Chcedźa wjace solarnych připrawow
Podstupim (dpa/SN). W naslědnej krajinje hórnistwa (Bergbaufolgelandschaft) Braniborskeje měli po woli Swobodnych wolerjow solarne připrawy nastać. Na 40 z wjac hač 500 kwadratnych kilometrow, kotrež budu hišće saněrowane, móhli tajke natwarić, zwurazni wobswětowy rěčnik Swobodnych wolerjow Robert Soyka wčera w Podstupimje. „Płoniny njetrjebaja tuž za ratarstwo abo lěsnistwo přihotowane być“, Soyka rjekny. Nimo toho su so płaćizny solarnych modulow jasnje znižili.
Braniborske wobswětowe ministerstwo namjet zakładnje njewotpokazuje. „Znate je, zo su na někotrych přestrjenjach hižo solarne připrawy instalowane“, rozłoži rěčnik ministerstwa Jens-Uwe Schade. Přiwšěm měli wuskutki na wobswět a wid wobsedźerjow ležownosćow wobkedźbować. Zajimy mjez ratarskimi a energijowymi předewzaćemi dyrbja wurunane być. Wuspěšne ratarstwo w pohórnistwowej krajinje je za regionalne dźěłowe wiki tohorunja jara wažne.
Wjesne kónčiny bóle podpěrać
Polěpša poskitki bliskowobchadnych srědkow w Hornjej Łužicy
Drježdźany (SN/BŠe). Wjacore naprawy, kotrež bě wuhlowa komisija njedawno w swojej kónčnej rozprawje namjetowała, zaběraja so mjez druhim z lěpšej mobilitu w regionje. Tež wobchadny zaměrowy zwjazk Hornje Łobjo (VVO), kotremuž zapadna Łužica z městomaj Kamjencom a Wojerecami přisłuša, widźi w někotrych idejach šansu, swoje bliskowobchadne zaměry spěšnišo zwoprawdźić. „Loni w meji smy našu ideju wo spěšnoželeznicy Łobjo-Łužica předstajili, zo móhli za dalše postupowanje zwjazkowe financne srědki dóstać“, rozłožuje jednaćel VVO Burkhard Ehlen. „Z elektrifikaciju železniskeje čary mjez Drježdźanami a Zhorjelcom kaž tež Drježdźanami a Kamjencom budźe zakład wutworjeny, zo móhli tam spěšnoželeznicu zasadźić“, jednaćel wuswětla. To pak su daloko do přichoda sahace plany. Hladajo na planowanu wjetšu spěšnosć ćaha přez Rólany (Ruhland) abo Kamjenc do Wojerec so jězbny čas jasnje skrótši.
Pokazuja wobličo
Wolerske zjednoćenstwo wólbnu proceduru dodźeržało
Kandidaća Serbskeho wolerskeho zjednoćenstwa za wólby Budyskeho wokrjesneho sejmika 26. meje 2019 su:
1 Wjesela, Jan
2 Kaulfürst, Fabian
3 Krygaŕ, Mato
Kaulfürst, Lucian
4 Šlechta, Pavel
Budar, Henry
5 Łušćanski, Jurij
Breindl, Jan
6 Nuk, Jan
Wawrikowa, Katleń
7 Korjeńk, Pětr
8 Bjeńš, Tomaš
9 Šmit, Měrko
10 Hrjehor, Rolf
11 Bulank, André
12 Budar, Jan
Blumenstein, Andreas
Jurkowa, Katharina
Kowar, Marko
Hrjehorjowa, Sonja
Korjeńk, Měrko
Škoda, Clemens
13 Kašpor, Jan
14 Sroka, Werner
Budyski wokrjes je do 14 wólbnych wokrjesow rozrjadowany. W kóždym su kandidaća zwólniwi k wólbam nastupić.
To a tamne (20.02.19)
Nimo je zhromadne hońtwjerske wjeselo. Dokelž je pos z třělbu na hajnika třělił, ma to nětko sćěhi za 74lětneho. Wón dyrbi swoje hońtwjerske wopismo wotedać, dokelž njeje třělbu zawěsćenu měł. Jako so z wuchodźowarku rozmołwješe, je so jeho pos w awće z hońtwjerskej třělbu hrajkał, na hajnika třělił a jeho tak na ruce zranił.
Po turbulentnej jězbje z pokradnjenym awtom sam telefonisce pola policije přizjewił je so chětro natutkany 24lětny w badensko-württembergskim Ludwigsburgu. Po wšěm zdaću je sej potom tola hinak přemyslił a so radšo zminył. Policija muža na to pytaše a namaka jeho skónčnje doma w bydlenju. Bjez jězbneje dowolnosće bě młody muž z awtom runjewon přez kružny wobchad jěł, do parkowaceho awta zrazył a na to do štoma, doniž jeho sćěna domu njezadźerža.
