Dočasnje k 79. narodninam gratulowali su putnicy wčera na Pětrowym naměsće w Romje bamžej Franciskusej. Na generalnej awdiency zanjesechu jemu italsku wersiju spěwa „Happy birthday“. Nimo toho su někotři wot bamža lubowany tango zarejwali. Tež španiskorěčna hudźbna skupina měješe wosebitu štučku za njeho. Swjaty wótc so kóždemu z hudźbnikow wosobinsce podźakowa. Dźensa ma wón narodniny.
Přez nóc swětosławny stał je so španiski frizer Alberto Olmedo. 51lětny w swojim frizerskim salonje w Madridźe na swojorazne wašnje włosy třiha: z tesakami a z wohenjom. Nimo toho wužiwa šěsć nožicow naraz. Woheń włosy skruća a jeničce z tesakami móžeš je porjadnje třihać, mišter twjerdźi. Tole praktikuje wón hižo wot lěta 2004, a nětko je widejo wo tym w interneće wozjewił.
Čas znapřećiwjenja podlěšili
Gubin/Derbno (dpa/ch/SN). Braniborske zarjadnišća maja nětko něšto dlěje chwile, znapřećiwjenja nastupajo pólske brunicowe plany zapodać. Termin je wot 14. decembra na 12. januar přestorčeny, zdźělištej wčera město Gubin a gmejna Derbno. 14. januara zakónči so tež čas wobydlerskich znapřećiwjenjow. Podłožki k brunicowym planam wostanu hač do 29. decembra w Gubinje, Derbnje, Baršću a Picnju wupołožene. Je planowane, zo so na pólskim boku w namjeznej kónčinje k Braniborskej wulka wuhlowa jama wotkryje. Wot lěta 2025 móhli tam cyłkownje wjace hač miliardu tonow brunicy wudobywać. Němscy a pólscy wobswětowi aktiwisća so tomu spřećiwjeja.
Na čas žiwjenja zasudźeny
Berlin (dpa/K/SN). Wotpowědnje wobzamknjenju zwjazkoweho sejma, Francosku na jeje próstwu podpěrać w boju přećiwo teroristiskej milicy Islamski stat, je lětadło Zwjazkoweje wobory prěni raz zasahnyło. Je to konsekwenca z terorowych nadpadow na Paris. Zwjazkowa wobora je nětkole započała zwoprawdźeć wot Němskeje přilubjenu podpěru z powětra w boju přećiwo teroristiskej milicy Islamski stat (IS). Tankowe lětadło je dźensa w nocy dwě bojowej mašinje mjezynarodneje koalicije přećiwo IS w powětře z čerstwym ćěriwom zastarało. Tole zdźěli rěčnik zasadźenskeho komanda Zwjazkoweje wobory powěsćerni dpa. Airbus Zwjazkoweje wobory typa A 310 je wšo hromadźe pjeć hodźin w powětře swój nadawk wukonjał. Kotreje narodnosće stej wonej lětadle byłoj, kotrejž je tankowar Zwjazkoweje wobory zastarał, rěčnik zasadźenskeho komanda njepraji. Na nalětach přećiwo pozicijam a zepěranišćam IS wobdźěleja so nimo francoskich tež ameriske, britiske a někotre arabske lětadła.
Wětošow (SN/JaW). Łužiska alianca (ŁA) je iniciatiwu wjacorych łužiskich wjesnjanostow wo podpěru při strukturnej změnje we Łužicy chětro kritizowała. Předsyda ŁA Hanzo Wylem-Kell někotrym z podpisarjow zdobom wumjetuje, zo płaćiwe wobzamknjenja gmejnskich radow wědomje ranja. Tole wuchadźa z lista ŁA, kotryž našej redakciji předleži.