Warnuja před horcotu
Podstupim (dpa/SN). Braniborske strowotniske ministerstwo warnuje zawody w swojim kraju připowědźenych wysokich temperaturow dla. „Dźěłodawar dyrbi garantować, zo ma škit před horcotu na dźěłowym městnje“, praji ministerka za strowotnistwo Britta Müller (bjezstronska). K temu słuša znjesliwa temperatura w rumnosći kaž tež škit před słóncom. Hdyž je horcyšo hač 35 stopjenjow celsiusa, njesmě so rumnosć hižo wužiwać, chiba zo hodźi so klimatizować. Tohorunja ma so ćežke dźěło w horcych hodźinach wobeńć abo znajmjeńša redukować.
Němscy meteorologojo su za přichodne dny temperatury nad 30 stopjenjow celsiusa wěšćili.
Ratarske zrěčenje z Ukrainu dojednane
Brüssel (dpa/SN). Komisija EU je jednanja z Ukrainu wo předźěłanym zrěčenju wo swobodnym wikowanju zakónčiła. Ze zrěčenjom chcedźa Ukrainu poněčim do europskich hospodarskich wikow zapřijeć, komisija EU zdźěla. Po słowach prezidentki komisije EU Ursule von der Leyen maja so ze zrěčenjom puće tworow zaručić a solidarita z wot Ruskeje nadpadnjenej Ukrainu zwuraznić. EU změje swoje lěpšiny, dokelž su cła niske abo dospołnje wotstronjene. Ukraina móže swoje wudźěłki dale do krajow Europskeje unije eksportować. W srjedźišću zrěčenja steja ratarske wudźěłki. Wobě stronje stej so na kontingenty dojednałoj, kotrež móža so do wobeju směrow předawać. Za twory kaž pšeńcu, kukuricu, cokor, měd, mjaso pjerizny a jeja z Ukrainy płaća dale wosebje krute předpisy za eksport do krajow EU. Hladajo na starosće europskich ratarjow běchu hižo loni krute směrnicy wukazali.
Wobě stronje dyrbitej zrěčenje hišće wobkrućić. Komisija EU chce dojednanje čłonskim krajam EU přepołožić.
Wulki zapal a potom šok
Dźensa před 35 lětami je z měnowej uniju zapadna hriwna do NDR přišła
Berlin (dpa/SN). Štóž je podawk 1. julija 1990 sobu dožiwił, jón njezabudźe: Njesměrnu euforiju, jako zawjedźechu w tehdyšej NDR zapadnu hriwnu, D-Mark. Mnohim bě to symbol wulkeje swobody a noweho započatka po 35 lětach socialistiskeho hospodarjenja.
Wěrno je, zo započa so 1. julija 1990 hospodarski eksperiment pjenježneje, hospodarskeje a socialneje unije bjez runjeća. Wobydlerjo tehdyšeje NDR swoje zamóženje do zapadneje měny změnichu. Wšitke mzdy, renty a podruže buchu w poměrje jedyn k jedyn přestajene.
Tři měsacy do zjednoćenja Němskeje płaćachu naraz zapadoněmske prawidła socialneho wičneho hospodarstwa w NDR. Dźensa wěmy, zo bě tole z tójšto njelěpšinami zwjazane. Sćěhi dramatiskeje změny su hač do dźensa politisce a hospodarsce čujomne. Zwostanje prašenje, hač bě druhich móžnosćow.
Dźe wo přichod rěče
Wosrjedź Choćebuza rejowali
Diesel předrohi
To a tamne (01.07.25)
Žałosćace a wobarace so dźěćo w badensko-württembergskim Iffezheimje je zasadźenje policije zawiniło. Swědkojo tukachu na zawlečenje dźěsća. Na to přijědźe policija z wjacorymi awtami a samo helikopterom. Skónčnje so wukopa, zo běštej staršej dźěćo ze swjedźenja wotewzałoj – z jeho wida pak „přezahe“.
Wotstajenje e-scooterow na chódnikach chcedźa přichodnje raznišo rjadować. Tole připowědźa zwjazkowy minister za wobchad Patrick Schnieder. Přiwótřić chcedźa směrnicy za wupožčowarjow tajkich jězdźidłow. Přichodnje ma zakazane być, rolery prosće na chódnikach parkować abo – ležo wostajić. Tole budźe jenož hišće priwatnym wobsedźerjam dowolene. Poskićowarjo maja koncept zdźěłać, kak sej parkowanje jězdźidłow předstaja. Wosebje we wulkoměstach su rolery na chódnikach wulki problem.
Zetkanje nabožinow wotprajene
Mannheim (B/SN). Lětuša „Mila nabožinow“ w Mannheimje wupadnje. Po měnjenju organizatorow cyłkowne „politiske połoženje njedowola, z njewobćeženym začućom so na zarjadowanju wobdźělić a sej k tomu hosći přeprosyć“. Někotre skupiny su hižo wotsamo wotprajili, kaž židowska wosada. Dołhe kryte blido měješe wot ewangelskeje ke katolskej cyrkwi znowa zajimcow k bjesadźe a zhromadnosći pohnuwać.
Prěnja biskopka
Wien (B/SN). Maria Kubin je prěnja biskopka připóznateho nabožneho zhromadźenstwa, starokatolskeje cyrkwje w Awstriskej. Wona, kiž je w tradicionalnej romsko-katolskej swójbje wotrostła, nosy mitru, hrudźny křiž a biskopski kij. 40lětna psychoterapeutka přestupi k starokatolskej cyrkwi, w kotrejž bu po rozsudźe synody 1997 ordinacija žonow zawjedźena.
Ličba lutheranow na juhu stupa
Dobrindt AfD dla hišće waha
Berlin (dpa/SN). Zwjazkowy nutřkowny minister Alexander Dobrindt (CSU) je zdźeržliwje na žadanja SPD reagował, žadanje za zakazom AfD hnydom přihotować a zapodać. „Rozsudy stronskeho zjězda SPD njejsu za ministra hišće nadawk“, rjekny Dobrindt nowinarjam. Wón wobstawa dale na rozsudźe nutřkownych ministrow, kotřiž chcedźa dźěłowu skupinu krajow a zwjazka załožić, dyrbjało-li so zastopnjowanje AfD jako prawicarsko-ekstremistiska strona wobkrućić.
Zastajency najwažniši
Tel Aviv (dpa/SN). Israelske nadpady w Iranje su po wuprajenju israelskeho ministerskeho prezidenta Benjamina Netanjahuwa „daloko sahace regionalne móžnosće“ wotkryli. „Najprjedy dyrbimy zastajencow wuswobodźić“, rjekny Netanjahu na wopyće centruma tajneje słužby. Medije maja tute wuprajenja za dopokaz, zo je Netanjahuwej wuswobodźenje zastajenjow tuchwilu wažniše hač zničenje Hamas w Gazaskim pasmje.
Teheran čaka na rozsud USA
