Z pomocu „nócneje kralowny“ chcedźa so w Londonje přichodnje wo to postarać, zo hišće wjace turistow z kraja a wukraja dźiwadła, kofejownje a kluby britiskeje stolicy w nocy wopyta. Nawabili su za tute zastojnstwo awtorku a rozhłosownicu Amy Lamé, rozprawjeja medije. London sćěhuje přikład druhich metropolow kaž Amsterdama abo Parisa, hdźež maja „nócnych měšćanostow“. Britiska stolica so hižo dlěje prócuje, so ze 24hodźinskim městom stać.

Tójšto naprašowanjow za němskim staćanstwom ma nutřkowne ministerstwo w Berlinje tuchwilu ze stron staćanow USA. Po wuzwolenju Donalda Trumpa za noweho prezidenta USA je tam „cyły rjad“ naprašowanjow dóšoł, wobkrući rěčnik ministerstwa. Při tym jedna so zwjetša wo Američanow z němskimi korjenjemi, kotřiž chcyli nětko němski pas.

Njeswačidło (SN/JaW). Gunnar Krawc je w iniciatiwnej skupinje za serbske ludowe zastupnistwo Serbski sejm přewzał zastojnstwo medijoweho rěčnika. To wobkrući Serbskim Nowinam rěčnik iniciatiwy za Hornju Łužicu dr. Měrćin Wałda. „Dotalny zamołwity Alfons Wićaz bě so z funkcije wuwjazać dał. Mjez druhim, dokelž mamy nowu internetnu stronu a mjeztym tež wustup na facebooku. W tymle nowym techniskim swěće so wón tak njewuznawa a tež doma nječuje“, wuswětli dr. Wałda.

Gunnar Krawc serbsce njerěči. „Wón pak našu maćeršćinu jara derje rozumi a ju zhromadnje ze swojimi dźěćimi w Šwikawje (Zwickau) wuknje“, zdźěli Njeswačanski wědomostnik. Twjerdźenje, zo dr. Wałda sam wo tym rozmysluje, zastojnstwo rěčnika iniciatiwy złožić a wjednistwo do młódšich rukow dać, pak wón njewobkrući. „Njejsym ženje prajił, zo wotstupju abo přestanu. Ze załoženjom towarstwa Smy z.t., kotrež iniciatiwu podpěruje, rozdźělujemy wšelake nadawki na wjacore ramjenja.“