Při porodźe dźěsća spontanje pomhała je Berlinska wohnjowa wobora. Starosćiwy susod młodeje swójby bě wobornikow wo pomoc wołał, jako bě porod wotwidźomny. Pomocnicy z nuzowym wačokom muža domoj přewodźachu. Krótko na to porodźi mać „strowe a zbožowne dźěćo“, wohnjowa wobora rozprawja. Mać a dźěćo dowjezechu do chorownje. Wohnjowa wobora na swojej internetnej stronje młodym staršim radźi, sej radšo bydlenje w susodstwje wobornikow pytać.

Na wšěch 48 kóčkow rědkeje družiny Ukrainian-Levkoy je weterinarny zarjad z bydlenja w Berlinje-Marzahnje wuswobodźił. Zwěrjata bjez kožucha a z wulkimaj wočomaj mějachu zdźěla ćělne brachi a genetiske njedostatki. Kóčki su na wjacore zwěrjatownje rozdźělili. Mužej su dalše plahowanje zakazali a jeho wobskoržili.

Brüssel/Grodk (SN/at). Delegacija Łužiskeho kruha je wčera w Brüsselu krajnej zastupnistwje Braniborskeje a Sakskeje při Europskej uniji wo rozmołwje z hospodarskim komisarom EU Thierryjom Bretonom informowała. W srjedźišću steješe rozsud Łužicy, chcyć so stać z prěnjej „dolinu nettoweje nule (Netto-Null Valley) Europy, kotryž běchu zastupjerjo zwjazkarstwa z komisarom rozjimali.

Łužiski kruh a krajnej zastupnistwje chcedźa zhromadnje přichodne trěbne kroki wothłosować, informowaše komunalne zwjazkarstwo wčera. Zaměr je, Łužicu pola Zwjazka a krajow jako prěni modelowy region za nowe inwesticije za transformaciju etablěrować. Wobě statnej kencliji nětko ministerskeju prezidentow Dietmara Woidku (SPD) a Michaela Kretschmera (CDU) wo naležnosći informujetej. Bliske regiony Čěskeje a Pólskej měli do rozmyslowanjow wo modelowym region nettoweje nule Łužica zapřijeć. Wjesnjanosta Rěčic, Ralf Brehmer, wjeseli so nad konsensom z krajnym zastupnistwom Sakskeje, zo móhła Łužica jako tajki modelowy region směrodajny přikład za cyłu Europu być.

Bredstedt (SN/MiP). Na přijeću Rady Frizow kónc tydźenja w sewjerofriziskim Reußenköge blisko městačka Bredstedta wozjewi šleswigsko-holsteinska ministerka za kubłanje Karin Prien (CDU) powěsć, kotraž je mjeńšinu sewjernych Frizow w zwjazkowym kraju jara zwjeseliła. Kraj Šleswigsko-Holsteinska spěchuje wučbu sewjerneje frizišćiny na šulach dale a sylnišo. Za to natwari na Nordfriisk instituće w Bredstedtće, statnje spěchowanym wědomostnym zarjadnišću k přeslědźenju, spěchowanju a pěstowanju sewjerofriziskeje rěče a kultury, nowy wotrjad.

Berlin (dpa/SN). Zwjazkowy financny minister Christian Lindner (FDP) je CDU/CSU w zwadźe wo paket rozrosta blokadu wumjetował. Lindner rjekny po posedźenju posrědkowanskeho wuběrka Zwjazkoweje rady a zwjazkoweho sejma, zo trjeba hospodarstwo Němskeje nuznje nowe impulsy. CDU a CSU pak so tutomu žadanju spjećujetej. Unija sej žada, zo knježerstwo planowane šmórnjenje subwencijow ratarskeho diesela cofnje. Tuž je dale wotewrjene, hač móže Zwjazkowa rada paket rozrosta 22. měrca schwalić.

Lauterbach lubi wjace pjenjez

Berlin (dpa/SN). W zwadźe wo wjace transparency za pacientow a financne stabilizowanje chorownjow su rozrisanje namakali. Posrědkowanski wuběrk Zwjazkoweje rady a zwjazkoweho sejma je wobzamknył, blokowany zakoń tola nałožować. Minister za strowotnistwo Karl Lauterbach (SPD) připowědźa wjace pjenjez za chorownje a lěpši přehlad wo jich kwaliće. Tak móhli dalšim insolwencam zadźěwać. Za reformu chorownjow připowědźa minister „fonds transformacijow“ wjacorych miliardow eurow.

Přećiwo legalizowanju