Prašenje dowěry nětko tola hižo prjedy
Berlin (dpa/SN). W ćahańcy nastupajo nowowólby zwjazkoweho sejma nětko za tym wupada, zo staji zwjazkowy kancler Olaf Scholz (SPD) prašenje dowěry nětko tola prjedy hač hakle srjedź januara, kaž dotal planowane. „Zo stajam hišće do hód prašenje dowěry, njeje za mnje scyła žadyn problem“, rjekny Scholz wčera wječor w sćelaku ARD. Wón wočakuje w tymle prašenju dojednanje mjez frakciskim šefom SPD Rolfom Mützenichom a frakciskim předsydu CDU Friedrichom Merzom.
Předsyda CDU Merz sej žada, zo měł Scholz po najspěšnišim puću prašenje dowěry stajić, po móžnosći hižo zajutřišim, srjedu. Tak móhli so nowowólby hišće w januara přewjesć. Mützenich chce do toho hišće pruwować, kotre projekty móhła SPD do nowowólbow přesadźić. Jako přikłady mjenowaše wón zwyšenje dźěćaceho pjenjeza, zaručenje financowanja cyłoněmskeje jězdźenki, podpěra industrije a škit wustawoweho sudnistwa.
Merz wobstawa na druhim wotběhu a rjekny nowinarjam: „Wo tym móžemy rěčeć, po tym zo je Olaf Scholz w zwjazkowym sejmje prašenje dowěry stajił.“
Hišće žadyn telefonat z Trumpom
Washington/Moskwa (dpa/SN). Přichodny prezident USA Donald Trump a ruski prezident Wladimir Putin njejstaj minjeny tydźeń po informacijach z Moskwy telefonowałoj. Rěčnik Krjemla Dmitrij Pjeskow je dźensa wotpowědne informacije nowiny Washington Post wotpokazał, po kotrychž staj Putin a Trump minjeny tydźeń telefonisce mjez sobu rěčałoj. „Tajkeje rozmołwy njeje było. To su prosće wopačne informacije“, Pjeskow rjekny. Putin bě minjeny štwórtk na zjawnym wustupje w Sočiju nad Čornym morjom Trumpej k wólbnemu dobyću gratulował a rjekł, zo by wosobinsku rozmołwu z nim witał.
Na to bě Washington Post pisała, zo staj wobaj statnika telefonowałoj. Při tym je Trump Putinej pječa radźił, wójnu přećiwo Ukrainje dale njepřiwótřić. Nowina citowaše w tym zwisku tež Pjeskowa ze wšelakimi wuprajenjemi.
Trump bě we wólbnym boju wospjet rjekł, zo chcył wójnu w Ukrainje spěšnje skónčić a zo planuje wotpowědny „deal“ z prezidentom Putinom.
Nowe knježerstwo do hód?
CDU a SPD w Sakskej móhłoj zhromadnje koaliciju mjeńšiny wutworić
Drježdźany (dpa/SN). