Po połdralětnej jatbje je 21lětny Israelčan Edan Alexander ...
Měrowa misija UNO w srjedźišću
Berlin (dpa/SN). Zakitowanski minister Boris Pistorius je do zahajenja mjezynarodneje fachoweje konferency nastupajo přichod měrowych jednotkow UNO dalšu podpěru Němskeje přilubił. „Smy rozsudźeni, měrowu misiju UNO po wšěm swěće zesylnić. Němska so dale na zasadźenju módrych nahłownikow wobdźěli“, politikar SPD rjekny.
Na přeprošenje Němskeje zeńdu so dźensa a jutře zastupnicy wjace hač 130 krajow, zo bychu konkretne přinoški přilubili a měrowej misiji UNO tak kruty zakład dali. Na konferencu wočakowachu w běhu dnja tež generalneho sekretara UNO Antónia Guterresa. Tuchwilu słuži nimale 70 000 wojakow z 120 krajow w jědnaće měrowych misijach UNO.
Trump přijědźe do Istanbula
Ruska ultimatum wotpokazuje
Moskwa (dpa/SN). Ruska je w zwisku ze žadanjemi za přiměrom w Ukrainje zwjazane hroženja wjacorych krajow ze sankcijemi jako ultimatum wotpokazała. „Tajka rěč ultimatow je za Rusku njeakceptabelna, to prosće njeńdźe“, zdźěli rěčnik Krjemla Dmitrij Pjeskow po informacijach ruskich powěsćernjow. Hač je Ruska k přiměrej zwólniwa, wón njerjekny.
Wjacore zapadne kraje chcedźa so zhromadnje z Pólskej přichodny tydźeń zetkać a wo dalšim postupowanju wuradźować. W srjedźišću steji přiměr jako zakład měrowych jednanjow mjez Ukrainu a Ruskej. Zwjazkowy kancler Friedrich Merz (CDU) bě Ruskej z dalšimi sankcijemi hrozył, jeli Ruska přiměrej njepřizwoli. Němski wonkowny minister Johann Wadephul (CDU) w tym zwisku připowědźi, zo chcyła Němska Ukrainje rakety typa Taurus přewostajić.
Minjene dny běchu spekulacije wo móžnym zetkanju ukrainskeho prezidenta Wolodymyra Zelenskeho a ruskeho prezidenta Wladimira Putina zajutřišim w Istanbulu nastali.
CDU pola Lěwicy pragmatiska
Debata w rjadach unije wo wobchadźenju z opoziciju na lěwej kromje
Berlin (dpa/SN). W diskusiji w rjadach CDU/CSU nastupajo dalše wobchadźenje z Lěwicu warnuje městopředsydka Karin Prien před dogmatizmom. „Tutón čas žada sej wot wšitkich demokratiskich mocow wjace tolerancy a mjenje dogmatizma“, rjekny Prien časopisej Stern. Unija CDU/CSU měła „pragmatisce wotwažować“ a při tym tež na „stabilitu demokratiskich institucijow“ dźiwać.
Lěwica a AfD tworitej fundamentalny přećiwk k uniji, stej pak tež dospołnje rozdźělnej. „AfD je strona prawicarskeho ekstremizma, wona wohroža našu liberalnu demokratiju“, rjekny nowa zwjazkowa ministerka za kubłanje. Lěwica tole pak nječini.
Pomoc měli přiwzać
Kóžda wosada w serbskim pastoralnym rumje ma samostatna wostać, je biskop Drježdźansko-Mišnjanskeho biskopstwa Heinrich Timmerevers wčera wobkrućił. To je dobra powěsć, wšako je to esencielne za zdźerženje serbskich nabožnych tradicijow w jednotliwych wosadach. Kóžda wosada wšako ma swoje tradicije, wobrjady atd., štož měło so w přichodźe zachować. Derje je, zo je wón jónkrótnosć kóždeje serbskeje wosady spóznał.
