Kijew (dpa/SN). Při masiwnych ruskich nalětach na ukrainsku stolicu Kijew je po informacijach medijow znajmjeńša šěsć ludźi žiwjenje přisadźiło. Dźesatki so zranichu. Mjez zranjenymi su tež třo policisća. Prezident Wolodymyr Zelenskyj prezentowaše w interneće widejo, kiž pokazuje zničene twarjenja, woheń a kur.

W měsće su nadpadow dla wjacore wohenje wudyrili. Wobškodźene buchu tež chorownja, šule a bydlenja. Nowinarjo rozprawja wo wjacorych detonacijach w měsće.

Połoženje na fronće wostawa za ukrainskich zakitowarjow dale wobćežne. Ruske wójsko je wokoło města Pokrowsk ofensiwu zahajiło. Při tym hrozy ukrainskim jednotkam wobkruženje.

Berlin (dpa/SN). Wonkowny minister Johann Wadephul (CDU) je so dźensa na dwaj dnjej trajacy wopyt do Israela a do kraja zapadnje Jordana podał. W Tel Avivje wočakowaše jeho israelski wonkowny minister Gideon Saar.

Jutře chce so Wadephul w Jerusalemje ze sobudźěłaćerjemi UNO a w Ramallahu ze zastupnikami palestinskeho awtonomneho zarjadnistwa zetkać. Wotběh rozmołwow budźe rozsudny za dalše postupowanje Němskeje, tak zwjazkowy kancler Friedrich Merz.

Minjene dny běchu Francoska, Wulka Britaniska a mjeztym tež Kanada připowědźili, zo chcedźa stat Palestinjanow oficialnje připóznać. Němska porno tomu měni, zo měli tutón krok skerje na kóncu dołheho procesa po puću k rozrisanju dweju statow zwoprawdźić. Doraznje pak žada sej Němska wot Israela, zo ciwilnu ludnosć w Gazaskim pasmje zastaraja. Merz njebě hladajo na to naprawy přećiwo Israelej wuzamknył. Jeho předchadnik Olaf Scholz (SPD) bě Israel stajnje jenož powšitkownje namołwjał.

Předsyda dźěłarnistwa IGBCE warnuje před dalšim wotpućowanjom firmow

Berlin (dpa/SN). Industrijne dźěłarnistwo hórnistwa, chemije a energije ­(IGBCE) warnuje před přiběracym wotpućowanjom a zawrjenjom industrijnych zawodow w Němskej. Zo bychu tomu zadźěwali, žada sej předsyda dźěłarnistwa Michael Vassiliadis nowe wusměrjenje industrijneje a klimoweje politiki.

„Dyrbimy třiróžk hospodarjenja, socialneje zamołwitosće a škita klimy zaso wurunać. Za to trjebamy aliancu Zwjazka, krajow a socialnych partnerow“, wón měni.

Nawoda dźěłarnistwa rěči hladajo na to wo problemach, kotrež je Němska sama zawinowała. „Jedyn z nich je skepsana klimowa politika“, Vassiliadis rjekny. Najwjetši problem je popłatk za wuhlikowy dioksyd. „Politika je na wiki so złožowacy system natwariła, kotryž nětko radikalne wične wuslědki prezentuje. A to dosć a nadosć: Wotpinjenje, wotpućowanje a wottwar dźěłowych městnow.“

Napisma kaž „wjac za rentu hač za inwesticije“, „etat ze 174 miliardami dołha“ a „situacija komunow tak hubjena kaž ženje“ pokazuja na dale a bóle dramatiske połoženje stata w Němskej. Dotalny princip, dźěłacym dale a wjac dawkow a wotedawkow nabrěmjenić a – dokelž to za financowanje njedosaha – socialne systemy přidatnje z dawkow subwencionować, wjedźe do Absurdistana: Klětu na přikład płaća 127,8 miliardow eurow do rentoweho zawěsćenja, a to po planje hač do 2029 na 154,1 miliardu na lěto stupa. Někotři su hižo wuličili, zo w přichodźe 80 procentow pjenjez stata do kreditow, wójska a socialnych systemow běži. Zdobom su města a gmejny lědma hišće jednanja kmane, tež w našim regionje. Wšitcy wołaja za „reformu stata“. Trjebamy pak tohorunja reformu myslenja: Při kóždym towaršnostnym­ problemje na přikład sej dale a wjac socialnych dźěłaćerjow a statnych srědkow žadać njemóže dołhodobnje fungować. Marcel Brauman