Prěni hózdź a šrubik
Wuhorje w Haboli a Sprjewi wusadźa
To a tamne (24.03.25)
Złota rubizna w hódnoće wjacorych statysac dolarow w staće Florida w USA je zaso pola swojeho wobsedźerja. Debjenki su ćěło paducha po přirodnym puću wopušćili, policija zdźěla. Paduch bě nawušnicy spóžrěł, jako jeho policija lepi. Na to běchu skućićela dwaj tydźenjej w chorowni pod dohladom policije wobkedźbowali. Röntgenowy nastroj zastojnikam při tym pomhaše.
Něhdźe 500 dróhow francoskeje stolicy w přichodnym času za awta zawru. Při woprašowanju wobydlerjow je so wjetšina za to wuprajiła, nowe pasma za pěškow wutworić. Na wothłosowanju pak so jeničce štyri procenty ze wšěch 1,4 milionow zapisanych wolerjow wobdźěli. Přichodne lěta móhło w Parisu 10 000 parkowanišćow wotpadnyć. Šoferojo awtow dyrbja so na wulke wokołopuće nastajić. Kotre drohi to potrjechi, hišće njewědźa.
Ličba nimale konstantna
Wiesbaden (dpa/SN). Nimale połojca přistajenych w Němskej dźěła w zawodźe, w kotrymž branšowe abo firmowe tarifowe zrěčenje płaći. Ličba je nimale konstantna, zdźěli dźensa zwjazkowy statistiski zarjad. Kwota pak bě prjedy jasnje wyša. Hač do srjedź 1990tych lět bu po informacijach hospodarskeho a socialnowědomostneho instituta (WSI) dźěłarniskeje Hansa Böckleroweje załožby něhdźe 85 procentow wšitkich přistajenych po tarifowym zrěčenju płaćenych.
Policija z namocu reagowała
Istanbul (dpa/SN). W Turkowskej protesty přećiwo knježerstwu prezidenta Recepa Tayyipa Erdoğana po zajeću jeho riwala Ekrema Imamoglu pokročuja. Při tym je k namócnym rozestajenjam mjez protestowacymi a policiju dóšło. We wulkoměstach Istanbul, Izmir, Ankara a Eskisehir policija ze sylzopłunom a wodomjetakami přećiwo demonstrowacym postupowaše. Mjeztym je Erdoğan opoziciji wumjetował, zo je narod zamyliła. Dźesaćitysacy ludźo běchu hižo w nocy na wčera w někotrych městach kraja protestowali.
Z trutami město nadpadnyli
Israelske wójsko je ofensiwu w Rafah na juhu Gazaskeho pasma ...
Ministerstwo chcedźa wotstronić
Lětanišćoje dale zawrjene
Frankfurt nad Mohanom/London (dpa /SN). Zawrjene Londonske lětanišćo Heathrow ma tež wuskutki na najwjetše lětanišćo Němskeje w Frankfurće nad Mohanom. Tola nic masiwne, zdźěli rěčnik lětanišća. Wot dźensa planowanych 1 230 lětow z cyłkownje 170 000 pasažěrami dyrbjachu zamołwići pječa jenož šěsć lětow wot abo do Londona šmórnyć. Zdobom pak dyrbjachu druhe lětadła, kotrež běchu po puću do Heathrowa, w Frankfurće nad Mohanom přizemić. Kak so pasažěrojo z Němskeje dale do Londona dóstanu, ma lětanska towaršnosć rozrisać. Pod smužku so tuž ličba lětow w Frankfurće dźensa lědma změni.
Lětanišćo w Londonje Heathrow drje budźe z wěstotnych přičin dźensa hač do połnocy zawrjene. Tam je milina wupadnyła. Přičina toho je woheń w přepinarni, kotrež lětanišćo zastaruje. Cyłkownje 1 300 lětow je z toho potrjechenych, zdźěli britiska powěsćernja.
Kretschmerza paket wabił
Zwjazkowa rada je přihłosowała
Berlin/Podstupim (dpa/SN). Financnemu paketej je dźensa Zwjazkowa rada přihłosowała. Za přesadźenje paketa běštej dwě třećinje hłosow trěbnej, to je 46 wot 69 hłosow. Krajne knježerstwa, na kotrychž su CDU, SPD a Zeleni wobdźěleni, cyłkownje 41 hłosow docpěchu. Nimo toho je knježerstwo w Bayerskej, kotrež měješe šěsć hłosow k dispoziciji, připowědźiło, zo wudawkam přihłosuje. Z tym bě wjetšina hłosow zaručena. „W historiskich časach su historiske naprawy trěbne“, bayerski ministerski prezident Markus Söder (CSU) wudawki zakituje.
Braniborska chcyše so dźensa na posedźenju Zwjazkoweje rady hladajo na financny paket za zakitowanje a infrastrukturu hłosa wzdać. To bě po informacijach němskeje powěsćernje dpa wuslědk rozmołwow braniborskeho ministerskeho prezidenta Dietmara Woidkeho (SPD) a jeho zastupjerja a financneho ministra Roberta Crumbacha (BSW).
To a tamne (21.03.25)
Hdyž lube domjace zwěrjo zahinje, potom su wobsedźerjo často hórko zrudźeni. W Chinje spyta tuž dźeń a wjace ludźi so z klonom swojeho lubuška tróštować. Za to dyrbja žarowacy často wjele pjenjez zapłaćić. Kaž rozprawja Hongkongska nowina „South China Morning Post“, płaći klonowanje w normalnym padźe něhdźe 150 000 do 380 000 Yuan, to je něhdźe 19 000 do 48 000 eurow.
Svenja Suhr zhotowja w swojej tkajerni w Oranienburgu płaty z cyle wosebiteho materiala: z psyčeje wołmy. Wosebje derje hodźa so za to dołhe psyče kosmy, kaž maja je Labradory, leobergery abo samojedy. Tkalča rozprawja, zo je husty kožuch woblubowanych štyrinohačow nimale 80 procentow ćopliši hač tón wowcow. Najwjace zajimcow da sej płat jako dopomnjenku na swoje domjace zwěrjo zhotowić.
