Wojowanja w chorowni w Gazy
Gaza (dpa/SN). Njedaloko najwjetšeje chorownje Gazaskeho pasma Shifa su po informacijach tam dźěłaceho lěkarja minjenu nóc raznje wojowali. Hodźiny dołho słyšeše wón třěleńcy a rozbuchnjenja, rjekny Ahmed Muchallalati, medicinar chorownje we wuskim pomórskim pasmje. Lěkar je tež israelske tanki njedaloko chorownje widźał. „Njewěmy, što planuja.“ Přiwšěm wón dale spyta, so wo swojich pacientow starać.
Israel na to tuka, zo ma islamistiska Hamas pod chorownju centralu rozkaznistwa. Hamas tole prěje. Terorisća Hamas běchu 7. oktobra Israel nadpadnyli a něhdźe 1 200 ludźi morili. Wot toho časa Israel Gazaske pasmo nadběhuje. Palestinjenjo rěča wo 10 000 smjertnych woporach mjez wobydlerjemi.
Arabski sćelak Al-Dshasira rozprawja, zo steja israelske tanki mjeztym na dworje chorownje, w kotrejž je přeco hišće něhdźe 650 pacientow. Nimo toho chowa so tam hač do 3 000 ciwilistow.
Israelske wójsko je minjenu nóc zdźěliło, zo su so wojacy do chorownje zadobyli. „Namołwjamy wšitkich přitomnych teroristow Hamas, so podać!“
Terminy, terminy
1,56 miliardow pomocy
To a tamne (15.11.23)
W chorowni skónčił je pospyt młodeho muža w Južnym Tirolu, so přez teoretiske pruwowanje jězbneje dowolnosće z njedowolenymi srědkami přemoglować. Italčana lepichu, jako jemu něchtó přez móličke słuchatko wuslědki do hłucha šeptaše. Na to młody muž słuchatko spóžrě. Policija dowjeze jeho do chorownje, hdźež bě ilegalny nastroj pod röntgenowym aparatom jasnje widźomny.
Pječa wobrónjeny muž je wčera zasadźenje policije w Hamburgskej połobskej filharmoniji zawinował. Specialna jednotka tamnišeje policije je twarjenje přeslědźiła. Do toho bě swědk rozprawjał, zo je muža z třělbu w domje wuhladał. Policisća podhladneho skónčnje namakachu. Bróń pak wukopa so jako bleša wódki, kotraž bě na pistolu podobna. Policija njemóžeše wohroženje zwěsćić, muž njetrjeba z konsekwencami ličić.
Brónje pod chorownju našli
Gaza/Tel Aviv (dpa/SN). W pincy dźěćaceje chorownje w Gazy su israelscy wojacy po swójskich informacijach skład bróni palestinskich ekstremistow namakali. Nimo toho maja pječa pokazki na to, zo su w pincy chorownje Rantisi tež zastajencow chowali, rěčnik wójska Daniel Hagari zdźěli. Oficěr pokazowaše mašinske třělby, ručne granaty a brónje za wotwobaranje tankow. Hamas israelskemu wójsku wumjetuje, zo šěri wopačnosće.
CDU: Žadyn wobydlerski pjenjez
Berlin (dpa/SN). CDU chce wobydlerski pjenjez, kiž ma so wot 1. januara 2024 wupłaćić, w tuchwilnej formje wotstronić. Tole je generalny sekretar Carsten Linnemann nowinarjam připowědźił. Strona chce tute žadanje w swojim zakładnym programje „zakótwić“, Linnemann potwjerdźi. „Štóž nochce dźěłać, tole činić njetrjeba. Wón pak njemóže potom wočakować, zo towaršnosć jeho žiwjensku potrjebu zaruči“, wón rjekny. Trěbny je „powabk, na dźěło chodźić“.
Witaja „Dźeń weteranow“
Britiski kral Charles III. swjeći dźensa swoje 75. narodniny. Hižo ...
Njeskutk wumysleny był
EU přilubjenje njedodźerži
Berlin (dpa/SN). Europska unija drje njemóže swoje přilubjenje dodźeržeć, Ukrainje hač do měrca 2024 milion granatow municije přewostajić. Tole je zakitowanski minister Boris Pistorius (SPD) přiznał. Najebać to dźěłaja staty EU zhromadnje z industriju dale na tym, produkciju zwyšić, rjekny Pistorius dźensa do zahajenja wuradźowanja zakitowanskich ministrow EU w Brüsselu. EU bě w měrcu wobzamknyła, Ukrainje w běhu lěta milion granatow za artileriju přewostajić.
Na swojim wuradźowanju chcychu ministrojo wo wojerskej pomocy na dobro Ukrainy wuradźować. Pomoc ma wosom miliardow eurow wobsahować.
EU: Surowizny lěpje zaručić
Brüssel (dpa/SN). Z nowymi směrnicami chce Europska unija spušćomne a trajace zastaranje z kritiskimi surowiznami kaž licium a silicium zaručić. Zastupnicy knježerstwow čłonskich statow a Europskeho parlamenta su so wčera na tekst wotpowědneho wukaza dojednali. Z nim chcedźa zlěpšowanje, předźěłanje a recycling kritiskich surowiznow w Europje spěchować, zo bychu wotwisnosć wot krajow kaž Chiny wottwarili. Dojednali su so po informacijach komisije EU na směrnicy za wšelake schodźenki produkcije. Tak chcedźa docpěć, zo EU hač do lěta 2030 něhdźe 40 procentow swojeje potrjeby sama naprodukuje. Nimo toho chcedźa 25 procentow swojeje potrjeby z recyclinga zdobyć, mjez druhim z předźěłanja starych baterijow.
Jako přikład mjenuje komisija EU rědke surowizny, kotrež trjebaja za twar wulkich magnetow w motorach wětrnikow. Tute surowizny dowožuja dotal dospołnje z Chiny. Dalši přikład su surowizny kaž licium, kiž trjebaja w baterijach elektroawtow.
To a tamne (14.11.23)
Kruwy česćili su hinduwojo w Nepalu wčera na swjedźenju tihar. Na swjatku česća ludźo wjacore dny dołho zwěrjata, nimo kruwow tež woły, wróny a psy. W hinduizmje jako swjate česćene kruwy a woły su symbole zboža a derjeměća. Wčera poskićowachu kruwam picu kaž chlěb a trawu, wupyšichu je z kwětkami a girlandami a pomolowachu čoło zwěrjatow z čerwjenym próškom. Swjedźeń tihar traje cyłkownje pjeć dnjow.
Pozdatna bencinowa bomba w busu w sewjero-braniborskim Kremmenje je zasadźenje policije a fachowcow za znješkódnjenje municije zawinowała. Šofer linijoweho busa bě w swojej přestawce podhladny předmjet w busu wuhladał, tukajo na molotowy cocktail. Jako policija bus přeslědźi, přizjewi so 14lětny. Hólc bě fyzikaliski pospyt na polu termiki w busu zabył a nětko za nim pytaše.
