Poprjancowej chěžce a paslenskej kófraj
To a tamne (11.12.18)
Samotwarjeneje atrapy błyskača dla dyrbi so muž w Kölnje před sudnistwom zamołwić. Muž bě so lěta dołho z městom wadźił, žadajo sej kontrole wukazaneje spěšnosće 30 km/h před swojim domom. Dokelž město njereagowaše, sej muž atrapu błyskača natwari a staji ju na zahrodu před domom, zo by šoferow nuzował tam pomału jězdźić. Statne rěčnistwo jemu nětko wumjetuje, zo je sej hamtske prawa přiswojił.
Jeno ze zastupnym lisćikom móža ludźo lětsa patoržicu požadane Bože słužby ewangelskeje wosady w Essenje wopytać. Hłowna přičina su wěstotne předpisy, po kotrychž njesmě nichtó w cyrkwi stać, zamołwići zdźěleja. Nastork, zawjesć darmotne lisćiki, běchu loni „njerjane diskusije“, jako dyrbjachu wopytowarjow při durjach přepjelnjeneje cyrkwje wotpokazać.
Prěnje kročele dołheho puća
Lěto po załoženju aliancy za wutwar awtodróhi dźěławosć bilancowali
Połčnicy (UM/SN). Alianca za wutwar zwjazkoweje awtodróhi A4 je lěto po załoženju kedźbliwje pozitiwnu bilancu sćahnyła. Do tajkeje zjednoćili běchu so zapósłancy CDU Sakskeho krajneho sejma Marko Šiman, Frank Hirche, Patricia Wissel, Alojs Mikławšk, Octavian Ursu, Lothar Bienst, Stephan Meyer a Heinz Lehmann kaž tež jich kolega ze strony SPD Thomas Baum. Zaměr je po móžnosći spěšnje awtodróhu z Drježdźan-sewjera dalokož móžno na wuchod ze šěsć jězdnjemi wuhotować.
Puće wujednanja namakać
Drježdźany (B/SN). Na rozmołwje z Drježdźansko-Mišnjanskim biskopom Heinrichom Timmereversom we wobłuku Katolskeje akademije w Drježdźanskim domje katedrale 29. nowembra wobdźělištej so paliatiwna lěkarka dr. med. Barbara Schubert kaž tež dušepastyrka Drježdźanskeho jastwa Angelika Lang. W srjedźišću wječora steješe prašenje, kak radźi so wujednanje krótko do smjerće. „Kóždy dźeń ludźo druhich ranja, ponižeja a jim žiwjenske móžnosće rubja. Woporam je často lědma móžno, skućićelam wodać. A hustodosć so skućićeljo wobaraja, swoju winu dowidźeć. Křesćanska wěra pak namołwja nas wšěch k wujednanju, a to je wužadanje“, rjekny biskop Timmerevers. „Puć wujednanja njeje teoretiski, ale praktiski a indiwiduelny.“
Nowa metoda přepytowanja
Brexit hišće zadźeržeć?
Luxemburg (dpa/SN). Wulka Britaniska móhła za klětu připowědźeny wustup kraja z Europskeje unije hišće jednostronsce a bjez přihłosowanja druhich krajow EU zadźeržeć. To je Europske sudnistwo (EuGH) dźensa w Luxemburgu rozsudźiło. Najwyše šotiske sudnistwo bě EuGH wo posudk w naležnosći prosyło. Jutře chce britiski parlament wo zrěčenju wothłosować, kotrež bě premierministerka Theresa May nastupajo brexit z EU wujednała.
Stawk wobchad lemił
Berlin (dpa/SN). Warnowanski stawk lokomotiwnikow je dźensa železniski wobchad po wšej Němskej masiwnje haćił. Po informacijach rěčnika je železnica dalokowobchad ćahow dospołnje přetorhnyła. Tež w městach běchu wuskutki razne. Byrnjež w pjećich zahajeny stawk w 9 hodź. zakónčeny był, běchu wuskutki hišće cyły dźeń čujomne. Dźěłarnistwo EVG žada sej w tarifowym konflikće za 160 000 přistajenych wjace mzdy.
Čakaja na narěč Macrona
Warnuja před pačenjom CDU
Berlin (dpa/SN). Po wuzwolenju Annegret Kramp-Karrenbauer za nowu předsydku CDU je prezident zwjazkoweho sejma Wolfgang Schäuble wšelake lěhwa swojeje strony namołwjał, demokratiske prawidła akceptować. „Štóž chcył so nětko wjećić, tón podawa so do njeprawdy. Takle demokratija njefunguje“, Schäuble nowinarjam rozłoži. Tež hessenski ministerski prezident Volker Bouffier žada sej disciplinu w CDU. „Někotři su přesłapjeni. To móžu derje rozumić. Njeje pak žaneje přičiny, nětko kózlika wjazać“, wón žurnalistam rjekny.
