinje dyrbjachu loni přerěznje 44 hodźin na zatykanych dróhach čakać. To wuchadźa z najnowšeho přepytowanja instituta za zběranje wobchadnych datow Inrix. Lěto do toho běchu hišće přerěznje 38 hodźin zličili. „Stolica zatykanych dróhow“ bě loni Mnichow z 51 hodźinami čakanja. Kaž analyza wujewja, wuskutkowachu kopjenja wobchada kóšty dohromady něhdźe 6,9 miliardow eurow.
Bamžej z bombu hrozyli
Santiago de Chile (B/SN). Dny do přijězda bamža Franciskusa do Chile znjeměrni wosebity podawk w stolicy Santiagu: Njeznaći zawostajichu při durjach cyrkwje Santa Isabel de Hungria bombowe hroženje přećiwo bamžej. We wuznawanskim lisće žadachu sej wot chilskeho knježerstwa, zo maja region Wallmapu prawobydlerjam Mapuche wróćić.
Erfurtska teologija wuznamna
Erfurt (B/SN). Vatikanski eksperta za kubłanje Friedrich Bechina měni, zo ma teologija Erfurtskeje Wysokeje šule wuznam za swětowu cyrkej. „Runje za čas Berlinskeje murje přińdźechu wažne impulsy wottam, a bě to jedna z mało móžnosćow za swětowu cyrkej, dóstać katolske dohlady do NDR“, rjekny podsekretar Vatikanskeje kongregacije za kubłanje.
Obama přijědźe do Němskeje
