Berlin (dpa/SN). Europska unija drje njemóže swoje přilubjenje dodźeržeć, Ukrainje hač do měrca 2024 milion granatow municije přewostajić. Tole je zakitowanski minister Boris Pistorius (SPD) přiznał. Najebać to dźěłaja staty EU zhromadnje z industriju dale na tym, produkciju zwyšić, rjekny Pistorius dźensa do zahajenja wuradźowanja zakitowanskich ministrow EU w Brüsselu. EU bě w měrcu wobzamknyła, Ukrainje w běhu lěta milion granatow za artileriju přewostajić.

Na swojim wuradźowanju chcychu ministrojo wo wojerskej pomocy na dobro Ukrainy wuradźować. Pomoc ma wosom miliardow eurow wobsahować.

Brüssel (dpa/SN). Z nowymi směrnicami chce Europska unija spušćomne a trajace zastaranje z kritiskimi surowiznami kaž licium a silicium zaručić. Zastupnicy knježerstwow čłonskich statow a Europskeho parlamenta su so wčera na tekst wotpowědneho wukaza dojednali. Z nim chcedźa zlěpšowanje, předźěłanje a recycling kritiskich surowiznow w Europje spěchować, zo bychu wotwisnosć wot krajow kaž Chiny wottwarili. Dojednali su so po informacijach komisije EU na směrnicy za wšelake schodźenki produkcije. Tak chcedźa docpěć, zo EU hač do lěta 2030 něhdźe 40 procentow swojeje potrjeby sama naprodukuje. Nimo toho chcedźa 25 procentow swojeje potrjeby z recyclinga zdobyć, mjez druhim z předźěłanja starych baterijow.

Jako přikład mjenuje komisija EU rědke surowizny, kotrež trjebaja za twar wulkich magnetow w motorach wětrnikow. Tute surowizny dowožuja dotal dospołnje z Chiny. Dalši přikład su surowizny kaž licium, kiž trjebaja w baterijach elektroawtow.

Kruwy česćili su hinduwojo w Nepalu wčera na swjedźenju tihar. Na swjatku česća ludźo wjacore dny dołho zwěrjata, nimo kruwow tež woły, wróny a psy. W hinduizmje jako swjate česćene kruwy a woły su symbole zboža a derjeměća. Wčera poskićowachu kruwam picu kaž chlěb a trawu, wupyšichu je z kwětkami a girlandami a pomolowachu čoło zwěrjatow z čerwjenym próškom. Swjedźeń tihar traje cyłkownje pjeć dnjow.

Pozdatna bencinowa bomba w busu w sewjero-braniborskim Kremmenje je zasadźenje policije a fachowcow za znješkódnjenje municije zawinowała. Šofer linijoweho busa bě w swojej přestawce podhladny předmjet w busu wuhladał, tukajo na molotowy cocktail. Jako policija bus přeslědźi, přizjewi so 14lětny. Hólc bě fyzikaliski pospyt na polu termiki w busu zabył a nětko za nim pytaše.

Essen (dpa/SN). Nowy gremij sobupostajowanja katolskeje cyrkwje, synodalna rada, je so minjeny pjatk prěni króć w Essenje zešła. Wuběrkej přisłuša cyłkownje 27 biskopow, 27 delegatow centralneho komiteja katolikow Němskeje kaž tež 20 přidatnje wuzwolenych wosobow. W synodalnej radźe maja zastupnicy cyr­kwje a lajkojo runoprawnje hromadźe dźěłać. Štyrjo biskopja wokoło Kölnskeho kardinala Rainera Marije Woelkija dźěło noweho gremija dotal bojkotuja.

Warnuje před ruskimi nalětami

Kijew (dpa/SN). Ukrainski prezident Wolodymyr Zelenskyj je ludnosć kraja před přiběracymi ruskimi nalětami w přichodnej zymje warnował. Ukraina měła so na to nastajić, zo Moskwa ličbu nadpadow z trutami a raketami na infrastrukturu kraja zwyši, rjekny Zelenskyj w internetnej narěči. Zdobom přilubi prezident lěpši škit před ruskimi nalětami hač minjenu zymu. Dospołny škit kraja pak nichtó zaručić njemóže, wón rjekny.

Plastowe wotpadki strašne