Podruže w městach stupaja
Berlin (dpa/SN). Na podruž bydlić je w němskich wulkoměstach najebać zakonske borzdźidło dale a dróše. Po wuhódnoćenju ministerstwa za twarstwo su podruže w 14 najwjetšich bjezwokrjesnych městach wot lěta 2015 přerěznje wo nimale 50 procentow stupali.
Najdróše su podruže w Mnichowje z nimale 22 eurami na kwadratny meter. Sćěhujetej Berlin (18 eurow) a Frankfurt (16 eurow). Najsylnišo su podruže w Berlinje (plus 107 procentow), w Lipsku (plus 67,7 procentow) a w Bremenje (plus 57 procentow) stupali. Najniši bě rozrost w Drježdźanach z 28,4 procentami. Ličby wužadała bě sej zapósłanča Lěwicy w Zwjazkowym sejmje Caren Lay. Wona kritizuje, zo nowe zwjazkowe knježerstwo wuwiću njezadźěwa.
Ruski płun w EU zakazać
Straßbourg (dpa/SN). Komisija EU je plan předpołožiła, z kotrymž chce import ruskeho zemskeho płuna doskónčnje znjemóžnić. Wot lěta 2028 njesmě žadyn ruski zemski płun wjace čłonske kraje EU docpěć. Lěta 2024 wučinješe ruski płun přeco hišće 19 procentow wšěch importow do krajow EU, komisija zdźěla.
Importy chcedźa krok po kroku zakazać, zo bychu „stabilne wiki a zastaranje ludźi“ dale zaručili. Namjet chcedźa nětko w krajach EU a w jeho parlamenće w Brüsselu wudiskutować. Kraje maja dołhodobne zrěčenja z Ruskej wo dodawanju płuna, kotrež dyrbja nětko wupowědźić. Tež Němska by wot dospołneho zakaza ruskeho płuna potrjechena była, wšako ma tež wona dołhodobne zrěčenja.
Trump žada sej kapitulaciju Irana
Washington (dpa/SN). Prezident USA Donald Trump je najwyšemu nawodźe Iranej indirektnje ze smjerću hrozył. „Wěmy dokładnje, hdźe so ‚najwyši nawoda‘ Ali Chamenei chowa. Wón je lochki cil“, piše Trump na swojej platformje Truth Social. Najprjedy pak je Chamenei tam wěsty: „Njebudźemy jeho morić, znajmjeńša nic wokomiknje.“ Trump warnowaše Iran před tym, rakety na ciwilistow abo wojakow USA třěleć a hrožeše: „Naša sćerpnosć so nachila.“ W dalšim poselstwje sej wón wot Irana žadaše: „Kapitulacija bjez wuměnjenjow!“
Do toho bě Ajatollah Ali Chamenei Israelej hrozył: „Zionistiski terorowy režim dóstanje jasnu wotmołwu. Njeznajemy žanu hnadu“. Iranske rewoluciske gardy běchu wjacore salwy raketow do směra na Israel startowali.
Druzy na nas hladaja
Dróši zastup w kupjelach
Wiesbaden (dpa/SN). Lěćo, słónco, kupanske wjesela: Štóž chce w tutym lěću do lěsneje kupjele hić, dyrbi něšto wjace pjenjez za zastup wudać hač loni. To je zwjazkowy statistiski zarjad zwěsćiło. Płaćizny za wopyt kupjelow su w meji přirunujo z lětom 2024 wo 5,7 procentow stupali.
Tohorunja dosć rozdźělnje wuwiwaja so płaćizny za wěcy, kotrež su za kupanje wažne, na př. za kupansku drastu. Muska kupanska drasta je so wo 0,6 procentow podróšiła, płaćizna sportoweje a kupanskeje drasty žonow porno tomu je wo 1,1 procent spadnyła. To je naspomnjenja hódne, dokelž su powšitkowne płaćizny w Němskej wo 2,1 procent rozrostli.
W Němskej eksistuje 2 800 kupjelow, mjez nimi je 570 lěsnych kupjelow. Něhdźe 600 ludźi je w lěće 2023 wukubłanje na fachoweho přistajeneho za kupjele – kupanskeho abo płuwarskeho mištra – zahajiło.. To běchu tři procenty wjace hač lěto do toho. Dwě třećinje z nich běchu mužojo. W běhu minjenych dźesać lět je ličba ludźi, kotřiž su tajke wukubłanje zahajili, wo 27,5 procentow rozrostła.
