Pomoc šulam
Drježdźany (dpa/SN). Sakska reaguje na pobrachowacych wučerjow tež z eksternym personalom. Kaž sakske kultusowe ministerstwo w Drježdźanach wčera zdźěli, móže w aktualnym šulskim lěće 400 šulow samostatnje personal přistajić. Do toho běše to jenož 114 šulow. Po słowach kubłanskeho ministra Christiana Piwarza (CDU) je za to wob lěto 13,5 milionow eurow k dispoziciji. Srědki móhli so za wšitke dźěła w šuli nałožić. Jako přikład mjenowaše ministerstwo lokalneho kantora, kiž nawjeduje šulski chór, wuměłcow k hladanju dźěłowych zjednoćenstwow abo IT-fachowcow za wuwiwanje digitalnych wuwučowanskich a wuknjenskich srědkow.
„To su posłužbowe zrěčenja za dodatne pomocne, spěchowanske abo wosebite poskitki zwonka hodźinskeho plana, za projektowe dny, dźěłarnički, nowowuhotowanje homepage abo fachowcow za podpěru w běrokratiji“, ministerstwo dale wujasni. Z tutej podpěru móhli so wučerjo zaso bóle na swoje poprawne dźěło – wučbu – koncentrować. Budgety za šulu měrja so po wulkosći kubłanišća. To móže mjez 7 000 a 100 000 eurami być. Přerězna hódnota wučinja tuchwilu něhdźe 35 000 eurow.
„Maja lóšt na přichod“
Berlin (dpa/SN). Kraje na wuchodźe Němskeje sej wot Zwjazka dalše inwesticije do slědźenja a wuwića žadaja. Na wosebitej konferency šefow wuchodoněmskich krajow wčera w Berlinje mjenowachu přikłady za do přichoda spomóžne klučowe technologije. To su mikroelektronika a nanoelektronika, kumštna inteligenca kaž tež kwantowe technologije. Hladajo na spěchowanje njeměł Zwjazk pjenježne srědki skrótšić abo wobstejace programy cofnyć.
Na konferency w Berlinskim Helmholtz-centrumje za materialije a energiju wobdźělištaj so tež zwjazkowa ministerka za slědźenje Bettina Stark-Watzinger (FDP) a społnomócnjeny zwjazkoweho knježerstwa za naležnosće na wuchodźe Němskeje Carsten Schneider (SPD). „Tam, hdźež wědomostnje dźěłaja, so přichod wuwije “, Stark-Watzinger wuzběhny.
Sakski ministerski prezident Michael Kretschmer (CDU), kotryž je tuchwilu předsyda ministerskeje konferency wuchodnych krajow, wuzběhny: „Chcy-li derjeměće zachować, dyrbjeli do wědomosće inwestować.“ We wuchodnej Němskej maja ludźo „lóšt na přichod“.
To a tamne (20.10.23)
Pyton su w kontejneru za staru drastu we Waibstadće pola Heidelberga namakali, jako chcychu jón pomocnicy wuprózdnić. Wulki had bě hižo zymu ćerpjeł, policija wčera zdźěli. Zastojnicy su wuzamknyli, zo je so pyton sam do kontejnera dóstał. Had su na organizaciju za wuchowanje zwěrjatow přepodali. Policija pad přeńdźenja přećiwo zakonjej za škit zwěriny dla přepytuje.
Policisća storčichu 13lětneho hólčeca ze swojeho kolesa, wohrožachu jeho z brónjemi a jeho zajachu. Wulku kritiku wuwabi zasadźenje policije wodoweje pistole dla w Londonje. Iniciatiwa Alliance for Police Accountability (APA) wčera wuzběhny, zo jednaše so cyle jasnje wo hrajku, wšako bě pistola hólca pisana. Z njej bě sej 19. julija ze swojim młódšim bratrom a sotru hrajkał. Zastojnik to wuhlada. Wón měješe to za potencielny wohrožacy podawk, štož policajskej staciji přizjewi. Na to so wobrónjene jednotki k pozdatnemu městnu njeskutka podachu a hólčeca zajachu.
Tři miliony eurow wjac za mjeńšiny
So zawěsćić budźe dróše
Mnichow (dpa/SN). Zawěsćenska branša chce hladajo na přiběrace kóšty swoje płaćizny powyšić. Hłowna přičina toho je inflacija, zawěsćernja Munich Re dźensa zdźěli. Tež dale a wjace přirodnych katastrofow je na tym wina. Za cyłu branšu njezwjeselaca je inflacija w zwisku ze zawěsćenjom jězdźidłow. W lěću su fachowcy trochowanje cyłkowneho zwjazka zawěsćenskeho hospodarstwa wozjewili. Tak su wudawki předewzaćow za reparatury awtow a druhe škody lětsa něhdźe 2,5 miliardow eurow wyše hač dochody.
Za wjace fachowcow
Lipsk (dpa/SN). Pobrachowacych fachowcow dla, chcedźa hospodarscy ministrojo krajow na wuchodźe Němskeje přistup k dźěłowym wikam za dźěłaćerjow z wukraja wolóžić. To zdźělichu wčera po prěnim wuchodoněmskim zetkanju fachowcow w Lipsku. Kaž z jednohłósnje wobzamknjeneje papjery wuchadźa, žadaja sej ministrojo mjez druhim, zo maja so wudźělenje wizow pospěšić a zjednorić.
