Kwalitne kriterije njeměli jenož poručenje być
Budyšin (SN/at). Za 104 skupiny wužiwaja tuchwilu nošerjo dźěćacych dnjowych přebywanišćow w serbskim sydlenskim rumje lětnu podpěru po 5 000 eurach, kotruž płaći Sakska po specifiskim, lěta 2006 schwalenym postajenju. Ličba skupin pak ničo wo tym njewupraja, kelko dźěći to je a w kotrej měrje wone serbsku rěč wobknježa. Za kwalitatiwnje lěpše posrědkowanje našeje maćeršćiny w tych zarjadnišćach je sakska Rada za serbske naležnosće hromadźe ze zastupjerjemi młodźinskeho zarjada Budyskeho wokrjesa, Rěčneho centruma WITAJ a z wokrjesnej serbskej społnomócnjenej srjedu w Budyšinje puće rozjimała.
Prócuja so wo slědźenske stejnišćo
Drježdźany (dpa/SN). Sakska podpěruje stejnišćo w Großröhrsdorfje, kotrež je so požadało we wobłuku baterijow slědźić. Swobodny stat je zwólniwy hač do 100 milionow eurow do předewzaća inwestować. Nimo toho chce wulce moderny a hižo dospołnje hotowy twarski kompleks w Großröhrsdorfje za to přewostajić. Slědźenske stejnišćo podpěruje Fraunhoferski institut za keramiske technologije a systemy runje tak zastupjerjo z industrije a slědźenja.
Pozadk požadanja su plany zwjazkoweho ministerstwa za kubłanje a slědźenje, kotrež chce slědźenje a industriju bóle zwjazać. Ministerstwo chce za to 500 milionow eurow w běhu dźesać lět přewostajić. Ministerski prezident Michael Kretschmer (CDU) zwurazni, zo su w Sakskej dobre wuměnjenja, předewzaće zwoprawdźić. Nimo Sakskeje prócuje so hišće pjeć dalšich regionow wo spěchowanje. W juliju chce ministerstwo swój rozsud wozjewić.
To a tamne (14.06.19)
Ze skerje njepřijomnymi motiwami na plastikowych měškach chce kupnica w Kanadźe mjez ludźimi wjace wědomja za wobswět budźić. Tak maja na titkach na přikład problemy z črjewami wopisane być. Mějićel kupnicy chce tak diskusiju zahajić a wužiwanju plastikowych wudźěłkow dale a bóle zadźěwać. Někotři ludźo maja tele plastikowe měški za marketingowy žort. Mnohim pak su wone mjeztym woprawdźite drohotne eksemplary za wosebitu zběrku.
Wowca, kotraž so prawdźepodobnje rady chowa, je policiju wčera w Düsseldorfje zaběrała. Pasanća běchu ju na železniskich kolijach wuhladali. Zawołani zastojnicy pak wowcu njenańdźechu a so zaso wotsalichu. Tež wobornicy ju nihdźe njewidźachu. Hakle zwjazkowa policija wowcu „zaja“, po tym zo dyrbješe ju wjackróć z kolijow wuhnać.
Jubilejny kongres FUEN w Bratislavje
Federalistiska unija europskich narodnych mjeńšin (FUEN) wobsteji 70 lět. To je čłonam přičina, na zdokonjane dźěło na škit mjeńšin zhladować a so na dalše 70 lět hotować.
Bratislava (SN/MkWj). W słowakskej stolicy Bratislavje wotměwa so wot dźensnišeho kongres Federalistiskeje unije europskich narodnych mjeńšin (FUEN). Je to zdobom jubilejne zetkanje składnostnje 70. róčnicy załoženja organizacije, kotrejž tež Łužiscy Serbja přisłušeja. Na oficialnym zahajenskim zarjadowanju wočakowachu dźensa wječor prezidenta FUEN Loránta Vincze, wulkopósłanca Němskeje w Słowakskej republice Joachima Bleickera a Williama Romansa, zastupnika wysokeho komisara za narodne mjeńšiny Organizacije za wěstotu a zhromadne dźěło w Europje (OSZE) Lamberta Zanniera. Delegaciju Serbow nawjeduje wiceprezident FUEN Bjarnat Cyž, bywši jednaćel Domowiny.
Chcedźa wojakow přepołožić
Washington (dpa/SN). Prezident USA Donald Trump je zjawnje připowědźił, ameriske wojerske jednotki do Pólskeje přepołožić. Na zetkanju z pólskim statnym prezidentom Andrzejom Dudu wčera we Washingtonje wón rjekny, zo chce něhdźe 2 000 wojakow z Němskeje a dalšich krajow Europy w Pólskej zaměstnić. Wospjet je Trump zwjazkowu republiku kritizował, dokelž po jeho měnjenju přemało pjenjez do zakitowanja inwestuje.