Nowy pad znjewužiwanja
Paris (dpa/SN). Přećiwo pósłancej bamža w Parisu eksistuje podhlad seksualneho znjewužiwanja. Bywši sobudźěłaćer města je to policiji wozjewił, kaž francoske medije informuja. Njeskutk bě so spočatk lěta 2018 na swjedźenju w radnicy stolicy kraja stał. Powěsć wozjewili su runje nětko do wjerškoweho zetkanja zajutřišim we Vatikanje, hdźež chce něhdźe 190 duchownych swěta z bamžom Franciskusom na temu znjewužiwanje wuradźować.
Skorža přećiwo prezidentej USA
Washington (dpa/SN). Spřećiwjenje napřećo planam prezidenta USA Donalda Trumpa, kiž chce murju na mjezy k Mexiku twarić, so dale a přiwótřa. Wčera je koalicija 16 zwjazkowych krajow, mjez nimi Kaliforniska a New Mexico, přećiwo wozjewjenju Trumpa nuzoweho stawa dla, skóržbu zapodało. Minjeny pjatk je prezident nuzowy staw na južnej mjezy USA wuwołał, zo by swoje plany k twarej namjezneje murje pohonjał. Z wozjewjenjom móže wón pjenjezy za murju ze wšelakich wobłukow brać, čemuž so zwjazkowe kraje wobaraja.
Zetkanje wotprajene
Zajimawe tradicije haja tež w Bayerskej. Minjeny kónc tydźenja ...
Mjeńšiny dale ćerpja
Strasbourg (SN). Poradźowacy wuběrk Europskeje rady je so spočatk februara z narodnymi mjeńšinami Azerbajdźana zaběrał a rozprawu podał. W njej rěka, zo ćerpja mjeńšiny tam pod dale a wjetšimi wobmjezowanjemi demokratije, pod pobrachowacym zakonjedawstwom a pod přiběracej hidu a šćuwanjom. Powšitkownje drje knježi toleranca w towaršnosći, a mjeńšiny dóstawaja na přikład podpěru zarjadow, zo móhli swoju narodnu identitu zwuraznjeć. Nimo toho je stat naprawy sensibilizacije młodych ludźi za multikulturnosć a tolerancu zahajił. Přiwšěm pobrachuja zakonje a mechanizmy, kotrež su nuznje trěbne, mjeńšiny zachować.
Petry najprjedy raz mjelči
Drježdźany (dpa/SN). Podhlada wopačneje přisahi dla wobskoržena bywša předsydka strony AfD Frauke Petry chce w procesu najprjedy raz mjelčeć. To zdźěli wčera jeje prawiznik Carsten Brunzel na zahajenju jednanja před Drježdźanskim krajnym sudnistwom. Petry wumjetuja, zo je w nowembru 2015 před wólbnym přepytowanskim wuběrkom wopačne informacije dawała.
Mandźelski 43lětneje, europski zapósłanc Marcus Pretzell, bu na zahajenju procesa jako jeje zastupnik akceptowany a smě za čas jednanja pódla njeje sedźeć.
Hnydom na spočatku jednanja prošeše prawiznik Petry wo prawnisku rozmołwu. Tale forma wuswětlenja hodźała so jeno zjawnje přewjesć, sudnistwo wujasni. Toho pak so Brunzel wzda.
Jako prěni swědk bu zastojnik sakskeho kriminalneho zarjada słyšany, kiž bě pad přepytował. Tež předsydu wólbneho přepytowanskeho wuběrka Marka Šimana (CDU) a sakskeho kultusoweho ministra Christiana Piwarza (CDU) su na wčerawše jednanje jako swědkow přeprosyli.
Wólbny bój bjez kanclerki?
Berlin (dpa/SN). Do wólbow krajnych sejmow na wuchodźe Němskeje a do europskich wólbow je diskusija wo wólbnobojowych wustupach zwjazkoweje kanclerki Angele Merkel (CDU) wudyriła. Šef CDU w Durinskej Mike Mohring je za to, zo so Merkel do wólbnych bojow zawjaza. „By hłupe było CDU-kanclerku před ludnosću chować“, wón podšmórny.
Přiwšěm je tež dosć skeptiskich hłosow. „Wustup zwjazkoweje kanclerki njebudźe nam w pomhać“, wuzběhny prezident Sakskeho krajneho sejma Matthias Rößler (CDU). Braniborski šef CDU Ingo Senftleben widźi to trochu hinak, a nadźija so podpěry zwjazkoweje politiki.
Mjeztym zaběra so strona z organizaciju europskich wólbow. Hižo 25. měrca chcetej gremijej CDU a CSU zhromadny wólbny program wobzamknyć. Zhromadny start boja za europske wólby 26. meje je kónc apryla. Hakle po meji chcedźa so zamołwići z wólbami krajnych sejmow w Durinskej, Sakskej a Braniborskej zaběrać. Překwapjenka budźe, koho drje bóle do wólbneho boja zawjazaja, předsydku CDU Annegret Kramp-Karrenbauer abo Angelu Merkel.
