Ratarjo před krajnym sejmom protestowali
Drježdźany (dpa/SN). Wjele traktorow a słyšomny protest: Ratarjo su wčera dopołdnja ze swojimi jězdźidłami k Sakskemu krajnemu sejmej dojěli, zo bychu přećiwo zapozdźenemu wupłaćenju srědkow EU protestowali. Z trubjenjom a plakatami woni swój hněw zwuraznichu. Po informacijach organizatorow bě 350 traktorow do sakskeje krajneje stolicy dojěło. Něhdźe 500 ratarjow so na protestnej akciji wobdźěli. Wokoło krajneho sejma dóńdźe k wobchadnym haćenjam. „To je jenož kónčk lodowca“, rjekny Marc Bernhardt, rěčnik towarstwa „Kraj wutworja zwisk“. Burja njejsu jenož pjenjez z Brüssela dla přijěli. Bernhardt rěčeše wo tójšto wopačnych rozsudach minjenych lět. Minjeny pjatk bě ratarske ministerstwo zdźěliło, zo njemóže kompjuterowych problemow dla ratarske spěchowanske srědki EU kaž zwučene w decembru wupłaćić. Město toho chcedźa 241 milionow eurow 7 000 zawodam najpozdźišo kónc februara přepokazać. Ministerstwo argumentuje, zo je Europska unija směrnicy ratarskeje politiki zasadnje změniła a zo nimaja dosć fachowcow, kotřiž móhli kompjuterowu techniku wotpowědnje přestajić.
Faeser Hamas w Němskej zakazała
Berlin (dpa/SN). Zwjazkowa ministerka za nutřkowne naležnosće Nancy Faeser (SPD) je islamistisku palestinsku organizaciju Hamas a Palestinjanam přichilenu syć Samidoun zakazała, wona dźensa w Berlinje zdźěli. Hamas ma jako terorowa organizacija zaměr, israelski stat zničić. Samidoun rozšěrja jako mjezynarodna syć na dobro jatych we wšelakich krajach antiisraelsku a antižidowsku propagandu, ministerstwo zdźěla. Z wukazom njesmětej Hamas a Samidoun w Němskej hižo skutkować. Zamóženstwo wobeju organizacijow sćazaja. Internetne wustupy a aktiwity w socialnych medijach su zakazane. Štóž dale za wobě organizaciji dźěła, dyrbi z chłostanjom ličić.
Hamas ma w Němskej po trochowanju wustawoškita něhdźe 450 přiwisnikow. Mnozy z nich su němscy staćenjo. Samidoun je skupina, kotraž mjenuje so „palestinska syć solidarity“. Organizacija podpěruje wobrónjeny bój přećiwo Israelej. Bjezposrědnje po terorowym nadpadźe Hamas na Israel 7. oktobra bě wona w Berlinje słódkosće rozdźělowała.
UNO: Tragedija bjez runjeća
Pomocny skutk za Palestinjanow žada sej přiměr w Gazaskim pasmje
Rafah (dpa/SN). Hladajo na mnohe ciwilne wopory a na napjate połoženje zastaranja za čas israelskeho nadpada na zepěranišća islamistiskeje Hamas w Gazaskim pasmje je sej pomocny skutk UNO na dobro Palestinjanow UNRWA znowa přiměr žadał. „Humanitarny přiměr je dawno trěbny“, rjekny generalny komisar UNRWA Philippe Lazzarini po swojim prěnim wopyće w Gazaskim pasmje po spočatku wójny. „Bjez přiměra tam hišće wjace ludźi morja, žiwi poćerpja dalše straty a něhdy žiwa a hibićiwa towaršnosć so na přeco w zrudobje potepi.“
Bypass za ratarjow
Nowowólby w Serbiskej
Běłohród (dpa/SN). Hladajo na masiwne protesty přećiwo swojemu knježerstwu je serbiski prezident Aleksandar Vučić parlament kraja rozpušćił a nowowólby 17. decembra wukazał. „Smy žiwi w času globalnych wužadanjow, wójnow a konfliktow, w kotrymž nas tójšto poćežowanjow wočakuje“, rjekny Vučić wčera w statnym telewizijnym sćelaku RTS. Wobydlerjo měli so nětko mjez wšelakimi idejemi a programami politiskich akterow sami rozsudźić, wón rjekny.