Zežiwidła z kontejnera brać
Bremen/Berlin (dpa/SN). Lestra-kupnica w Bremenje ludźom nětko dowola zežiwidła z kontejnerow brać. Z tafličkami na wotpadkowych sudobjach podawaja samo pokiwy, na čo maja tak mjenowani wuchowarjo zežiwidłow dźiwać. Runje tak na to skedźbnjeja, zo njetrjeba nichtó z chłostanjom ličić. Wšako je dotal zakazane žiwidła z kontejnerow brać. Přiwšěm so jednaćel kupnicy nadźija, zo so wjace potrěbnych wodnjo hač w nocy z kontejnerow posłužuje. Němski zwjazk wikowanja ze zežiwidłami akciju Bremenskeje kupnicy jara wita.
Proces wólbow zahajeny
Zwjazkowe sudnistwo je dźensa najprjedy raz dale dowoliło muske ...
Mało nadźije
Generaciska změna z ćežemi
Drježdźany/Kamjenica (dpa/SN). Mnohe rjemjeslniske zawody w Sakskej nimaja žanoho naslědnika. Hač do lěta 2025 chce so 6 000 šefow na wuměnk podać. To je štwórćina zawodow. Jenož we wuchodnej Sakskej budźe to přichodne pjeć lět 4 000 předewzaćelow, kaž Drježdźanska rjemjeslniska komora zdźěla. Něhdźe 18 procentow z nich pyta naslědnika.
„Tema přepodaće zawoda je wažna tema regionalneho rjemjesła“, praji prezident Kamjeničanskeho komorneho wobwoda Frank Wagner. Wón ma generacisku změnu za šansu do samostatnosće. „Nastupajo přepodaće zawoda su kupcy a wužiwarjo posłužbow, sobudźěłaćerjo a městnosć předewzaća poprawom hižo wěste.“ Pod smužku pak w Sakskej ličba firmow woteběra, a jenož mało nowych zawodow nastawa. Cyłkowne połoženje předewzaćow je přiwšěm jara dobre, a wjele z nich so samo powjetša.
„Wojujemy wo naše wsy“
Potrjecheni we wuhlowych kónčinach wobaraja so ničenju domizny
Berlin (SN). Wot wuhla potrjecheni we Łužicy, Porynskej a w Lipšćanskej wokolinje su so ze zhromadnym žadanjom na krajnu a zwjazkowu politiku wobroćili. Zwjazk „Wšitke wsy wostanu“ sej wot zwjazkoweho knježerstwa žada, wšitke wot wotbagrowanja wohrožene wsy zachować a to zaručić. Zdobom žada sej prawo, sobu postajeć zakoń wo skónčenju zmilinjenja brunicy, a připowědźa protesty při brunicowej jamje Garzweiler.
„Politika skónčenje zmilinjenja brunicy zanjecha, štož nam njelěpšiny wunjese. Z brunicowej komisiju njeje so za nas ničo změniło. Naša domizna je dale wohrožena. Je tola absurdne, w lěće 2019 hišće wsy za brunicu zničić. Žadamy sej garantiju ze stron knježerstwa, zo wšitke wohrožene wsy wostanu“, praji Britta Kox, zastupnica porynskeje skupiny zwjazka „Wšitke wsy wostanu“. Wona zdobom šwika, zo su na krajnej a zwjazkowej runinje zajimy potrjechenych předołho ignorowali. „Tohodla bjerjemy swoje žadanja nětko do swójskeju rukow. Wostanjemy tu a wojujemy, doniž njejsu naše žadanja zwoprawdźene.“
To a tamne (13.06.19)
We wotewrjenskim času skradźu banku nadpadnyłoj staj předwčerawšim rubježnikaj w Düsseldorfje. Tam staj bankowki a debjenki w hódnoće wjacorych tysac eurow ze zawrjeneho kašćika w tresorowej rumnosći pokradnyłoj. Kak běštaj so tam dóstałoj, njeje znate. Swědcy pak rozprawjachu policiji wo mužomaj w starobje něhdźe 30 do 35 lět, kotrajž móhłoj za nadpad zamołwitaj być. Jedyn z njeju měješe sportowu tobołu sobu. Sobudźěłaćerjo nadpad ani pytnyli njejsu.
Wulka gumijowa klanka je wohnjowoborne zasadźenje na Łobju zawiniła. Wuchodźowarjo běchu w Geesthachće pola Hamburga žonu w rěce wuhladali a hnydom wuchowansku pomoc zawołali. Jako wobornicy z čołmom za wosobu pytachu, nańdźechu woni wulku klanku bjez hłowy. Štó bě sej tajki hubjeny žort dowolił, njeje dotal znate.
