Posledni kredit za Ukrainu
Brüssel (dpa/SN). EU je wčera připowědźiła, zo wupłaća dalši pomocny kredit Ukrainje. Kaž prezidentka komisije EU Ursula von der Leyen zdźěli, dźe wo kredit we wobjimje 1,5 miliardow eurow z cyłkownje 18 miliardow eurow wopřijaceho podpěranskeho programa za lěto 2023. Tute su sobustawske staty loni w decembru drěčeli. Nětko připowědźeny kredit je pak najprjedy raz posledni.
Što budźe z financnej pomocu klětu je njejasne. Poprawom chcychu so zastupjerjo krajow na wjeršku EU minjeny kónc tydźenja na nowy pomocny program we wobjimje 50 miliardow eurow za přichodne štyri lěta dojednać. Madźarski ministerski prezident Viktor Orbán pak je tomu z wetom zadźěwał. Wón bě plany wjackróć kritizował.
„Žanu poliwku, ale jasnu wodu“
Zjawnoprawniske medije w Pólskej dóstanu nowe nawodnistwo.
Waršawa (dpa/SN). Štóž chcyše předwčerawšim pólskemu zjawnoprawniskemu sćelakej TVP sćěhować, bě zawěsće přesłapjeny. Město wusyłanjow widźachu tam jenož logo sćelaka a hodownu hwězdu. Powěsćowy sćelak TVP Info a přisłušacy internetny portal běštej samo dospołnje wotpinjenej. Techniska pana pak tole njebě. Nowe proeuropske knježerstwo Donalda Tuska je nawodnistwo zjawnoprawniskich medijow pušćiło.
Tež zańdźenu srjedu wječor su hłowne powěsće na sćelaku TVP w 19.30 hodź. wupadnyli. Město toho wuhladachu přihladowarjo na wobrazowce znateho telewizijneho žurnalista Mareka Czyza, kiž dyrbješe něhdy sćelak wopušćić. „Kóždy pólski wobydler, kiž zjawnoprawniske medije financuje, ma prawo na wěcowne, profesionelne a sprawne informacije“, Czyz zwurazni. Wón slubi ludźom, zo wusyłaja w přichodźe „žanu poliwku, ale jasnu wodu.“
„Ampla je zwrěšćiła“
Berlin (dpa/SN). Šef krajneje skupiny CSU Alexander Dobrindt je so hladajo na trajnu zwadu wo etaće amploweje koalicije za nowowólby klětu 9. junija paralelnje k europskim wólbam wuprajił. „Eksperiment ampla je zwrěšćił. Přiměrjena reakcija su nowowólby“, wuzběhny předsyda zapósłancow CSU w zwjazkowym sejmje hladajo na špatne hódnoty we woprašowanju za tuchwilne knježerstwo a protesty přećiwo planowanym skrótšenjam.
Puć k dočasnym nowowólbam njeje jednory. Mjez druhim dyrbjał zwjazkowy kancler Olaf Scholz (SPD) w parlamenće prašenje dowěry stajić. To pak tuchwilu wotpohladane njeje. Ampla pak jedyn zmylk po druhim wora. Połoženje knježerstwa je wjace hač špatne.
Serbske Nowiny wudawaja so w Domowina-Verlag GmbH Ludowym nakładnistwje Domowina
Jednaćel: Syman Pětr Cyž
Ludowe nakładnistwo Domowina tzwr spěchuje Załožba za serbski lud, kotraž dóstawa lětne přiražki z dawkowych srědkow na zakładźe hospodarskich planow, wobzamknjenych wot Němskeho zwjazkoweho sejma, Krajneho sejma Braniborskeje a Sakskeho krajneho sejma.
Šefredaktor a zamołwity redaktor w zmysle
nowinarskeho zakonja: Marcel Brauman 577 232/233 Naměstnik šefredaktora: Axel Arlt 577 238
tel.: 03591 / 577 232 faks: 03591 / 577 202 e-mail: www.serbske-nowiny.de
Adresa redakcije a nakładnistwa: Sukelnska 27, 02625 Budyšin
Adresse der Redaktion und des Verlages: Tuchmacherstraße 27, 02625 Bautzen
Zamołwita za rozšěrjenje a marketing:
Patricia Róblowa 577 273
Předań nawěškow: Janka Rögnerowa 577 220 e-mail:
Ćišć: DVH Weiss-Druck GmbH & Co. KG, Lejnjanska 14, 02979 Halštrowska Hola, wjesny dźěl Hory
Vertriebskennzeichen: 2 B 2560 B
To a tamne (22.12.23)
Z trawusyčakom za sedźenje jědźeše wuměnkarka w Sontheimje nětko nakupować. Žona njewobsedźi žanu jězbnu dowolnosć a tež trawusyčak nima žanu čisłowu tafličku, policija wčera zdźěli. Zastojnicy běchu 66lětnu předwčerawšim lepili. Po informacijach policije móže tajki trawusyčak hač do 12 km/h spěšnje jěć. Žona trjeba za tajke jězdźidło w zjawnym wobchadźe jězbnu dowolnosć.