Nimo toho chce biskop kooperaciju mjez wosadami wutworić. Koncept serbskeho pastoralneho zwjazka, hdźež so zarjadniske nadawki za wšitke serbske wosady wobdźěłuja, je dobra podpěra duchownym, kotřiž maja potom zaso wjace chwile za dušepastyrske nadawki. Duchowni měli tuž pomoc přiwzać, wšako je to wolóženje. Tuchwilu maja fararjo přiběracych zarjadniskich nadawkow dla wjele dźěła a mjenje chwile za naležnosće wěriwych we wosadźe. Marta Měrćinkec
Wěstotu polěpšili
Drježdźany (dpa/SN). Něhdźe pjeć lět po zadobyću do historiskeho Zeleneho wjelba su nětko nowe wěstotne naprawy w Drježdźanskej statnej zběrce wuměłskich twórbow zarjadowane. Zamołwity za to je sydom wosobow sylny team, kotryž podawki w muzeju wobkedźbuje a hódnoći. Centrala je stajnje wobsadźena, tak zo móža w padźe nadpada abo zadobyća spěšnje reagować a policiju w běhu sekundow alarměrować.
Polacy blokuja přechod mjezy
Waršawa (dpa/SN). Pólscy transportni předewzaćeljo blokuja ukrainski pomjezny přechod Dorohus. „Mjeza je zawrjena“, piše organizator Rafał Mekler internetnje. Předewzaćeljo žadaja sej wobmjezowanje tunjeje konkurency z Ukrainy, kotraž je po jich měnjenju hłownje za woteběrace wobroty branše zamołwita.
Do toho bě wobwodne sudnistwo w Lublinje wukaz regionalneho zarjadnistwa zběhnyło, kiž chcyše protestnu akciju zakazać. Po informacijach organizatorow smě wotnětka hodźinsce jedne nakładne awto mjezu přeprěčić. Wojerske jězdźidła, humanitarne transporty, busy, čerstwe žiwidła a transporty zwěrjatow su wuwzate.
Pólske wozydłownistwa běchu hižo kónc lěta 2023 wjacore pomjezne přechody do susodneho kraja blokowali. Do wudyrjenja ruskeje wójny přećiwo Ukrainje transportowaše kraj najwjetši dźěl swojich tworow přez morjo. Nětko transportuja wšitko z nakładnymi awtami. W praksy pak přijědźe wulki dźěl ukrainskich awtow prózdnych do Pólskeje, zo bychu tam transportne nadawki přewzali. To kóncuje pólskim předewzaćelam eksistencu.
To a tamne (13.05.25)
Samlutki do lěsneje kupjele doběžała je třilětna holčka w Gmündenje nad Mohanom w delnjej Frankskej. Sobudźěłaćerjej dźěćo napadny. Po informacijach policije je holca dwaj kilometraj daloko nóžkowała a přez wotewrjene wrota do kupjele přišła, kotraž njebě za nowu sezonu ani hišće wotewrjena. Krótko po policiji je tež mać dźěsća dojěła, zo by holčku njezranjenu zaso sobu domoj wzała.
Wjace wopytowarjow hač wobydlerjow zličili su w Italskej: Tam je loni na wšěch 60 milionow hosći turistiske zajimawostki kraja wopytało. To je wjace hač ma kraj wobydlerjow. Na čole steji Kolosej w Romje z nimale 15 milionami wopytowarjemi. Sćěhujetej galerija mólbow Uficije w Florencu a antikske město Pompeji, kotrež bu něhdy z woporom wudyrjeneho wulkana. Turisća su statnej kasy 382 milionow eurow wobradźili.
Snadny zajim
Köln (B/SN). Wjetšina Němcow so lědma za wólby noweho bamža zajimuje. Po naprašowanju instituta YouGov mjez 2 048 ludźimi so jeničce 11 procentow „jara“ za wólby zajimuje, 59 proc. „scyła nic“. 16 proc. naprašowanych je sej Europjana jako bamža přała, 10 proc. Afričana a 4 procenty Aziata. Třećina ludźi wočakuje, zo nowy bamž wumocowanja ze stron zastupjerjow cyrkwje wujasni a so sylnišo chudym a słabym wěnuje.
Dalša financielna podpěra
Berlin (B/SN). Nabožno-politiski rěčnik frakcije SPD Lars Castellucci praji ewangelskej powěsćerni, zo płaćenja stata w nowej legislaturnej periodźe nješmórnu. Wšitke 16 krajow bě zastajenje běžnych statnych financielnych přiražkow přez jónkrótne wotnamakanje wotpokazało. W přichodźe su statne dojednanja předstajomne, zo hodźeli so cyrkwinske twary wuchować, měni Castellucci.
Zamołwitosć za přichod
