Wobchad tema w sejmje
Bernd Lange w Brüsselu rozprawjał
Brüssel/Zhorjelc (SN/BŠe). We wobłuku słyšenja Europskeho parlamenta žadaše sej krajny rada Zhorjelskeho wokrjesa Bernd Lange (CDU) zawčerawšim, zo měli wjace spěchowanskich srědkow za mjezypřesahowace projekty k dispoziciji stajić. Krajny rada so w funkciji sobustawa europskeho wuběrka za regiony na zarjadowanju w Brüsselu wobdźěli. „Tam, hdźež su rozdźělne prawniske zakłady, rozdźělne struktury, ale předewšěm rozdźěle w kulturje, měła Europska unija z prawniskej ekspertizu a financielnym spěchowanjom k tomu přinošować, zadźěwki wottwarjeć.“ Lětsa w meji je Europska komisija namjetowała, tak mjenowanu iniciatiwu Interreg z jasnje mjenje srědkami dale wjesć. Tak njesteji za mjezypřesahowace dźěło hižo 7,6 miliardow eurow spěchowanskich srědkow na periodu k dispoziciji, ale jenož hišće 4,4 miliardy eurow, štož wězo dźěło potrjechenych regionow masiwnje pohubjeńša.
To a tamne (28.09.18)
Swoju móšnju z falšnymi pjenjezami a wupokazom zhubił je 22lětny Awstričan. Kaž policija z Eisenstadta zawčerawšim zdźěli, njeje sprawny namakar ničo z móšnje wzał, ale ju połnje pjelnjenu z třomi bankowkami 50 eurow wotedał. Wopačne pjenjezy běchu lochce jako tajke spóznajomne. Kaž 22lětny zastojnikam rjekny je bankowki w darkneće skazał, zo móhł sej drogi kupić.
Chětro zadźiwane reagowachu ludźo nětko w Hannoveru, jako wuhladachu tołsteho muža, kiž na pjeć městnach w awće sedźeše. Kaž so wukopa, jednaše so wo dźiwadźelnika w kostimje, kiž awto wodźeše. Muž steješe w srjedźišću wabjenskeho filma předewzaća, kotrež je w Hannoveru busam, taksijam a tramwajkam konkurenca. Powěsć njewšědneje wabjenskeje akcije rěka: „Ja trjebam pjeć městnow. Ty nic. Jědźće tola hromadźe.“
Erdoğan wabi za nowy start
Berlin (dpa/SN). Hladajo na swój prěni statny wopyt w Němskej chce turkowski prezident Recep Tayyip Erdoğan wo nowy start poćahow wobeju krajow wabić. Dźensa popołdnju zamołwići jeho w Berlinje wočakuja, hdźež su rozmołwy z turkowskimi organizacijemi předwidźane. Oficialny program zahaji so jutře. Zwjazkowy prezident Frank-Walter Steinmeier wita Erdoğana z wojerskim česćowanjom. W času wopyta wočakuja organizatorojo mnohe demonstracije.
Stawk wjetši hač wočakowany
Berlin/Dublin (dpa/SN). Za jutře planowany stawk pola Ryanair budźe wjetši hač wočakowany. Dźěłarnistwo zjednoćenstwa Cockpit je w Němskej přistajenych pilotow předewzaća Ryanair wčera wječor k stawkej namołwjało. Do toho běchu hižo přewodźerjo lětadła w Španiskej, Portugalskej, Italskej, Nižozemskej a Belgiskej stawk připowědźili. Wobě powołanskej skupinje žadatej sej wyšu mzdu a nowu strukturu dźěłowych poměrow. Dźensa chce tež dźěłarnistwo ver.di wozjewić, zo so němscy přewodźerjo lětadłow stawkej přizamknu.
Podhladnych zajeli
Wjele projektow za ponowjenje šulow planowane
Zhorjelc (AK/SN). Zhorjelski wokrjes a tamniše gmejny chcedźa dale zaměrnje šule ponowić. Zo móhli tole zwoprawdźić, liča přichodnje z 11,2 milionow eurow podpěry ze zwjazkoweho inwesticiskeho programa za polěpšenje šulskeje infrastruktury. Wokrjesny sejmik přihłosowaše njedawno na swojim posedźenju, zo tři projekty wokrjesa do plana naprawow městow a gmejnow přiwza. Cyłkownje je tam 38 naprawow zapisanych.
„Kóždy wopor je jedyn přewjele“
Zhorjelc/Fulda (dpa/SN). W Zhorjelskim biskopstwje je jedyn pad seksualneho znjewužiwanja njepołnolětneho přez duchowneho znaty. Tole zdźěli wčera generalny wikar biskopstwa Alfred Hoffmann. Po přepytowanju personalnych aktow něhdźe 250 měšnikow wot lěta 1945 su jednoho potrjecheneho zwěsćili. Wobskorženy měšnik je hižo zemrěł. Wopor je za připóznaće přećerpjeneho horja 4 000 eurow dóstał. Pokazki w personalnych aktach na dalše pady w Zhorjelskim biskopstwje žane njejsu. Přiwšěm liča zamołwići z wjace woporami, kotrež nochcedźa so snano hańbiwosće dla přizjewić abo su hižo zemrěli. „Kóžda jednotliwa wosoba, kotraž bu seksualnje znjewužiwana, je jedyn wopor přewjele“, Alfred Hoffmann wuzběhny a prosy potrjechenych wo wodaće.
