Azyl: Móžnosće wučerpane
Drježdźany (dpa/SN). Dale a wjace ćěkancow a požadarjow azyla docpěwa Saksku – z teje přičiny pyta swobodny stat naležnje za dalšimi móžnosćemi zaměstnjenja. Tuchwilu zamołwići tole hišće zdokonjenja, móžnosće pak su nimale wučerpane, zdźěli rěčnica sakskeje krajneje direkcije powěsćerni dpa.
Wot septembra 2023 ličby za azylom pytacych a tak tež wućeženje w sakskich přebywarnjach raznje přiběraja. Tohodla swobodny stat Sakska tuchwilu pruwuje, kak móhł kapacity rozšěrić. Při tym mysla tež na stanowe abo kontejnerowe rozrisanja. Za zaměstnjenje w sportowych halach nimaja tuchwilu žane konkretne plany.
Po informacijach nutřkowneho ministerstwa maja w přebywarnjach w Lipsku, Drježdźanach a Kamjenicy hišće někotre swobodne łoža. Wobkedźbować so dyrbi, zo njejsu ženje wšitke łoža wobsadźene, dokelž dyrbja zamołwići swójby z dźěćimi a samych pućowacych muži dźělić, zo njeby ke konfliktam dóšło. Tež narodnosć a nabožnosć ćěkancow dyrbja wobkedźbować. Wšědnje přińdźe nimo toho sto ćěkancow z Ukrainy k tomu.
To a tamne (06.10.23)
Wohrěwak sněhakowarskich črijow je na lětanišću nowoseelandskeho Queenstowna bombowy alarm zawinował. Při kontroli wačokow běchu sobudźěłaćerjo podhladny předmjet při laptopje wuhladali, „při kotrymž wisachu groćiki“. Na to lětanišćo ewakuowachu a nuzowe naprawy zahajichu. Fachowcy za wotstronjenje rozbuchadłow, kotrychž běchu z helikopterom přiwjezli, problem skónčnje wujasnichu. Po wjacorych hodźinach lětanišćo zaso wotewrěchu.
Berlinski „Festiwal of Lights“ dźensa wječor mjeztym 19. króć zahaja. Na cyłkownje 40 městnach pokazuja 85 wuměłskich swětłowych instalacijow. Wobdźiwać móža ludźo tole mjez druhim na Braniborskich wrotach, na telewizijnej wěži, na Podstupimskim naměsće a na hrodźe Charlottenburg. Festiwal skónči so 15. oktobra a je za wopytowarjow darmotny.
Naslědnika McCarthyja pytaja
Washington (dpa/SN). Po historiskim wotsadźenju předsydy Domu reprezentantow USA Kevina McCarthyja pytaja republikanojo dale za wupućom z chaotiskeho połoženja. Prěni kandidaća za wažne zastojnstwo su so mjeztym přizjewili. Dowěrnik bywšeho prezidenta Donalda Trumpa a zapósłanc Jim Jordan je swoju zwólniwosć signalizował, runje tak kaž Steve Scalise. Tež Trump je informacije šěrić dał, zo je pječa zwólniwy.
Ultimatum zwjazkowym krajam
Berlin (dpa/SN). W diskusiji wo wěcne posłužby za požadarjow azyla je frakciski předsyda FDP Christian Dürr zwjazkowym krajam měsac trajacy ultimatum stajił. Wón wočakuje wot krajow, zo přesadźa hač do přichodneje konferency ministerskich prezidentow 6. nowembra nowy system pjenježnych kartow k zapłaćenju, kotrež dyrbjeli migranća město pjenjez wužiwać. „Hewak njetrjebamy wo dalšich dawkowych srědkach Zwjazka na dobro krajow scyła wjace rěčeć.“
Taifun na Taiwanje zachadźał
Njewšědny to napohlad z wotewrjenskeho posedźenja 16. swětoweje ...
Chrupalla dale na intensiwnej staciji
Rjadnik kritizuje Vatikan
Hofreiter: Signal strachoćiwosće
Berlin (dpa/SN). Zwjazkowe knježerstwo sćele po měnjenju politikarja Zelenych Antona Hofreitera ze swojim wahanjom při wjele diskutowanym dodawanju raketow typa Taurus Ukrainje „zahubny signal“ Moskwje. Pobrachowaca rozsudźenosć a ćahace so diskusije wo dodawanju bróni Moskwu jenož w tym posylnjeja, zo wójnu přećiwo Ukrainje dołhodobnje dobudźe, rjekny Hofreiter dźensa w rozhłosu. „Dołhož z Němskeje stajnje zaso signal strachoćiwosće a čakanja wusyłamy, tuta wójna dale traje“, wón warnowaše.
