To a tamne (03.06.19)
Jenož spódnje cholowy woblečeny je policist w Londonje štyrjoch paduchow wućěrił, kotřiž běchu so do wobchoda złotnikarja zadobyli. 29lětny bě w nocy na pjatk wotućił, jako paduši wokno wobchoda blisko bydlenja rozbichu. Jako snadnje zdrasćeny policist k městnu njeskutka doběža, ćisnychu skućićeljo na njeho motyku. Z njej w ruce da so wón do nich, tak zo bjez rubizny z mopedami ćeknychu.
Z tři kilometry dołhim blidom z jědźu a napojemi k wječornemu skónčenju posćenja w ramadanje chce Egyptowska nowy rekord za Guinnessowu knihu rekordow nastajić. Něhdźe 7 000 ludźi wšitkich socialnych worštow je sobotu po informacijach organizatorow přišło, zo bychu so na hosćinje wobdźělili. Zastupnik Guinnessoweje knihi chcyše blido dokładnje wuměrić. W póstnym měsacu ramadanje maja so muslimojo wot schadźenja słónca hač do chowanja posćić.
China nowe cła wukazała
Peking (dpa/SN). Wikowanska wójna mjez Chinu a USA so dale přiwótřa. Jako reakciju na najnowše wot USA wukazane cła je China nowe za wudźěłki z USA we wobjimje 60 miliardow dolarow wukazała. Za twory z USA płaća wotnětka hač do 25 procentow cła. Minjene tydźenje běchu USA chinskim produktam hač do 25 procentow cła napołožili. Cła płaća mjez druhim za matracy a woclane piwowe sudy, kotrež China w Americe pječa za dumpingowe płaćizny poskića.
Namołwja USA k dialogej
Mexiko-City (dpa/SN). Prezident Mexika Andrés Manuel López Obrador je prezidenta USA Donalda Trumpa k dialogej namołwjał, po tym zo bě tón chłostanske cła přećiwo Mexiku wukazał, dokelž kraj pječa dosć přećiwo ilegalnej migraciji nječini. „Socialne problemy njehodźa so z cłami a chłostanskimi naprawami rozrisać“, rěka w lisće Lópeza Obradora Trumpej. Kaž mexiski prezident připowědźi, so hišće dźensa delegacija do Washingtona poda, zo by tam rozrisanje docpěła.
Pompeo zetka so z Merkel
Chorhojnicy a jěcharjo ze wsy Grünkraut běchu dźensa mjez ...
Maas: Měr na Ukrainje je móžny
Přiwuzni woporow po puću do Budapesta
Merkel z Trumpom raznje wotličiła
Cambridge (dpa/SN). Z jara emocionalnej narěču na elitnej uniwersiće Harvard w USA je so zwjazkowa kanclerka Angela Merkel (CDU) za mjezynarodne zhromadne dźěło a mjezsobny respekt zasadźiła a so zdobom raznje wot prezidenta USA Donalda Trumpa wotmjezowała, byrnjež jeho ani jónu z mjenom njemjenowała. „Změny na dobro su móžne, hdyž so zhromadnje na nje zwažimy“, Merkel wčera w swojej stajnje zaso wot přikleska a wyskanja přetorhnjenej narěči absolwentam sławneje wysokeje šule zwurazni. Wona napominaše murje we hłowach potorhać, ignorancu přewinyć, demokratiju zakitować a swědomiće z wěrnosću wobchadźeć. „Bóle hač hdy do toho dyrbimy multilateralnje a nic unilateralnje myslić a jednać“, rjekny Merkel pod wyskom 20 000 absolwentow. Jednać měli globalnje město nacionalnje, swětej wotewrjenje město izolacionistisce, zhromadnje města sami. „K tomu słuša, zo njemjenujemy łžě wěrnosće a wěrnosće łžě.“
Zelenskij pojědźe do Brüssela
To a tamne (31.05.19)
Wóslika z juchoweje jamy wuswobodźili su wohnjowi wobornicy w awstralskim Morayfieldźe njedaloko Brisbane na wuchodnym pobrjohu. Pjeć lět stare skoćo bě so přełamało a steješe hač k šiji w njerjedźe. W hodźiny trajacej akciji wobornicy jamu wuklumpachu a wóslika skónčnje wuzběhnychu. Tón je akciju derje přetrał. Jeho myć pak wobornicy wotpokazachu a přewostajichu to wobsedźerjej.
Wosrjedź wučby w bayerskim Weidenje je mać dwanaćelětneho šulerja wučerku nadběhowała. Nimo toho muž, kiž mać přewodźeše, 24lětnu wučerku plistowaše. Hólc njebě swoje nadawki spjelnił a bě za to porok dóstał. Z mobilnym telefonom zawoła wón swoju mać, kotraž hnydom přińdźe. 41lětna wučerku naswari a storkaše do njeje, zo dyrbjachu ju ambulantnje zastarać. Policija přećiwo maćeri a jeje partnerej nětko přepytuje.
Z kłokom na swinje třěleć
Podstupim (dpa/SN). Z prokom a kłokom na dźiwje swinje třěleć chcedźa wot junija w gmejnomaj Stahnsdorf a Kleinmachnow we wokrjesu Podstupim-Srjedźna marka. Wotpowědne dowolnosće nimale wšitke předleža, zdźěli rěčnik wobswětoweho ministerstwa w Podstupimje. Gmejnje bědźitej so hižo lěta z dźiwimi swinjemi, kotrež po wsach ćahaja, zahrodki zapusćeja a wobchadne njezboža zawinuja. Hońtwy z třělbami njejsu dotal prawy wuspěch wunjesli. Prok a kłok hodźitej so nimo toho tež w bydlenskich štwórćach lěpje wužiwać.
Němska njeatraktiwna
Berlin (dpa/SN). Wulce kwalifikowanym dźěławym z wukraja njeje Němska najatraktiwniši kraj. To wujewja přepytowanje Organizacija za hospodarske zhromadne dźěło a wuwiće OECD, kotruž su dźensa w Berlinje předstajili. Awtorojo zwěsćeja, zo zaběra Němska na lisćinje atraktiwnych krajow za fachowcow z masterskim wotzamknjenjom abo doktorskim titulom jenož dwanate městno. Na prěnim městnje steji Awstralska, za njej Šwedska a Šwicarska.
Chorownju nadpadnyli