Amokowej běhaj w meji z 18 mortwymi běštej tydźenske demonstracije přećiwo knježerstwu zbudźiłoj. Wobdźělnicy protestow wot Vučića kontrolowanym medijam wumjetowachu, zo klimu hidy šěrja a namóc wuchwaluja. Tuchwilny parlament běchu Južni Serbja loni w aprylu wuzwolili. Nacionalistiska prezidentska strona SNS ma zhromadnje ze swojimi zwjazkarjemi komfortabelnu wjetšinu. Dočasne wólby pak maja w Serbiskej často. Vučić knježi z awtoritarnymi srědkami. Medije, justica a zarjadnistwo su z wulkeho dźěla w rukach přiwisnikow Vučića. Tež problemy w Kosowje njeje prezident rozrisać zamóhł.
Cyrkej w cyle nowym šaće
Lěto je zašło, zo su wosadni w Chrósćicach swoju cyrkej wopušćili, zo bychu ju dospołnje ponowili. Nětko su ju ze swjedźenskej Božej mšu zaso jako swoju cyrkej přewzali.
Połna wona bě, Chróšćanska cyrkej, jako ju Drježdźansko–Mišnjanski biskop Heinrich Timmerevers 21. oktobra znowa k wužiwanju přepoda. Wšo je nowe, wšo je wuběrnje zdźěłane. Slubjenje, kotrež je wosadny farar lěto do toho dał, je wón spjelnił: Na kermušu budu wosadni zaso doma, w swojej farskej cyrkwi.
To a tamne (02.11.23)
Na hórskej dróze dźěćo porodźiła je 30lětna Italčanka. Žona bě zhromadnje ze swojej maćerju po puću do 57 kilometrow zdaleneje chorownje, dokelž bě w porodnych hronach. Dróha po horach z njeličomnymi křiwicami pak bě předołha. Lěkarjo w chorowni přez mobilny telefon pomhachu, porod na dróze bjez komplikacijow zmištrować. 2,9 kilogramow ćežke dźěćo a mać stej strowej.
Krokodile we wopłóčkowych kanalach New Yorka maja wotnětka swójski pomnik – byrnjež jenož legenda byli. Twórba šwedskeho wuměłca Alexandera Klingspora steji na Union Squarje w Manhattanje. Po legendźe su ludźo aligatory z južnych krajow kaž Floridy do města přiwjezli a w kanalach wusadźili. Tam su so zwěrjata mjeztym rozmnožili. Dopokazy nichtó nima. Za čas Halloweena pak sej ze stawizničku rady sami strach načinja.
Čakaja na Gazaskej mjezy
Kairo (dpa/SN). Prěni króć po zahajenju Gazaskeje wójny 7. oktobra čaka skupina wukrajnych staćanow a Palestinjanow na pomjeznym přechodźe, zo móhli Gazaske pasmo wopušćić. Pječa su hižo w transitnym pasmje egyptowskeho pomjezneho přechoda Rafah. Planowane je wupućowanje wjace hač 500 wukrajnikow a Palestinjanow z dwójnym staćanstwom. Rafah je jenički přechod z Gazaskeho pasma do Egyptowskeje
Dwěluja na energijowych cilach
Stuttgart (dpa/SN). Dale a wjace ludźi po najnowši woprašowanju dwěluje, zo Němska swoje wukazane zaměry energijoweje změny docpěwa. 77 procentow woprašanych njewěri, zo móže Němska w lěće 2030 znajmjeńša 80 procentow swojej miliny z wobnowjomnymi energijemi zaručić. Při woprašowanju w meji bě 71 procentow ludźi dwělowało, w měrcu jenož 65 procentow.
Lafontaine: Njewolerjo narěčani
