Na wšěch 1500 ludźi wobdźěli so minjenu sobotu na demonstraciji ...
Zelenskyj: Žadyn ćišć na Němsku
Scholz holocaust wopominał
Biden hrozy z wjećbu za nadpad
Tel Aviv/Washington (dpa/SN). Mjeztym zo su rozmołwy wo přiměrje w Gazaskim pasmje po israelskich informacijach „konstruktiwne“, zbudźa smjertny nadpad na wojakow USA w Jordaniskej nowe strachi před rozšěrjenjom krizy na Bliskim wuchodźe. Prezident USA Joe Biden hrozy z wjećbu, po tym zo běchu wčera w Jordaniskej třoch wojakow USA při nadpadźe z trutami morili. Biden chce na nadpad reagować, „we wokomiku a na wašnje, kotrež sami wuzwolimy“, prezident nowinarjam rjekny.
Wojowarjo wot Irana podpěrowanych milicow w Syriskej su po informacijach sćelaka CNN za trutowy nadpad na małe wojerske zepěranišćo Tower 22 w Jordaniskej njedaloko syriskeje mjezy zamołwići. Centralne rozkazowarstwo wójska USA zdźěli, zo je so při nadpadźe znajmjeńša 34 wojakow zraniło.
Dale na dobrym puću su jednanja mjez Israelom a islamistiskej Hamas w Parisu po pušćenju israelskich zastajencow z rukow Hamas. Ta chcyła je pušćić, jelizo Israel přiměrej přizwoli.
Železnica jězdźi zaso po planje
Stawk lokomotiwnikow dočasnje skónčeny – nowe jednanja
Berlin (dpa/SN). Dźěłarnistwo lokomotiwnikow GDL je wjacore dny trajacy stawk pola železnicy po 120 hodźinach dočasnje skónčiło. Wot dźensnišeho ranja ćahi krok po kroku zaso normalnje jězdźa. „Najebać to dóńdźe w běhu dnja hišće z městnami k haćenjam a wobmjezowanjam w dalokowobchadźe, rěčnik železnicy zdźěli. To samsne płaći tež w regionalnym wobchadźe.
Po zahajenju stawka minjenu srjedu jězdźeše železnica po nuzowym planje. W dalokowobchadźe bě jenož hišće 20 procentow ćahow zasadźenych.
Poprawom měješe so stawk hakle dźensa wječor w 18 hodź. skónčić. Železnica a dźěłarnistwo pak stej so w nocy na sobotu na dočasny kónc stawka a na nowe tarifowe jednanja wot 5. februara dorozumiłoj. Rěčeć chcedźa za zawrjenymi durjemi. Wobě stronje stej sej přezjednej, zo chcetej spočatk měrca nowe tarifowe zrěčenje wotzamknyć. Hač do toho časa płaći tak mjenowana winowatosć k měrej, stawki su tak móžne. Nakładne ćahi su hižo wot soboty zaso po planje po puću. Přechodny čas hač normalnemu stawej přemosća z nuzowym planom.
Něšto nowe wuwić!
To a tamne (29.01.24)
Nic za drohoćinki, ale za tykanc zajimował je so paduch w bydlenju w schleswigsko-holsteinskim Rendsburgu. Muž bě w nocy na sobotu do bydlenja wjaceswójbneho domu zalězł a sej tykanc na kuchinskim blidźe zesłodźeć dał. Wobydler w susodnej bydlenskej stwě so na spodźiwne zwuki dźiwaše, so na paducha dohlada a jeho narěča. Na to so cuzy z wočinjenym woknom zminy a po třěše ćekny. Policija jeho wjace njenamaka.
Wokna rjedźić je Michaelej Kretschmerej, ministerskemu prezidentej Sakskeje, wutrobita naležnosć a wulke wjeselo. Tole je šef sakskeho knježerstwa minjeny pjatk w rozmołwnym wusyłanju telewizijneho sćelaka MDR Riverboat přeradźił. Hłowna přičina njewšědneho konika je wuslědk: „Je to wulkotne, dokelž po tym něšto widźiš“, rjekny 48lětny Kretschmer w kruhu dalšich hosći pisaneho koła.
Mjeno dr. Kemlein kruće z wobrazom hudźbneje šule zwjazane było
Generacijam tež serbskich dźěći a młodostnych bě wona prěnja přewodnica muzikaliskeho kubłanja a bě čas žiwjenja připóznata a wulce respektowana instanca Budyskeje wokrjesneje hudźbneje šule. Dr. Magdalene Kemlein je 13. januara 2024 w starobje 93 lět zemrěła.
Magdalene Kemlein narodźi so 23. decembra 1930 w Drježdźanach-Blasewitzu do swójby hudźbu lubowaceje lěkarskeje swójby. Jako 15lětna dyrbješe wona bombowy nadpad na Drježdźany sobu přećerpjeć, nazhoni wjele bědy a bolosćow. Zdobom pak dožiwi pozitiwny a hojacy wuskutk hudźby.
Maaßen chce z CDU wustupić
Berlin (dpa/SN). Bywši prezident zwjazkoweho zarjada za wustawoškit Hans-Georg Maaßen chce z CDU wustupić. Tole zdźěli 61lětny internetnje. CDU je minjene lěta swoje hódnoty a zakładne přeswědčenja wotpołožiła, Maaßen swój rozsud wopodstatni. Naposledk bě wón ze swojej jara konseratiwnej Uniju hódnotow zakłady załoženja swójskeje strony połožił. Ta chcyła – hinak hač CDU – ze wšěmi politiskimi stronami do rozmołwy přińć, tež z AfD.
Žadaja sej migraciski wjeršk
Wiesbaden (dpa/SN). Hessenski ministerski prezident Boris Rhein žada sej dalše wjerškowe zetkanje Zwjazka a zwjazkowych krajow k migraciji. Po wobzamknjenjach knježerstwowych šefow krajow ze zwjazkowym kanclerom Olafom Scholzom (SPD) loni w nowembru je na času, zhromadnje pruwować, kak su přesadźene, rjekny Rhein nowinarjam. Wón nawjeduje tuchwilu konferencu ministerskich prezidentow. Tež druzy ministerscy prezidenća chcedźa tajki wjeršk.
Turkowska podpěruje Šwedsku