Předsyda katolskeje Němskeje biskopskeje konferency Reinhard Marx chcyše so dźensa na zakónčenju nazymskeje klawsury we Fuldźe k studiji wo znjewužiwanych njepołnolětnych wuprajić.
„W dźunglu so zašmjataja“
Na konferency kajkosće Łužicy nastupajo strukturnu změnu wobjednawali
Choćebuz (dpa/SN). Wotewrjeny być za eksperimenty, wjetše předewzaća přićahować a so wot wubědźowarjow wotbłyšćować, su jenož někotre namjety za strukturne wuwiće we Łužicy. Na konferency dźěłarnistwa hórnistwo, chemija a energija (IG BCE) zawčerawšim w Choćebuzu wuradźowachu zajimcy, kak móhli inwestorow do regiona wabić. Předewšěm měła so dobra infrastruktura wuwić.
Předewzaćelski poradźowar Hans Gerd Prodoehl namołwješe zamołwitych wulke wizije wuwić. Tak wupraji so wón za wosebitu hospodarsku kónčinu, hdźež měli wosebite ramikowe wuměnjenja wutworić, kotrež nihdźe druhdźe nimaja. Tole je so na Sakskej stronje hižo raz diskutowało. Zdobom poradźowar kritizowaše, zo je we Łužicy přewjele iniciatiwow, kotrež so ze strukturnej změnu zaběraja. „W dźunglu institucijow so inwestorojo zašmjataja“, wón wuzběhny.
To a tamne (27.09.18)
Swoje mjeno z něčim pozitiwnym zwjazować, a nic z grawoćiwym hurikanom, kotryž bě srjedź septembra na juhowuchodźe USA howrił, chcyše štyrilětna holčka Florence. Tuž chodźeše wot domu k domej a zběraše za wopory hurikana dary. Powěsć w socialnej syći Facebook z wobrazom holčki je k tomu wjedła, zo su ludźo po cyłym kraju tójšto darow nahromadźili. Tuž móže so Florence nětko nad jeje mjenom zawěsće zaso wjeselić.
Njewšědny zwěrjeći wopyt mějachu zapósłancy Europskeho parlamenta w Brüsselu. Tam bě pony z mjenom Dinky do domu přišoł, kiž přewodźeše slepu awtorku Monique Van den Abbeel. Z wopytom pokazachu na to, zo hodźa so nimo psow tež druhe zwěrjata, kiž zamóža ludźom pomhać. Tuž měli přichodnje wšitke zwěrjata přistup k zjawnym twarjenjam měć, štož měli zakonsce zrjadować.
Prašenje dowěry so njestaji
Berlin (dpa/SN). Po nowowólbach šefa frakcije unije, hdźež je wčera Ralph Brinkhaus (CDU) překwapjacy wjetšinu hłosow dóstał, je wiceprezident CDU Armin Laschet wumjetowanja strony FDP wotpokazał, kotřiž sej žadachu zwjazkowej kanclerce Angeli Merkel (CDU) prašenje dowěry stajić. Ralph Brinkhaus je připowědźił kanclerku podpěrać. Hladajo na zastojnstwo šefa frakcije je jenož kandidował, dokelž chce so wo čerstwy stil a nowe ideje postarać.
Wobzamknjenja njedosahace
Berlin (dpa/SN). Zwjazkowy sejm je dźensa bilancu bydlenskeho wjerška diskutował, hdźež su minjeny tydźeń naprawy přećiwo přemało bydlenjam a přećiwo zwyšenju podruže wobzamknyli. Koalicija unije a SPD je wo aktualnu hodźinu w sejmje prosyła. Dokelž njesahaja SPD wobzamknjenja daloko dosć, chce hišće wjace naprawow přesadźić. Na přikład njeměła so podruž pjeć lět dołho zwyšić.
Trump posedźenje nawjeduje
Za Zhorjelski zawod wuspěch
Berlin/Zhorjelc (SN/BŠe). Planowany wottwar dźěłowych městnow pola koncerna Siemens njebudźe tajki kaž poprawom wočakowany. Na stejnišću w Berlinje chcychu 870 dźěłowych městnow šmórnyć. W přichodnymaj lětomaj pak budu tomu 700, předewzaće zawčerawšim zdźěli. Po cyłej Němskej chcedźa 2 900 dźěłowych městnow wottwarić, štož je 500 mjenje hač předwidźane. To je wuslědk jednanjow mjez dźěłodawarjom a zastupjerjemi dźěłopřijimarjow. Dojednane wuslědki su minjenu póndźelu podpisali.
Kaž dźěłarnistwo IG metal wujasni, je Siemens swoje plany chětro změnił, při čimž su zawodni radźićeljo stejnišćow a dźěłarnistwo proces aktiwnje přewodźeli. Předewšěm na wuchodźe Sakskeje docpěchu wulki wuspěch, wšako budźe Zhorjelski zawod z tuchwilu něhdźe 960 dźěłowymi městnami zdźeržany. Poprawom bě planowane jón zawrěć, štož je wulke protesty wuwabiło. Hižo w meji bě zawrjenje stejnišća z blida.
