Přichodny biskop Drježdźansko-Mišnjanskeje diecezy Heinrich ...
Naležnosć konsekwentnje dale wjesć
Njebjelčicy (AW/SN). Serbja maja swoje naležnosće sami rjadować. Tule w rozmołwach z politikarjemi často zwuraznjenu sadu Iniciatiwna skupina za demokratisce legitimowane ludowe zastupnistwo serbskeho ludu – Serbski sejm chutnje bjerje. Njebudźe tuž přichodnje wjace na pokiwy politikarjow a nawodow wšelakich gremijow dźiwać, ale swój puć dale kročić. Tole je wuslědk wčerawšeho wuradźowanja iniciatiwneje skupiny w Njebjelčicach.
W přihotach na planowanu klawsuru 11. junija w Njebjelčicach nastajichu sej iniciatiwnicy konkretny plan, kak chcyli dale postupować, zo bychu swój zaměr docpěli. Mjez druhim maja předwidźane přewjesć dźěłarničku z młodźinu, w blišim času chcyli dozhotowić nowu internetnu stronu iniciatiwy, podpismowu akciju k podpěrje peticije wo zakonske zawjedźenje Serbskeho sejma powjedu dale, za nazymu přihotuja podijowu diskusiju a skónčnje chcyli přewjesć prawólby parlamenta. Tón ma zlegitimować zjawne wólby demokratisce legitimowaneho ludoweho zastupnistwa Serbow.
Historikarka wuznamjenjena
Myto Viadriny 2016 wčera w Frankfurće nad Wódru spožčili
Frankfurt n. W. (dpa/K/SN). Pólska historikarka a politologowka Hanna Wolff-Powęska bu wčera z Mytom Viadriny 2016 Europskeje uniwersity Frankfurt nad Wódru wuznamjenjena. Spěchowanski kruh uniwersity hódnoći z mytom jeje njesprócniwe zasadźowanje za pólsko-němske wujednanje.
Styki wudźeržować
Myto Viadriny, Europskeje uniwersity w Frankfurće nad Wódru, pólskej stawiznarce je wažny signal. Prof. Dr. Anna Wolff-Powęska njeje so ze swojim dźěłom jenož wobstajnje za lěpše pólsko-němske poćahi zasadźała. Wona je zdobom razna přećiwnica wuwiwaceho so nacionalizma w Pólskej a druhich krajach. Stajnje je na to skedźbnjała, zo hodźa so problemy Europy jeničce we wzajomnej zhromadnosći rozrisać. Runje wo to wšak pólske knježerstwo dźeń a mjenje rodźi.
Nam Serbam měło tele wuwiće pohon być, dale dobre styki k druhim krajam a předewšěm k tamnišim mjeńšinam wudźeržować, hač w mjeńšinowym sekretariaće w Berlinje a nic naposledk w Federalistiskej uniji europskich narodnych mjeńšin. Ta změje přichodny tydźeń runje w pólskim Wrócławju swój kongres. Dobra składnosć to tež za nas, so dale wo wzajomnosć europskich mjeńšin prócować. Marko Wjeńka
Dobre wuhlady
Pytaja za naslědnikom
Wjace wojakow
To a tamne (10.05.16)
Ćěłowe awto zaso namakali su po nimale 24hodźinskim pytanju w Mnichowje. Pěšcy wuhladachu pólski ćěłowy wóz, w kotrymž ležeše zemrěta žona, njedaloko rěki Isar. Šofer je po zdaću woprawdźe zabył, hdźe bě awto wotstajił. 24lětny měješe ćěło z Italskeje do Pólskeje wjezć. Njedźelu bě so za přestawku w Mnichowje rozsudźił. Parkowanišćo pak pozdźišo wjace njenańdźe. Město toho pytaše w dospołnje wopačnej kónčinje wokoło hłowneho dwórnišća. Bjezradny prošeše wón na to policiju wo pomoc. Pokiwow na alkohol žanych njebě.
Do hłubiny padaca kruwa je w Pfalcy třěchu bydlenskeho domu wobškodźiła. Kaž policija zdźěli, bě skoćo njedźelu we Waldfischbachu z tři metry wysokeje skały padnyło, před kotrejž domske steji. Tam wottorhny dešćikowu rołu, při čimž so kaž dźiw jeno snadnje zrani. Kak bě kruwa na skału přišła, njeje jasne.
Mjenje migrantow dóšło
Athen (dpa/SN). Ličba migrantow, kotřiž z Turkowskeje přijěwši grjekske kupy docpěwaja, wostawa dale snadna. Wot pjatka hač do dźensnišeho je po informacijach grjekskeho staba za ćěkancow jeničce 138 migrantow dóšło. Hišće w měrcu bě wšě- dnje 900 ćěkancow přez morjo přijěło. Woteběraca ličba je wočiwidny wuskutk zrěčenja mjez EU a Turkowskej, po kotrymž móže Grjekska ćěkancow do Turkowskeje wróćo pósłać. Dotal su to w ně- hdźe 400 padach tež činili.
Jäger winu wotpokazał
Düsseldorf (dpa/SN). Fiasko silwesterskeje nocy w Kölnje njeje wina sewjerorynsko-westfalskeho nutřkowneho ministerstwa. Tole je nutřkowny minister kraja Ralf Jäger (SPD) dźensa před přepytowanskim wuběrkom Düsseldorfskeho krajneho sejma potwjerdźił. Jäger argumentowaše, zo njebě sam do přihotow policajskeho zasadźenja zapřijaty. Wón wospjetowaše swoju kritiku napřećo Kölnskemu policajskemu nawodnistwu. „Te bě połoženje wopak posudźowało a na eskalaciju přepozdźe reagowało.“
„Nócne wjelki“ w Němskej