Kulturny pas podlěšić?
Wobdźělnicy zakazaneje pro-palestinskeje demonstracije su w nocy na ...
Znapřećiwjenja wot póndźele rozjimaja
Podstupim/Grünheide (dpa/SN). Cyłkownje 1 070 znapřećiwjenjow je přećiwo planowanemu wutwarej twornje Tesla w Grünheide dóšło. Přichodnu póndźelu zamołwići słyšenje kritikarjow zahaja. Tak su wobmyslenja škitarjow wobswěta a regionalneho wodoweho zwjazka, kotřiž boja so negatiwnych wuskutkow za dnownu wodu. Ličba znapřećiwjenjow je tónkróć jasnje wyša hač nazymu lěta 2021. Tehdy běchu wokoło 800 znapřećiwjenjow přećiwo twarej twornje Tesla w Grünheide online rozjimali.
Krajny zarjad za wobswět je 1 070 znapřećiwjenjow přećiwo rozšěrjenju zawoda registrował, zdźěli wčera braniborske wobswětowe ministerstwo. W měšćanskej hali Erkner je wot póndźele zjawne rozjimanje předwidźane. Čas zapodaća znapřećiwjenjow k planam wutwara zawoda bě so před něhdźe štyrjomi tydźenjemi kónčił.
Ukrainje dalšu podpěru přilubił
Berlin (dpa/SN). Zwjazkowy kancler Olaf Scholz (SPD) je Ukrainje dalše brónje a financielnu podpěru přilubił. Jara rozhorjeny je wón hladajo na wuprajenje ruskeho prezidenta Wladimira Putina, kiž je před wjele woporami ciwilneje towaršnosće w konflikće na Bliskim wuchodźe warnował. „To je cyniske“, Scholz dźensa w Berlinje we wobłuku wozjewjenja knježerstwa wuzběhny. Na přichodnym wjeršku EU wobjednawaja šefojo knježerstwowe rozestajenja na Bliskim wuchodźe a podpěru za Ukrainu.
Němska chce „zymski pakćik“ za Ukrainu přihotować. Centralnje dźe wo zakitowanske móžnosće. Tak přewostaji Zwjazk přidatny system Patriot, kotryž zamóže rakety wotpopadnyć. Dale chce knježerstwo mjez druhim nowe pancery Gepard a municiju Ukrainje k dispoziciji stajić. Tole je hižo zwjazkowe zakitowanske ministerstwo připowědźiło.
Dalši wažny dypk, kotryž maja na wjeršku EU wobjednawać, je ilegalna migracija. Přichodny wjeršk EU wotměje so přichodny tydźeń w Brüsselu.
Napjatosć w stolicy přiběra
Namócne rozestajenja w zwisku z pro-palestinskimi demonstracijemi
Berlin/Tel Aviv (dpa/SN). Druhu nóc zasobu je w zwisku z pro-palestinskimi demonstracijemi w Berlinje k namócnym rozestajenjam dóšło. W měšćanskim dźělu Neukölln palachu so w nocy na dźensa wjacore awta a nakładne awto. Hišće dźensa chce Berlinski wyši měšćanosta Kai Wegner (CDU) knježerstwowe wozjewjenje wo połoženju w stolicy Němskeje pod hesłom „Berlin dźerži hromadźe – zhromadnje za židowske žiwjenje a přećiwo antisemitizmej“ wozjewić. Po debaće zapósłancow chce parlament zdobom rezoluciju přećiwo antisemitizmej a antiisraelskej hidźe wobzamknyć. Israelski wulkopósłanc w Němskej Ron Prosor a zastupjerjo židowskeje zhromadnosće w Berlinje so na posedźenju parlamenta wobdźěla.
Policija warnuje
Mužakow (SN). Zwjazkowa inspekcija policije w Ludwigsdorfje přepytuje tuchwilu pokazki, kak běchu pašowarjo zaměrnje wobydlerjow Němskeje na hraničnym přechodźe Łęknicy do Mužakowa narěčeli. Kriminelni chcychu Němcow přerěčeć, ludźi sobu wzać, kotřiž žane trěbne dokumenty za připućowanje do Němskeje njewobsedźa.
Jelizo narěčeni tomu přizwola, potom je to ilegalne, wšako wukrajnikow do Němskeje pašuja. Policija tuž wobydlerjow warnuje a namołwja, zo maja kedźbliwi być a to konsekwentnje wotpokazać. Jelizo su ludźo tajke pady hižo dožiwili, móža so pod čisłom 03581 36260 přizjewić. Za kóžde dalše informacije, kotrež móhli pady wujasnić, su zastojnicy dźakowni.
Jeničce zawčerawšim je policija blisko Mužakowa cyłkownje dźesać Syričanow, Irakčana a Marokkočana zajała. Dalšich šěsć Syričanow je sakska policija w Běłej Wodźe lepiła. Hač su mjezu w Mužakowje jako přechod wužiwali, zastojnicy tuchwilu přepytuja. Blisko Niskeje je policija nimo toho sydom Indičanow a Pakistanjana popadnyła. Dalšeho Syričana a třoch Jemenitow nańdźechu w Zhorjelcu.
