W Němskej hladaja pozitiwnje na Europsku uniju
Brüssel (dpa/SN). Najebać dlijace so reformy a přeco hišće njerjadowany wustup Wulkeje Britaniskeje z EU ma wjetšina wobydlerjow Němskeje přewažnje pozitiwny wobraz wo statowym zjednoćenstwje. Štyrjo wot pjeć woprašanych (81 procentow) ma čłonstwo Němskeje za dobru wěc, kaž z dźensa wozjewjeneho woprašowanja Europskeho parlamenta wuchadźa. Po wšej EU sej 62 procentow ludźi statowe zjednoćenstwo chwali. To je telko kaž minjene 25 lět nic. Wulki dźěl Němcow (76 proc.) je nimo toho měnjenja, zo je Němska z čłonstwa w Europskej uniji dotal tójšto wuzbytkowała.
Jenički kraj, w kotrymž su ludźo dospołnje hinašeho měnjenja, je Italska. Tam jenož 42 procentow ludźi sobustawstwo kraja w EU wita.
Hladajo na wólby Europskeho parlamenta klětu w nalěću žada sej kóždy druhi wobydler Němskeje (56 proc.), zo dyrbjała migracija jedna z hłownych temow wólbneho boja być. Tež w druhich krajach su ludźo tutoho měnjenja, w Italskej samo 71 procentow.
To a tamne (17.10.18)
Kamel při zwjazkowej dróze w Čornym lěsu je mnohich šoferow znjeměrnił. Zwěrjo steješe na parkowanišću bjezpo- srědnje při dróze w Freiburgu. „Wobsteješe strach, zo kamel na dróhu poběži“, policija zdźěli. Zwěrjo słušeše do pućowaceho cirkusa, kotryž bě w bliskosći swój stan natwarił. Wobsedźer bě zwěrjo na parkowanišću wotstajił, bjez toho zo by je přiwjazał. Wón bě sej wěsty, zo kamel na dróhu njepoběhnje. Policija jemu přikaza, zwěrjo na druhe městno dowjezć.
Z kolesom z Alaski do Južneje Ameriki dojěł je awstriski ekstremny sportowc Michael Strasser. Při tym je po swójskich informacijach nowy swětowy rekord nastajił. Wón trjebaše za 22 642 kilometrow dołhu čaru 84 dnjow, 11 hodźin a 50 mjeńšin, 15 dnjow mjenje hač při dotalnym rekordźe. Strasser bě minjene lěta hižo podobne wužadanja zmištrował.
Na etat so dojednali
Rom. Italske knježerstwo je so na naćisk za klětuši hospodarski plan dojednało, a kabinet jemu wčera přihłosowaše. Nětko ma komisija EU naćisk pruwować. Je so poradźiło konta sporjadkować a přilubjenja dodźeržeć, zdźěli knježerstwowy šef Guiseppe Conte. Mjezynarodnje wšak žněje italske knježerstwo kritiku, dokelž chce nowozadołženje powjetšić, zo móhło swoje wólbne přilubjenja dodźeržeć.
Racija w běrowach awtotwarca
Rüsselsheim/Berlin. Z Opelom je dalši němski awtotwarc konkretnje podhladny, zo je wotpłuny swojich dieselowych jězdźidłow z dwělomnej software manipulował. Wčera su zastojnicy běrowy awtotwarca w Rüsselsheimje a Kaiserslauternje přepytali, móžneho jebanstwa dla. Kaž zwjazkowe wobchadne ministerstwo zdźěla, dyrbi Opel wjac hač 100 000 dieselowych awtow typow Insignia, Cascada a Zafira wróćowołać, dokelž je w nich njedowolena připrawa k wotpinjenju rjedźenja wotpłunow zatwarjena.
Konsulat přepytali
Wjesne kónčiny sylnić
Zwjazkowy prezident Steinmeier na wopyće w Hornjej Łužicy był
Zhorjelc (AK/SN). Industrijne srjedźišća we wjesnych kónčinach kaž w Hornjej Łužicy dyrbimy dołhodobnje zachować a sylnić. Jenož tak móžemy masiwnemu wotchadej ludźi zadźěwać abo trend samo wobroćić. To je zwjazkowy prezident Frank-Walter Steinmeier na swojim wčerawšim wopyće w Zhorjelcu potwjerdźił. Tam wopyta na prěnjej staciji twornju koncerna Siemens. Mandźelska Elke Büdenbender Steinmeiera přewodźeše. Delegaciji přisłušachu sakski ministerski prezident Michael Kretschmer (CDU), Zhorjelski krajny rada Bernd Lange (CDU) a wyši měšćanosta Zhorjelca Siegfried Deinege (bjezstronjan).
Prezidenća za podpěru EU
Štrbské Pleso (ČŽ/K). We Wysokich Tatrach wotmě so dwudnjowske zeńdźenje reprezentantow statow Visegrádskeje štyrki (V4) Čěskeje, Słowakskeje, Pólskeje a Madźarskeje. Jich prezidenća wuprajichu so za podpěru Europskeje unije, kiž bywa wuběrny projekt, tež swójske pozicije přesadźić. Čěski prezident Miloš Zeman pokaza na to, zo su kraje V4 w naležnosći ćěkancow nanuzowane krute kwoty migrantow wotwobroćić móhli. Słowakski prezident Andrej Kiska přispomni, zo ma kóždy kraj swoje stawizny, swoje problemy a tuž často hinaši wid na EU. Poziciju V4 nastupajo migraciju zakitowaštaj tež pólski prezident Andrzej Duda a jeho madźarski kolega János Áder.
