Přihotuja nowonatwar Ukrainy
London (dpa/SN). Zwjazkowa wonkowna ministerka Annalena Baerbock chce so ruskej nadpadniskej wójnje w Ukrainje z „ofensiwu nowonatwara“ wobarać. Tole rjekny politikarka Zelenych do zahajenja konferency za nowonatwar Ukraine Recovery Conference w Londonje dźensa nowinarjam.
Natwar Ukrainy je „kolosalny nadawk“, rjekny Baerbock a doda: „Jeničce 2022 je Ukraina 29 procentow swojeho nutřkokrajneho bruttoprodukta přisadźiła, inflacija wučinja mjeztym 27 procentow.“ Swětowa banka z tym liči, zo płaći nowonatwar zničenych kónčin wjace hač 400 miliardow dolarow (něhdźe 336 miliardow eurow). Němska přihotuje „masiwnu humanitarnu pomoc, zo by wot najhóršich zničenjow, zapławjenjow a wuhnaća potrjechenym swójbam po boku była“, Baerbock rjekny. Dołhodobnje ma natwar kraja proces přistupa Ukrainy k Europskej uniji a wuwiće ukrainskeho hospodarstwa podpěrować.
Ukraina dyrbjała ze swojeho boka raznišo přećiwo korupciji postupować, zo móhła mjezynarodne pomocne srědki efektiwnje a zaměrnje zasadźić, město toho, zo so pjenjezy w ćmowych kanalach zhubja, w Londonje namołwjachu.
Dobry signal Moskwje
Lambsdorff do Moskwy
Prěni dźeń škita ludnosće
W spomnjeću na Bohdana Urbankowskeho
Styskniwa powěsć je mje w dowolu dosćahnyła: We Waršawje je minjeny štwórtk, 15. smažnika, we 80. žiwjenskim lěće Bohdan Urbankowski zemrěł – wuznamny pólski basnik, dramaturg, historikar a filozof. Z pjera wuměłca a wědomostnika pochadźeja njeličomne zběrki poezije a prozy, dźiwadłowe hry, pojednanja a biografije, mjez druhim wo Adamje Mickiewiczu, Józefje Piłsudskim a Janje Pawole II.
To a tamne (21.06.23)
Nowy tematiski wobłuk w Berlinskim kabineće wóskowych figurow „Madame Tussauds“ wotewrěł je bywši knježacy měšćanosta Klaus Wowereit. Wotdźěl „Award Party“ ma swjatočnosće spožčenja myta na čerwjenym přestrjencu z tójšto prominentnymi wosobami napodobnić. Kabinet Madame Tussauds swjeći lětsa 15. róčnicu wobstaća. Wowereit bě swojoraznu přehladku Pod lipami lěta 2008 jako měšćanosta wotewrěł a je tam wězo ze swójskej figuru zwobraznjeny.
Narodniny krala Charlesa III. su w britiskim wulkopósłanstwje w Berlinje ze 400 hosćimi woswjećili. „Je hišće trochu njezwučene, wo narodninach krala rěčeć“, wulkopósłanča Jill Gallard hladajo na dołhi čas zastojnstwa kralowny Elizabeth II. rjekny. Narodniny britiskeho monarcha swjeća stajnje w lěću, dokelž maja tam wuhlady na rjane wjedro.
Chorownje wołaja wo pomoc
Berlin (dpa/SN). Ze wšoněmskim akciskim dnjom su chorownje Němskeje dźensa na swoje dramatiske pjenježne połoženje skedźbnili. Centralne zarjadowanje bě w Berlinje planowane. Aktualnje z toho wuchadźeja, zo bědźi so 20 do 30 procentow wšěch klinikow z hrožacej insolwencu. Prezident zwjazka městow Němskeje Markus Lewe žada sej dalšu spěšnu pomoc. Chorownje njemóža na reformu klinikow čakać. Planowanych šěsć miliardow eurow je přemało, Lewe rjekny.
Zelenskyj: Žane straty
Kijew (dpa/SN). Ukrainska armeja njeje při swojej tuchwilnej přećiwnej ofensiwje přećiwo ruskim jednotkam po słowach prezidenta Wolodymyra Zelenskeho žane teritorialne straty poćerpjeła. W někotrych kónčinach ukrainscy wojowarjo postupuja, w druhich so zakituja a so ruskim nadběham wuspěšnje wobaraja, tak Zelenskyj. Znowa wón wobydlerjam kraja přilubi, zo módro-žołta ukrainska chorhoj něhdy zaso po wšěch tuchwilu wobsadźenych kónčinach zmawuje.
Łžě Johnsona w rozprawje
Po sensacionelnym druhim dobyću champions league po 2002 su mjetarjow ...
Wjace politiskich njeskutkow
Berlin (dpa/SN). Zwjazkowa ministerka za nutřkowne naležnosće Nancy Faeser (SPD) a prezident zwjazkoweho zarjada za wustawoškit Thomas Haldenwang staj dźensa w Berlinje wustawoškitnu rozprawu 2022 předstajiłoj. W njej zwěsća, zo je ličba politisce motiwowanych njeskutkow w Němskej dale přiběrała. W Němskej su loni po informacijach zwjazkoweho kriminalneho zarjada 58 916 politisce motiwowanych njeskutkow zličili, šěsć procentow wjace hač lěto do toho.
Nimo toho je ličba tak mjenowanych reichsbürgerow dale sylnje rozrostła. Tutomu wobłukej přiliči nutřkokrajna tajna słužba w lěće 2022 něhdźe 23 000 ludźi, po 21 000 lěto do toho. Reichsbürgerojo zwjazkowu republiku njepřipóznawaja. Po ruskim nadpadźe na Ukrainu dyrbi so wustawoškit tež přiběrajcy ze spionažu a z wobwliwowanjom němskeje politiki přez wukrajne tajne słužby zaběrać.
