Štóž wukonja zastojnstwo kaž Natalie Pawlik, społnomócnjena Zwjazka za wusydlencow a narodne mjeńšiny, ma nimale kóždy tydźeń tajke terminy kaž sobotu w Smochćicach – spožčenje Myta Ćišinskeho – na starosći. Tola pola nas je ju něšto wosebje fascinowało: Kelko zajimawych nadrobnosćow wšědneho čestnohamtskeho angažementa su jej sposrědkowali. Gratulaciju počesćenymaj! W swojej narěči je na to skedźbniła, zo su „wosebje małe ludy na čestnohamtskich pokazane“. Tohodla njeběše to jenož jara rjane zarjadowanje za nas Serbow, ale tež politisce wužitny podawk. Nimo toho słušeja Myto Domowiny, Myto Zejlerja (Sakskeje) a Myto Miny Witkojc (Braniborskeje) do systema serbskich prawidłownych wuznamjenjenjow. Hač ma tón wěki na wěki tak wostać, je woprawnjene prašenje. Najprjedy pak nas pjatk w Budyšinje lětuše spožčenje Myta Domowiny wočakuje, na kotrež so hižo wjele ludźi z wjeselom přihotuje. Marcel Brauman

W Awstralskej je ludowy rozsud zwrěšćił, indigenym wobydlerjam wjace prawow politiskeho soburěčenja spožčić. Wjetšina přibližnje 60 procentow wobdźělenych je při referendumje předwčerawšim z „ně“ hłosowała.

Sydney (dpa/SN). Wuslědk historiskeho referenduma z mjenom „Voice (hłós)“ je wulki dźěl prawobydlerstwa přesłapił a nastróžił. Přećiwnicy mějachu tež we wšěch šěsć zwjazkowych statach wjetšinu. Zo by ludowy rozsud płaćiwosće nabył, směłoj to maksimalnje dwaj być. Mjez 18 milionami wólbokmanych ludźi bě 530 000 indigenych. „Wěmy nětko, hdźe w swójskim kraju stejimy. Nětko je čas mjelčeć, žarować a wo konsekwencach wuslědka rozmyslować“, cituje Berlinski dźenik Tagesspiegel organizatorow. Mjeztym su indigenscy nawodźa k tydźenju mjelčenja namołwjeli.

Za pad wuspěcha by wot prawobydlerjow wuzwoleny gremij „Aboriginal and Torres Strait Islander Voice“ parlament přichodnje w prašenjach poradźował, kotrež indigenu ludnosć direktnje po­trjechja. To by woznamjeniło, zo su prawobydlerjo we wustawje připóznaći.

W centrumje Lipska bědźachu so šoferojo jězdźidłow zawčerawšim z ješću. Kaž policija wčera zdźěli, běchu njeznaći sobotu substancu do třoch studnjow sypnyli, čehoždla ješćowe pucherki nastawachu. Ješć šumješe po dróze a tuž běchu dróhi a chódniki hładke. Nimo toho chětro wichorješe, tak zo ješćowe pucherki wokoło lećachu. Studnje dyrbjachu zamołwići města nachwilnje hasnyć.

Kedźbliwa susodka pěstowarnje přizjewi so w nocy na sobotu pola policije w Rangsdorfje, dokelž je paduchow w kubłanišću wuhladała. Jako bě policajske awto po puću k pěstowarni, žona zastojnikow wo wuwiću dale informowaše a rozprawješe, zo paduši nětko samo wokna rjedźa. Kaž so pozdźišo wukopa njeběchu so paduchojo do kubłanišća zadobyli, ale rjedźerjo. Policija so přiwšěm kedźbliwej wobydlerce dźakowaše.

Wotrow (SN/MWj). Wjele ludźi je so wčera na Wotrowskim kěrchowje ze spisowaćelom Benom Budarjom rozžohnowało a jeho k rowu přewodźało. Kašć njesechu jeho syn Jan, wnučkaj a dalši přiwuzni wot ćěłownje hač k rowej. Nimo dalšich přiwuznych kročachu za kašćom w serbskej narodnej drasće mandźelska Ludmila, přichodna dźowka Madleńka a wnučka Majka. Posledni wotpočink ma njeboćički blisko zachoda Wotrowskeje cyrkwje. Pohrjebne wobrjady nawjedował a rekwiem swjećił je swak zemrěteho farar Michał Nawka.