Zawostaja jěry přisłód
Přemało městna za nakładna awta
Podstupim/Drježdźany (dpa/SN). Podłu němskich awtodróhow pobrachuja tysacy parkowanišćow za nakładne awta. Tole je po měnjenju Awtomobiloweho kluba Europa strašne wohroženje nadróžneho wobchada. Wot 15. apryla hač do 3. junija su w nadawku kluba ličili, kelko nakładnych awtow wječor wot 20.30 hodź. při awtodróhach parkuje. Při tym zwěsćichu, zo je předewšěm na južnym Berlinskim wobkruhu A10 a podłu A24 w Mecklenburgsko-Předpomorskej situacija wopak parkowacych awtow dla strašna.
Z wućeženjom 165 procentow je w Sakskej wosebje parkowanišćo Hornja Łužica sewjer při A4 negatiwnje napadnyło. Podłu A17 pola Drježdźan zwěsćichu 120 procentow wućeženja. „Wot 16 hodź. šoferojo wšědnje wo parkowanišća wojuja“, rjekny rěčnik předsydstwa Zwjazka nakładnych wozydłownistwow Dirk Engelhardt. Parkowanišća su wječor a w nocy masiwne přećežene a wobchad wotstajenych wozydłow dla zdźěla strašnje wohroženy. Tak steja nakładne awta na zajězdach, kiž na parkowanišća wjedu abo na parkowanskich płoninach, kiž su za wosobowe awta rezerwowane.
Dorost baćonow so wuwiwa
Ze srědkami hišće tójšto dźěła
Drježdźany (dpa/SN). Zastupowaca ministerska prezidentka Sakskeje Petra Köpping (SPD) je sej wěsta, zo je w zwisku z miliardy eurow wopřijacym programom zwjazkoweho knježerstwa na dobro inwesticijow do přichoda hišće wjele dźěła. „Wurjadne zamóženje w tutej formje njebudźe w Sakskej a na wuchodźe scyła skutkować“, rjekny Köpping w Drježdźanach. „Wuměnjenja, zo móhli tute srědki zasadźić, su sprostnjene.“ Tak je z jeje wida problematiske, zo maja so srědki w času napjatych etatow jenož za přidatne a nowe inwesticije nałožować. „To je wulki zadźěwk za trěbne inwesticije“, wona rjekny. Krajam hrozy z wulkim konjunkturnym programom mjenje dawkowych dochodow. Nimo toho wažne wobłuki kaž sport a kultura dospołnje ze spěchowanskeho programa wupadnu. „W tutych dypkach trjebamy jasne polěpšenja.“
Zwjazkowy financny minister Lars Klingbeil (SPD) chce sta miliardy eurow wobsahowacy wurjadny fonds za inwesticije, infrastrukturu a škit klimy hišće tutón měsac zeskutkownić. Z dawkami financowane wurjadne zamóženje 24. junija w kabineće wobzamknu.
To a tamne (10.06.25)
Staru granatu je žona w Neuruppinje na sewjeru Braniborskeje z rěki wućahnyła. Wona bě z magnetom za swojimi klučemi pytała, kotrež běchu do wody padnyli. Při tym měješe naraz zerzawy kruch železa w rukomaj. Sobudźěłaćerjo zarjada za wotškódnjenje municije jón jako staru rusku tankowu granatu identifikowachu a wottransportowachu. Hač je žona tež swoje kluče namakała, njeje znate.
Stary tačelak w spěšniku ICE je na Hamburgskim dwórnišću Altona wjetše zasadźenje policije zawinował. Sobudźěłaćer železnicy bě wosamoćeny paket pjatk wuhladał. Na to policija dźěl dwórnišća wokoło ćaha zaraći. Dokelž spočatnje njewědźachu, hač njejsu w pakeće strašne maćizny, zawołachu fachowcow za znješkódnjenje. Woni paket přeswětlichu a tačelak namakachu. Policija ludźi namołwja, swoje wačoki stejo njewostajić.
Přirada so w Budyšinje zetkała
Zapósłancy sej dochody zwyšili
Berlin (dpa/SN). Dochody zapósłancow zwjazkoweho sejma jónu wob lěto wotpowědujo wuwiću mzdow w Němskej zwyša. Přećiwo hłosam AfD a Lěwicy je parlament wobzamknył, tute rjadowanje wobchować. Po zakonju dyrbi zwjazkowy sejm wothłosować, hač „wotškódnjenje zapósłancow“ po wuwiću přerěznych mzdow pozběhnje. Tuchwilu dóstanu zapósłancy sejma 11 227,20 eurow wob měsac, za kotrež dyrbja dawki płaćić. K tomu přińdźe 5 349,58 eurow bjezdawkoweje měsačneje pawšale za kóšty.
Musk hrozy Trumpej
Washington (dpa/SN). Zwada mjez prezidentom USA Donaldom Trumpom a miliardarom Elonom Muskom móhł sćěhi za swětnišćowy program USA měć. Musk je připowědźił, zo nochcyła jeho firma SpaceX swětnišćowu kapslu Dragon hižo dlěje wužiwać. Swětnišćowa łódź Dragon je tuchwilu jenička móžnosć, astronawtow do swětnišća dowjezć. Musk a Trump běštaj so dawkowych wukazow Trumpa dla zwadźiłoj.
Fabriku trutow nadběhowali
Sobudźěłaćerka Kijewskeho měšćanskeho zarjada dokumentuje ...
Wolóženja za Ukrainu skónčene
Brüssel (dpa/SN). Europska unija je wikowanske lěpšiny na dobro Ukrainy skónčiła, z kotrymiž běchu wot Ruskeje nadpadnjeny kraj minjene tři lěta podpěrowali. Wotnětka płaća přechodne rjadowanja, doniž njejsu nowe wikowanske zrěčenje z Ukrainu wotzamknyli. EU bě po zahajenju ruskeho nadpada w lěće 2022 ukrainske wudźěłki wot cłow wuswobodźiła. Tak chcychu hospodarstwo kraja sylnić. Potrjechene běchu wosebje ratarske wudźěłki kaž pjerizna, jeja, cokor, wows, kukurica a měd.
Podpěra na dobro Ukrainy bě mjez ratarjemi hněw zbudźiła. Woni skoržachu na konkurencu přez tunje ratarske importy. Z městnami burja pomjezne přechody a składy tworow blokowachu.
