W rozprawje wo posedźenju Njebjelčanskeje gmejnskeje rady, wozjewjenej 14. měrca, je so zmylk stał: Za ponowjenje Parkoweje dróhi w Pěskecach njeje hač dotal spěchowanske přizwolenje dóšło. Njewotwisnje wot toho je sej wokrjes hižo dopokaz cyłkowneho financowanja w formje wobzamknjenja žadał. Gmejnska rada je tomu na minjenym posedźenju přihłosowała. Dokelž ani přizwolenje dróhotwara ani wobzamknjeny hospodarski plan gmejny za lěto 2025 njepředležitej, njemóže so dróho­twar wupisać a zwoprawdźić. K jubilejej w awgusće Parkowa dróha tohodla skerje ponowjena njebudźe. SN

Berlin (dpa/SN). Zwjazkowy sejm je so dźensa zešoł, a to w swojej zestawje z časa do wólbow noweho zwjazkoweho sejma 23. februara, zo by wo planowanej změnje wustawy rozsudźił. Z njej ma so mjeza zadołženja zběhnyć a nowemu knježerstwu hoberske zadołženje we wysokosći jednoho biliona eurow za zakitowanje a infrastrukturu zmóžnić. Na spočatku pose­dźenja zapósłancy próstwje AfD a FDP wotpokazachu, debatu wotprajić.

Předsyda frakcije CDU/CSU Friedrich Merz (CDU) planowany program zadołženja zakitowaše. Wón argumentowaše z wójnu Ruskeje přećiwo Ukrainje. Tute „wurjadne wobstejnosće“ po jeho měnjenju zadołženje kraja zmóžnja.

Předsyda frakcije SPD Lars Klingbeil wočakuje přez nowe kredity nowy rozmach za Němsku a cyłu Europu. „Inwestujemy do sylnosće swojeho kraja“, wón rjekny. Předsyda AfD Tino Chrupalla apelowaše na swědomje zapósłancow a plany w mjenje swojeje frakcije wotpokaza. Wuslědki debaty hač do kónca redakciskeho časa njepředležachu.

Sakska dyrbi dźěłowe městna w zarjadnistwje kraja redukować

Drježdźany (dpa/SN). Sakska so hladajo na wobćežne pjenježne połoženje na to hotuje, zo dyrbi přichodne lěta personal wottwarić. Kelko z tuchwilu 96 000 při­stajenych na kóncu w zarjadnistwje swobodneho stata zwostanje, njemóže financny minister Christian Piwarz (CDU) hišće rjec. „Dyrbimy pak tutón puć kročić. To zwisuje tež z demografiskim wuwićom a z połoženjom dźěłowych a fachowych mocow. Nic naposledk mamy jako zjawny posłužbnik z přikładom być“, rjekny Piwarz powěsćerni dpa.

Poprawom bě Sakska ličbu přistajenych hač do lěta 2020 na 70 000 městnow znižić chcyła. Město toho pak maja nětko wjace sobudźěłaćerjow. Tole kritizuje wosebje krajny zličbowanski zarjad.

Kelko městnow konkretnje wotstronja, Piwarz postajić nochce. Jako přikład mjenuje wón diskusiju wokoło wučerjow, kotrychž ličba stajnje zaso chabła. Wottwar personala njeda so z krutymi ličbami wjazać.

Financielny fundament Zwjazka drje so dźensa změni. Mjeza zadołženja měješe so dźensa wusadźić. Za to dyrbjachu so zapósłancy stareho zwjazkoweho sejma posledni raz schadźować. Wašnje, kak je přichodny zwjazkowy kancler Friedrich Merz (CDU) postupował a tole přihotował, pak ma hórki přisłód. Kaž na bazarje je wón wo přihłosowanje stronow wabił a jim z pjenjezami a slubjenjemi měd wokoło huby mazał. Jasne je, zo dyrbi Němska do infrastruktury, zwjazkoweje wobory a škita klimy inwestować, zo by za přichod derje nastajena była. Wězo je ćežko, prawy puć za to namakać. Poprawom bě Němska při lutowanju stajnje mišterka była. Tola nětko su gigantiske wudawki planowane. Jelizo budźe historiska změna wuspěšna, dźensniši kritikarjo Merzej snano wodadźa. Wšako je wašnje, kak je wón historiske gigantiske zadołženje organizował, chětro dwělomne. Start hamtskeje periody Friedricha Merza je tuchwilu wšo druhe hač wjele lubjacy. Bianka Šeferowa