Rewiziju zapodali
Zwjazk bayerskeje CSU žada sej Seehofera pušćić
Mnichow (dpa/SN). Po přewšo špatnym wuslědku CSU wólbow Bayerskeho krajneho sejma sej prěni wokrjesny zwjazk strony zjawnje žada předsydu Horsta Seehofera wotwolić. Předsydstwo wokrjesneho zwjazka w Kronachu bě sej na wčerawšim posedźenju drje přezjedne, zo je tuchwilu najwažniši nadawk wutworić nowe knježerstwo, kaž wokrjesny předsyda, zapósłanc krajneho sejma Jürgen Baumgärtner, rjekny. „Ale po wutworjenju knježerstwa chcemy stronski zjězd ze zaměrom personelneho wobnowjenja a ze zaměrom, Horsta Seehofera pušćić.“ To je wokrjesne předsydstwo wčera jednohłósnje wobzamknyło.
Tež hornjobayerski wobwodny zwjazk CSU sej žada, njedźelnu wólbnu poražku dokładnje předźěłać. Po słowach najwjetšeho wobwodneho zwjazka w Bayerskej dyrbjeli stronski zjězd přewjesć, kaž předsydka wobwodneho zwjazka CSU Ilse Aigner powěsćerni dpa rjekny. Zjězd měł so hišće lětsa, po wutworjenju knježerstwa wotměć, sej wona žadaše. Tam měło so tež wo personalnych konsekwencach rěčeć.
To a tamne (16.10.18)
We wokolinje konopjowych wikow je policija w Awstriskej 114 šoferow lepiła, kotřiž stejachu pod wliwom drogow a njeběchu hižo jězdźenjakmani. „To je zrudźacy rekord a přiwšěm jeno snadny dźěl woprawdźitosće“, měnješe rěčnik policije. Policija kontrolowaše šoferow, kiž běchu po puću na wjacore dny trajace cannabisowe wiki njedaloko Wiena abo su wottam přijěli. Wiki wěnowachu so po informacijach zarjadowarja „hojenskej rostlinje konopi“.
Najstarši muž Němskeje swjećeše wčera 113. narodniny. Gustav Gerneth je strowy a duchownje čiły, rjekny měšćanosta saksko-anhaltskeho Havelberga Bernd Poloski. Jubilar bydli přeco hišće w swójskim bydlenju. Wnučki a prawnučki jeho zastaruja. Po zbožopřeću je Gustav Gerneth wjesnjanostu na swoje klětuše 114. narodniny přeprosył.
Přećiwo zakazej rubiška
Erfurt (B/SN). Ministerski prezident Durinskeje Bodo Ramelow (Lěwica) widźi zakaz nahłowneho rubiška muslimkow jako wěc, kotraž dale njewjedźe. Wón sam měni, „zo měli ludźo swoje mjezwočo pokazać“, ale powšitkowny zakaz rubiška by potom tež płaćił za katolske rjadnicy, praji politikar. Před zakonjom njehodźi so mjez swobodu a nanuzowanjom rubiška rozeznawać.
85lětny so z křesćanom stał
Brisbane (B/SN). Za wěru njejsy ženje přestary: Lětdźesatki bě Bill Hayden jedyn z najprominentnišich ateistow Awstralskeje – nětko je so wón z 85 lětami z křesćanom stał. Něhdyši wonkowny minister da so 9. septembra w katolskej cyrkwi swj. Marije w Ipswichu pola Brisbanea wukřćić. Dlěši čas hižo so wón sam sebje prašeše za swojej rólu w žiwjenju, rjekny něhdyši předsyda socialdemokratiskeje strony Labor Party cyrkwinskej nowinje Catholic Leader. Politikar, kotrehož bě před štyrjomi lětami Boža ručka zajała a kotruž bě wón přežiwił, so nadźija, zo jeho přistup ke křesćanskej wěrje tež druhich k tomu zmuži.
Cyrkwinski dźeń bjez AfD
Wo wjac wšědneje dowěry wabiła
Zhorjelc (AK/SN). Kóždy čłowjek je jónkrótny. „Kóždy čłowjek je z ruku spisany list Boha, w charakterje spóznajomny. Je Bohu dowěrjeny a wšu kedźbnosć hódny.“ To podšmórny fararka Theresa Rinecker wčera w Zhorjelskej Pětrowej cyrkwi. Na swjedźenskich kemšach je biskop Ewangelskeje cyrkwje Berlin-Braniborska-šleska Hornja Łužica dr. Markus Dröge 54lětnu jako nowu generalnu superintendentku w Zhorjelskej wosadźe zapokazał. Zdobom rozžohnowa wón Martina Herchu, kiž běše zastojnstwo wot lěta 2010 zastawał. Mnozy hosćo z wosadow, z Nysoweho města a z krajneje politiki běchu přišli, mjez nimi sakski ministerski prezident Michael Kretschmer (CDU) a braniborska ministerka za wědomosć, slědźenje a kulturu dr. Martina Münch (SPD).