Annegret Kramp-Karrenbauer bě so w Hamburgu z 52 procentami hłosow přećiwo Friedrichej Merzej přesadźiła, kiž dósta 48 procentow. Po snadnej poražce Merza na zjězdźe strony w CDU strach přiběra, zo móhli so hrjebje mjez křidłomaj strony pohłubšić. Předewšěm w konserwatiwnym lěhwje knježi wulka njespokojnosć. Předewšěm zastupnicy wuchodneje Němskeje běchu so jasnje za Friedricha Merza wuprajili.
Kaž Kramp-Karrenbauer sobotu potwjerdźi, njeje w mnohich prašenjach wulkich wobsahowych rozdźělow mjez njej, Merzom a Jensom Spahnom.
Wuslědk akceptować
Nowy pospyt rehabilitacije
Drježdźany (SN). Sakske ministerstwo za wobswět je minjene měsacy wobzamknjenju krajneho sejma jenož wahajo wotpowědowało. Dźe wo rehabilitaciju dweju sobudźěłaćerjow biosferoweho rezerwata Hornjołužiska hola a haty, kotrejuž běchu dospołnje njewoprawnjenje pušćili. Wahanje ma nětko konsekwency, kaž sćelak MDR rozprawja. Andreas Skomudek, bywši předsyda biosferoweho rezerwata, bě zhromadnje z 200 wobydlerjemi w meji 2016 Sakskemu krajnemu sejmej peticiju zapodał, zo by pušćenje sobudźěłaćerjow zjawnje předźěłać dał. Z peticiju sej žadachu, potrjecheneju dospołnje rehabilitować a wotpowědnje wotškódnić. To pak njeje so po měnjenju Skomudeka dosahajcy stało. Tuž so wón wo to prócuje, peticiju znowa na dnjowy porjad peticiskeho wuběrka zapisać dać.
To a tamne (10.12.18)
Něhdźe 1 100 wobdźělnikow w čerwjenym kabaće a z čapku na hłowje je wčera na mjeztym 10. Mikławšowym běhu w Michendorfje južnje Berlina startowało. To je nimale runje telko kaž loni, organizatorojo zdźěleja. Zajimcy móžachu so rozsudźić, hač chcedźa połtřeća, pjeć abo dźesać kilometrow zmištrować. Nimo toho bě stafla za sportowske swójby zarjadowana. Tež dźěći mějachu swoje wubědźowanje, wšako bě so 120 z nich přizjewiło. Mikławšowy kostim znajmjeńša bě za wšěch běharjow winowatosć.
Wosrjedź sławneho Španiskeho schodu w Romje stejo wostał je 27lětny ze swojim awtom. Kaž nowiny rozprawjeja, bě wón kontrolu nad wodźidłom zhubił a hakle na baroknych schodach stejo wostał. Awto bě chětro skóncowane, schód z 18. lětstotka bu hač na čornu smuhu borzdźidła lědma wobškodźeny.
Za wěsty přichod w rewěrach
Drježdźany (SN). Sakski wyši hórniski zarjad je so z předewzaćom Łužiska energija (LE-B AG) a Srjedźoněmskej hórniskej towaršnosću (MIBRAG) na to dojednał, wutworić rezerwy za znowawužiwanje krajiny po wudobywanju brunicy. Wotpowědne zrěčenje staj jednaćelej hórniskich koncernow nětko podpisałoj. Dojednanje měri so na přichod Wochožanskeje a Rychwałdskeje brunicoweje jamy na wuchodźe Němskeje kaž tež na jamu Schleenhain w srjedźoněmskim rewěrje.
Dowěru sej wróćo zdobywa
Hamburg (dpa/SN). Krótko do wólbow noweho nawodnistwa CDU sej unija dowěru wolerjow wróćo zdobywa. To wujewja aktualny wólbny trend ARD. Po nim by strona při wólbach 30 procentow hłosow nažnjała. To su štyri procentne dypki wjac hač při naprašowanju minjeny měsac. Zeleni bychu přisadźili a na 20 procentow spadnyli. SPD a AfD byštej při 14 procentach wostałoj, FDP a Lěwica byštej kóžda na wosom procentow přišłoj.
Jara strašnu rozbuchlinu našli