Nowa wuhladna wěža nad Łobjom zbudźa diskusije
Wehlen (JM/SN). Po dołhim čakanju a wjele diskusijach je nětko skónčnje tak daloko: Přichodnu sobotu nowu wěžu na ruinje srjedźowěkowskeho hrodu we Wehlenje w Sakskej Šwicy oficialnje zjawnosći přepodadźa. Wěžu běchu wot lěta 2017 z wjele prócu ponowili. Hłownu zamołwitosć měješe skupina sydom njesprócniwych čłonow towarstwa „přećelow hrodu“ z měšćanostu Klausom Tittelom na čole. Jara spomóžne běchu tež njewočakowane spěchowanske srědki 364 000 eurow w lěće 2023, kotrež dalše dźěła zmóžnichu. Na kóncu je ponowjenje sydom metrow wysokeje wuhladneje wěže 475 000 eurow płaćiwo.
To a tamne (18.06.25)
Wo tójšto mjeńše hač myslene je rubježne zwěrjo, za kotrymž tuchwilu w jězoru pola Braunsbebra na juhu Saksko-Anhaltskeje pytaja. Mjeztym maja nowy widejo, kotrež pokazuje zwěrjo podobnje wulkej kóčce. Dotal z toho wuchadźachu, zo je rubježne zwěrjo puma. Na to běchu wulku pytansku akciju z trutami a samo helikopterom zahajili. To su mjeztym skónčili. Škitne naprawy pak najprjedy raz dale wobsteja, zamołwići zdźěleja.
Róčnicu zakaza su w Berlinje na swojorazne wašnje woswjećili: Něhdźe 300 ludźi je wčera w Berlinje njedaloko muzejoweje kupy do Sprjewje skočiło, sto lět po tym, zo je Berlinske knježerstwo kupanje w rěce zakazało. Protest měješe pokazać, zo je kupane tam móžne. Organizowało bě to towarstwo za kupanje w rěce, kiž hižo wjele lět přećiwo zakazej wojuje.
Teheranjenjo měli ćeknyć
Washington (dpa/SN). Hladajo na wójnu mjez Israelom a Iranom je prezident USA Donald Trump wobydlerjow milionoweje metropole Teherana namołwjał ćeknyć. „Wšitcy měli město hnydom wopušćić“, piše Trump na platformje Truth Social. W iranskej stolicy bydli dźewjeć milionow ludźi. Mjeztym su USA dalši lětadłonošak do regiona pósłali a dźesatki lětadłow do Europy přepołožili, kotrež zamóža druhe lětadła w powětře natankować.
Ruska zaso Kijew nadběhowała
Kijew (dpa/SN). Při ruskich nalětach na ukrainsku stolicu Kijew je so minjenu nóc po oficialnych informacijach tójšto ludźi zraniło. Měšćanosta Vitali Kličko rěči wo 16 zranjenych. Ruska bě stolicu z trutami a raketami nadběhowała. Po informacijach medijow su ruske wojerske jednotki wjacore ukrainske zepěranišća na wuchodźe a juhu kraja přewinyli a hibaja so dale do směra na zapad. USA su pječa dalšu wojersku techniku z Ukrainy do Bliskeho wuchoda přepołožili.
Komuny žadaja sej wurunanje
Nimale 86 lět po nadpadźe hitlerskeje Němskeje na Pólsku su wčera ...
Dnowna woda wohrožena
Berlin (dpa/SN). W dale a wjace kónčinach Němskeje hrozy nuza dnowneje wody. Tole je centralny wuslědk najnowšeho přepytowanja Zwjazka za wobswět a škit přirody BUND, kotruž su wčera wozjewili. W połojcy wšěch wokrjesow wjace dnowneje wody přetrjebaja, hač móže přiroda ze spadkami zaso narunać. Wosebje potrjechene njejsu jenož znate suche kónčiny kraja, ale tež sylnje wobsydlene kónčiny kaž Porynska abo regiony w Delnjej Sakskej.
Studija zdobom dopokazuje, zo klimowa kriza problem přiwótřa. 94 wokrjesow je akutnje wot pobrachowaceje dnowneje wody potrjechenych. Tule je mnóstwo wody minjene lěta widźomnje woteběrało. Najwyša je potrjeba pitneje wody.