Po informacijach medijow je drje mjeztym jasne, zo njebudźe Němska Ukrainje rakety Taurus, kotrež zamóža z pomocu nawigaciskeho systema swój cil same namakać, přewostajić. Wobsteji strach, zo Ukraina něhdźe 500 kilometrow daloko lětace rakety přećiwo objektam na teritoriju Ruskeje zasadźuje. Zwjazkowy kancler Olaf Scholz (SPD) bě so wospjet přećiwo tomu wuprajił, rakety do wójnskeje kónčiny słać. Hofreiter porno tomu je sej wěsty, zo bychu rakety wliw na ruskeho prezidenta Putina měli.
Jasne znamjo na dobro Ukrainy
Zastupnicy 50 europskich krajow wuradźuja na wjeršku w Španiskej
Granada (dpa/SN). Statni a knježerstwowi šefojo něhdźe 50 krajow wuradźowachu dźensa na swojim mjeztym třećim wjerškowym zetkanju noweje Europskeje politiskeje zhromadnosće (EPG) w Španiskej. We wot francoskeho prezidenta Emmnauela Macrona nastorčenym formaće chcedźa čłonske staty Europskeje unije zhromadne dźěło z dalšimi europskimi krajemi polěpšić.
W srjedźišću rozmołwow w měsće Granada steješe nadpadniska wójna Ruskeje přećiwo Ukrainje a jeje sćěhi. Z wida EU chcychu znowa jasny signal ruskemu prezidentej Wladimirej Putinej słać, kiž je w Europje mjeztym w dalokej měrje izolowany.
Diskutować chcychu tež wo prašenju, što tuchwilne geopolitiske wuwića za přichod UNO a skupinu G20 wulkich industrijnych a prohowych statow woznamjenjeja. We woběmaj organizacijomaj je Ruska zastupjena a ma daloko sahace móžnosće blokowanja.
To a tamne (05.10.23)
Powaleny płachtak na Złokomorowskim jězoru je zasadźenje policije zawinował. Swědcy běchu na hłowje stejacy čołm wuhladali a policiju wołali. Na to zasadźichu nurjakow, kotřiž pak nikoho njenamakachu. Po dwěmaj hodźinomaj akciju skónčichu, po tym zo běchu so płachtakowarjo přizjewili. Wšitcy běchu so njezranjeni na pobrjóh wuchowali, po tym zo bě sylny wichor wutoru wječor čołm powalił. Při tym běchu wšitke mobilne telefony do wody padnyli.
Klimowi aktiwisća su w Londonje předstajenje musicala „Les Misérables“ mylili. Policija je pjeć demonstrantow zajała. Předstajenje dyrbjachu na to skónčić a ludźi domoj pósłać. Aktiwisća žadachu sej z transparentami a chorhojemi na jewišću kónc wudobywanja zemskeho wolija a płuna. Wopytowarjo předstajenja aktiwistow wuhwizdachu.
Ukraina hač do 2030 w EU
Berlin (dpa/SN). Prezident Rady EU Charles Michel přihłosuje čłonstwu Ukrainy w Europskej uniji hač do lěta 2030 – pod wěstymi wuměnjenjemi. „Ukraina móže hač do 2030 EU přisłušeć, hdyž wobě stronje swoje domjace nadawki spjelnitej“, rjekny Michel tydźenikej Spiegel. Zdobom žada sej Michel wot EU mjez druhim, procesy rozsudow pospěšić. Z bórzomnym přiwzaćom Kijewa by EU „dopokazała, zo je geopolitisce jednanja kmana“, Michel rjekny.
Čěska policija kontroluje mjezu
Praha (dpa/SN). Wojujo přećiwo njeregularnej migraciji do Europy je čěska policija razniše kontrole při mjezy Słowakskeje zahajiła. Hižo w běhu prěnich hodźin su wjace hač 20 migrantow našli, najwjetši dźěl z nich ze Syriskej, zamołwići zdźěleja. Kontrole přewjeduja punktuelnje na dróhach, železniskich přechodach a podłu 250 kilometrow dołheje zeleneje mjezy. Hłowny zaměr je bój přećiwo pašowarjam, kotrež migrantow na tak mjenowanej Balkanskej čarje do Europy woža.
Lauterbach předstaja plany
