UNO: China namołwja USA
New York (dpa/SN). China je zjednoćenym statam wumjetowała, zo konflikt na Bliskim wuchodźe z wjećbowymi nadpadami na Irak a Syrisku dale přiwótřeja. Postupowanje USA w regionje zesylnja „čertowske koło namocy a přećiwneje namocy“, rjekny zastupnik Chiny pola UNO, Zhang Jun. Ludowa republika namołwja wšitke wobdźělene strony, měr wobchować, teritorialnu integritu krajow respektować a „ilegalne wojerske akcije skónčić“. Wójsko USA bě minjene dny wjace hač 85 objektow w Syriskej a Iraku bombardowało. W srjedźišću stejachu po informacijach USA rozkazowanišća, objekty tajneje słužby a składy bróni, kotrež iranske rewoluciske gardy a z nimi zwjazane milicy wužiwaja. USA reagowachu na nadpad Iranej přichilenych milicow 28. januara w Jordaniskej, při kotrymž su třo wojacy USA žiwjenje přisadźili.
Wonkowny minister USA Antony Blinken je znowa na Bliskim wuchodźe po puću, zo by móžnosće „trajaceho kónca krizy“ w Gazaskim pasmje pruwował. Dźensa bě wón w Sawdi-Arabskej.
Młodźina politice njedowěri
Woprašowanje Bertelsmannoweje załožby fachowcam alarmowacy signal
Gütersloh (dpa/SN). Byrnjež dowěra do demokratije mjez młodymi ludźimi w Němskej poměrnje derje wuwita była, mnozy z nich knježerstwu a parlamentej njedowěrja. Kaž z dźensa předstajeneho přepytowanja Bertelsmannoweje załožby wuchadźa, sadźa z 59 procentami woprašanych ludźi w starobnje 18 do 30 lět drje wjace ludźi dowěru do demokratije, hač w druhich europskich krajach. Njedowěra přećiwo skutkowacym politikarjam pak je tule jara rozšěrjena: Wjace hač kóždy druhi woprašany młody dorosćeny z Němskej rjekny, zo knježerstwu njedowěri. 45 procentow njedowěri parlamentej.
Šok z připowědźu
Lěkarka atestow dla zasudźena
Młodźina štyri dny camprowała
Španiska pomha Palestinjanam
Madrid (dpa/SN). Španiska chce naposledk wjele kritizowany pomocny skutk UNO na dobro Palestinjanow na Bliskim wuchodźe (UNRWA) z wurjadnym popłatkom 3,5 milionow eurow podpěrować. Po tutym puću chcedźa zaručić, zo móže tuta „njeparujomna organizacija“ swoje aktiwity krótkodobnje zachować, rjekny wonkowny minister José Manuel Albares wčera před wuběrkom za mjezynarodnu kooperaciju w delnjej komorje parlamenta. Wón je nawodu UNRWA Philippa Lazzarinija hižo minjeny pjatk wo tym informował. Połoženje ciwilneje ludnosće w Gazaskim pasmje je „zadwělowane“, Albares rjekny.
UNRWA bě minjene dny warnowała, zo dyrbi swoje dźěło snano hižo za štyri tydźenje skónčić, hdyž připrajene pomocne srědki njedóstanje. Wjace hač dźesać krajow, mjez nimi najwjetši darićeljo USA a Němska, běchu wjace hač 400 milionow eurow připłatkow za UNRWA blokowali. Pozadk su wumjetowanja, zo běchu sobudźěłaćerjo organizacije na nadpadźe Hamas na Israel 7. oktobra 2023 wobdźěleni. Israelska tajna słužba bě tole pječa wuslědźiła.
To a tamne (06.02.24)
Na žeńtwu hotuje so 70lětny Dieter Bohlen ze swojej přećelku Carinu, z kotrejž je mjeztym 18 lět hromadźe žiwy. Tole je Bohlen nowinje Bild přeradźił. Pječa je datum hižo postajeny. 30 lět młódša Carina pak sej žada, zo Bohlen ju porjadnje wo mandźelstwo prosy. Bohlen sam je kedźbliwy: „To by třeće mandźelstwo było, te ma hač do kónca žiwjenja dźeržeć.“ Pola swojeje přećelki pak je sej Bohlen tónkróć dospołnje wěsty.
Dwanaće metrow do hłubiny padnył je štyrilětny hólc w sewjerorynsko-westfalskim Lünenje – a je přežiwił. Hólc bě wčera popołdnju w štwórtym poschodźe wjaceswójbneho domu zawrjene wokno wočinił, z woknom zalězł a do hłubiny zrazył. Helikopter dowjeze hólca do chorownje, hdźež jeho operowachu. Policija wuchadźa z „tragiskeho njezboža“. Pokazki na njeskutk nimaja.
Syć muslimskich dušepastyrjow
Halle (B/SN). Krajna syć migraciskich organizacijow Saksko-Anhaltskeje (Lamsa) čestnohamtskich muslimskich dušepastyrjow wukubłuje. W aprylu započnje so kurs z projektom „Amussa“, kiž ma syć dušepastyrjow wutworić a w statnych zarjadnišćach etablěrować.
Rozdźělny póstny čas
Berlin (B/SN). Pola ewangelskich a katolskich wěriwych započnje so póstny čas lětsa 14. februara a skónči so jutry, 31. měrca. Pola muslimow započnje so tón spočatk ramadana 11. měrca a skónči so 10. apryla ze swjedźenjom cokora. Ortodoksni křesćenjo maja w běhu lěta štyri razy čas posćenja, 46 dnjow do jutrow, po swjatkach, w awgusće a w adwenće stajnje tydźeń.
Tydźeń za žiwjenje
Hannover/Bonn (B/SN). 13. do 20. apryla zahajitej ewangelska a katolska cyrkej 30. raz wosebity tydźeń pod hesłom „Generacija přichoda: Zhromadnje, rozdźělnje a derje“ za młodźinu a młodych dorosćenych, předewšěm zbrašenych. Ewangelska cyrkej w Němskej wšak je připowědźiła, zo so klětu wjace njewobdźěli. Tuž cyrkwi wo přichodnej strukturje wuradźujetej.
Ekumena z bibliju
Faeser: Demokratow skrućić
Berlin (dpa/SN). Zwjazkowa nutřkowna ministerka Nancy Faeser chcyła hladajo na bój přećiwo prawicarskemu ekstremizmej wot knježerstwa planowany zakoń za spěchowanje demokratije spěšnje schwalić. Politikarka SPD rjekny nowinje Rheinische Post, zo dyrbjało so nětko wšěm tym rjap skrućić, kotřiž chcedźa demokratiju sylnić a ju wožiwić. Ze zakonjom chcedźa towarstwa a organizacije w boju přećiwo prawicarstwu přichodnje pjenježnje lěpje podpěrować.
Nalěty USA tema w UNO
New York (dpa/SN). Wojerske nadběhi USA přećiwo Iranej přichilenym milicam w Syriskej a w Iraku su tema na nuzowym posedźenju Bjezstrašnostneje rady UNO. Ruska bě zeńdźenje zwołała a wumjetuje USA, zo z nalětami konflikt na Bliskim wuchodźe zaměrnje přiwótři. USA porno tomu chcyli so z nalětami za nadpad milicow na zepěranišćo wjećić, při kotrymž běchu třo wojacy USA žiwjenje přisadźili. Nalěty USA su sej pječa tež wjacore ciwilne wopory žadali.
Nowe sankcije přećiwo Ruskej