W Južnej Africe je stadło elefantow z rezerwata Ithala ćeknyła. Wobydlerjo wokolnych wjeskow běchu do toho płót wottwarili a dźěle toho předali, tamniše medije tele dny rozprawja. Nětko chcedźa zamołwići za zwěrjatami z helikopterom pytać. Elefanty drje agresiwne njejsu, ale móža wulke škody pola ratarjow zawinować, jeli so po polach z kukuricu pohibuja.
Žadaja sej klimowy pjenjez
Berlin (dpa/SN). Dokelž su płaćizny za energiju dale jara wysoke, žada sej nětko centrala přetrjebarjow za kóždeho wobydlerja Němskeje klimowy pjenjez we wobjimje 139 eurow. Centrala wopodstatni to z wysokimi płaćiznami za wolij, płun a ćěriwo. Tohorunja Zwjazk wobydlerjow njewolóža. W koncepće koaliciskeho zrěčenja SPD, Zelenych a FDP je tajki pjenjez předwidźany. Zwjazkowe knježerstwo pak tole za trěbne nima.
Wjele ludźi tuchwilu chorych
Berlin (dpa/SN). Wjace hač kóždy dźesaty wobydler Němskeje běše před krótkim abo je tuchwilu chory. Předewšěm su dychanske puće potrjechene, zdźěli dźensa Roberta Kochowy institut (RKI) w Berlinje. Ličba chorych je wosebje mjez dźěćimi a młodymi ludźimi přiběrała. Nimo korony zwěsćeja lěkarjo tuchwilu wjele wirusowych infekcijow, RSV wirus a gripu. Předewšěm dźěći pod dwěmaj lětomaj dyrbja RSV- wirusa dla samo w chorowni lěkować.
Inwesticije jasnje přiběrali
Ratarjo w Sakskej, Saksko-Anhaltskej a Durinskej su dźensa rano mnohe ...
W Braniborskej nuzowa situacija
Podstupim (dpa/SN). Braniborski krajny sejm wočakuje, zo změja tež klětu nuzowu situaciju. Wjetšina koalicije je tuž wotpowědnemu wozjewjenju wo nuzowym połoženju přihłosowała. Tuž smě so zwjazkowy kraj zadołžić. Koalicija SPD, CDU a Zelenych chce sćěhi ruskeho nadpada na Ukrainu, wysoku inflaciju za swójby, komuny a předewzaća financielnje trochu pomjeńšić a podpěru zmóžnić. Na wurjadnym posedźenju krajneho sejma w Podstupimje přećiwo namjetej frakcija AfD a frakcija Swobodnych wolerjow hłosowaštej. Šěsć zapósłancow frakcije Lěwicy w sejmje so hłosa wzda.
Krajny sejm je nuzowu situaciju hižo lětsa postajił. W tajkim połoženju je móžno, zo so kraj hač do dweju miliardow eurow přidatnje zadołži.
Chcedźa status wjelka změnić
Brüssel (dpa/SN). Komisija EU chce krute postajenja za škit wjelka trochu změnić. Tak ma so status wot „kruće škitane“ na „škitane“ znižić, zdźěli wčera komisija w Brüsselu. „Zwjeselace je, zo je so wjelk do wjele krajow zaso nawróćił, štož je na dobro mnohotnosće družinow w Europje. Tola hustota wjelčich črjódow w někotrych europskich regionach wohrožuje plahowanje skotu“, wuswětli prezidentka komisije EU Ursula von der Leyen.
Lokalne zarjady žadaja sej wjace fleksibelnosće a aktiwny management, hdźež je populacija wjelkow jara wysoka. „Tole dyrbjeli na europskej runinje wolóžić. Zahajeny proces je tuž wažna kročel“, prezidentka zwurazni. Zdobom wona komuny namołwja, tuchwilne postajenja zmužiće wužiwać.
Komisija EU je w septembrje připowědźiła, zo ma so na zakładźe nowych datow rozsudźić, hač dyrbja škitny status wjelka změnić. Nětko rozsudźa karje EU wo namjeće. Jelizo tomu tak budźe, maja tež hišće partnerojo Bernskeho zrěčenja tomu přihłosować.
Po lětach so wčera dojednali
Kraje EU přihłosowachu wobšěrnej azylowej reformje
Brüssel (dpa/SN). Po lěta trajacych jednanjach chcedźa w EU wobšěrnu azylowu reformu přewjesć. Wčera dojednachu so zastupjerjo EU w Brüsselu na to, dotalne prawidła přiwótřić. „Z tym wobmjezujemy njeregularnu migraciju a wolóžimy staty, kotrež su wosebje sylnje potrjechene – tež Němsku“, wuzběhny zwjazkowy kancler Olaf Scholz (SPD). Organizacije za čłowjeske prawa mjeztym dojednanje wótrje kritizuja.
Konkretnje je předwidźane, zo přewjedu so na přikład jednotne jednanja na europskich wonkownych hranicach. Planowane je wosebje jasnje krućišo z ludźimi wobchadźeć, kotřiž pochadźeja z poměrnje wěstych krajow. Hač do rozsuda wo próstwje wo azyl maja so ludźo hač do dwanaće tydźenjow w lěhwach zaměstnić.
Na reformje dźěłachu zastupjerjo krajow EU hižo wot 2015/2016. Tehdy běchu kraje kaž Grjekska dospołnje z ćěkancami předewšěm ze Syriskeje přežadane. Statysacy njeregistrowanych ludźi su tak do druhich krajow EU přichadźeli.
