Berlin/Ankara (dpa/K/SN). Němska kanclerka Angela Merkel (CDU) je dźensa w zwjazkowym sejmje z knježerstwowym wozjewjenjom hišće raz rozłožiła, kak měła so ličba ćěkancow z pomocu Turkowskeje pomjeńšić. Wječor ma so hromadźe z nawodnymi ludźimi CDU a předsydu bayerskeje CSU Horstom Seehoferom pytać za pućemi, skónčić internu wadźeńcu w uniji. Seehofer bě sej naposledk změnu kursa w politice napřećo migrantam žadał, mějo to zesylnjenja strony AfD při wólbach třoch krajnych sejmow dla za trěbne.

Předsyda wjerška EU Donald Tusk ma do jutřišeho schadźowanja šefow statow a knježerstwow krajow zhromadźenstwa hišće někotre prašenja za wotewrjene. Nětko předležacy „katalog temow“ dyrbi so za dojednanje z Turkowskej hišće dale wotdźěłać. Zhromadne dźěło z Turkowskej dźě migraciske naležnosće přesa­huje. Je tež hospodarskich wužadanjow. Tohorunja­ dźe wo bój přećiwo terorizmej a wo bjezwizowe pućowanje, Tusk měni. Rozsudne je dóńć k dojednanju, kiž wotpowěduje mjezynarodnemu prawu a kotrež akceptuje wšěch 28 statow Europskeje unije kaž tež Turkowska.

Z dźensnišeje debaty Sakskeho krajneho sejma

Drježdźany (SN/MkWj). Je stat Sakska sylny dosć tuchwilne problemy, přede­wšěm hladajo na krizu ćěkancow dla, zmištrować? Wo tym su dźensa w krajnym sejmje w Drježdźanach naležnje debatowali.­ Při tym wujewichu so dospołnje rozdźělne měnjenja.

Nutřkowny minister Markus Ulbig (CDU) pokaza na spočatku aktualneje hodźiny­, wo kotruž bě frakcija CDU prosyła,­ na najnowše wobzamknjenja krajneho knježerstwa. Te bě wobzamknyło, planowany wottwar dźěłowych městnow sakskeje policije skónčić a tysac nowych­ policistow w přichodnych lětach přistajić. Nimo toho maja so mobilne jednotki­ zesylnić, Ulbig připowědźi.

Sakska statna ministerka za integra­ciju Petra Köpping (SPD) předstaji w tym zwisku program, z kotrymž chcedźa in­tegraciju ćěkancow zmóžnić. K tomu słušeja­ programy nawuknjenja němčiny runje tak kaž socialneho zastaranja po­žadarjow azyla w komunach a psycho­logiskeho zastaranja trawmatizowanych migrantow. Tež čestnohamtskich pomocnikow chcedźa dale kubłać.

Kóčka w Žitawje je so wo zasadźenje policije a wohnjoweje wobory postarała, dokelž bě najskerje prochsrěbak zapinyła. Wotnarjerjo bydlenjow we wjaceposchodowym domje běchu so minjenu póndźelu hóršili, słyšo z bydlenja cyły dźeń haru. Přenajer zawoła tuž policiju a wobornikow. Skónčnje so wukopa, zo je cyły dźeń prochsrěbak běžał. Najskerje bě kóčka rano na njón skočiła.

Najrjeńšu a najwukonliwišu kruwu su dźensa w mecklenburgsko-předpomorskim Karowje wuzwolili. Něhdźe sto kruwow bě so wo titul „Miss Karow 2016“ wubědźowało. Při tym je jury twar ćěła, nohi a wumjo we wšelkich starobnych klasach hódnoćiła. Tež kruwy z Braniborskeje so wobdźělichu. Hač do redakciskeho kónca­ dobyćerka hišće jasna njebě. Wólby su wjeršk lětušeje přehladki „Rind aktuell“ plahowanskeho zwjazka howjadow.

Přećiwo šmóranju městnow

Zhorjelc/Budyšin (dpa/ch/SN). Sobudźěłaćerjo zhotowjerja ćahow Bombardier Transportation w Sakskej chcedźa jutře přećiwo planowanemu wotstronjenju dźěłowych městnow protestować. Po wuprajenju prěnjeho społnomócnjeneho IG metal Budyšin Jana Otta su wagonownicy w Zhorjelcu a Budyšinje namołwjeni, so na cyłozwjazkowym akciskim dnju wobdźělić. Bombardier chce 1 430 swojich 10 500 dźěłowych městnow w Němskej šmórnyć. Něhdźe 1 200 z nich je na jeho třoch najwjetšich stejnišćach w Zhorjelcu (700 z 2 500), Budy­šinje (230 z 1 000) a Hennigsdorfje (270 z 2 800). Sakske zawody su tuž wot wot­twara městnow najbóle potrjechene.

Rozmach w tekstilnej industriji