Huštań (Ch.Pin/SN). Na dwurěčne kemše stej wosada Grabičanski jězor cyrkwinskeho wobwoda Delnja Łužica, region Zły Komorow, a Kupka serbska namša druhu adwentnu njedźelu do Huštanja (Wüstenhain) pola Wětošowa přeprosyłoj. Běchu to druhe tajke kemše, na kotrež je 43 kemšerkow a kemšerjow přichwatało. Bohosłužbu sobu wuhotowali su młodźi ludźo Pauline, Annelie, Wanda a Kito, kotřiž su podawizny swj. Borbory přednjesli, žony, kotraž je so přećiwo woli nana wukřćić dała a za kotruž je wišnjowa hałžka w jatbje znamjo nadźije a sćerpnosće była. Wosadna Karina Raddacowa, zbobom čłonka Serbskeje přirady Ewangelskeje cyrkwje Berlin-Braniborska-šleska Hornja Łužica (EKBO), je tutu scenu hrać namjetowała. Ju přełožiła a z gymnaziastkami a gymnaziastom w serbskej rěči nazwučowała je Christiana Piniekowa. Młodźi ludźo su zdobom dwurěčne próstwy přednjesli.

Jenož pohladać chcył je bywši wrotar němskeho narodneho koparskeho mustwa Jens Lehmann pola susoda – z motorowej piłu w ruce. W sudniskim procesu w Starnbergu so wón dźensa zakitowaše, mějo so za wopor njewoprawnjeneho wobwinowanja. Statne rěčnistwo Lehmannej wumjetuje, zo je garažu susoda z motorowej piłu wobškodźił, ­dokelž ta jemu wuhlad na jězor kažeše. Awtomatiska kamera bě 54lětneho wobkedźbowała. Čehodla je Lehmann kozoł garaže přerězał, wón „wjace njewě“.

Do bydlenskeho domu zrazył je wulki, 32 tonow ćežki měšak betona dźensa rano w Schleswigsko-Holsteinskej. Nakładne awto z wjacorymi wóskami bě do toho z jězdnje w Blomesche zjěło. 29lětny šofer so při njezbožu snadnje zrani. ­Chětro wobškodźeny dom dyrbja nětko najprjedy raz statisce přepytować.

Jerusalem (B/SN). Eksperta Bliski wuchod nastupajo Steven Höfner je nawoda běrowa Konrada Adenaueroweje załožby w palestinskej kónčinje Ramallah. Wón starosći so dźělenja křesćanow dla, kiž njemóža wjace wot wobsadźeneho Jerusalema do Betlehema a tam hody swjećić. Ličba kře­sćanow dramatisce woteběra, dźensa jenož hišće 47 000 křesćanow w palestinskej kónčinje bydli.

Hody z połnym zwonjenjom

Esztergom (B/SN). W Prěnjej swětowej wójnje běchu w katedrali arcybiskopstwa Esztergom-Budapest štyri wot šěsć zwonow sćazali. Wot toho časa wužiwachu tam jeno smjertny a Marijanski zwón. Lětsa prěnju adwentnu njedźelu je kardinal Peter Erdö wšitkich šěsć nowych abo renowěrowanych zwonow poswjećił. Na hodownej Božej mši zaklinča zwony w najwjetšim madźarskim Božim domje.

Pomocnej akciji zahajenej

Dubai (dpa/SN). Generalny sekretar UNO António Guterres je kraje w kónčnej fazy swětoweje klimoweje konferency namołwjał, swoje diferency přewinyć a kónc ­fosilnych nošakow energije skónčić. „Je načasu za maksimalnu česćelakomnosć a maksimalnu fleksibelnosć“, rjekny Guterres nowinarjam w Dubaju. Tuchwilu na konferency naležnje wo tym wuradźuje, wužiwanje wuhla, wolija a płuna skónčić. Při tym su mjezsobne pozicije krajow hišće chětro zdalene.

Biden Zelenskeho přeprosył

Washington (dpa/SN). Prezident USA Joe Biden je ukrainskeho prezidenta Wolodymyra Zelenskeho do Běłeho domu přeprosył. Po tutym puću chce Biden njepowalnu wolu USA podšmórnyć, ukrainski lud w boju přećiwo brutalnemu nadpadej Ruskeje dale podpěrować, Běły dom zdźěla. Dotal přizwolene srědki na dobro Ukrainy su kónc lěta přetrjebane. Nowu pomoc republikanojo w parlamenće USA tuchwilu blokuja.

Azylowu politiku změnić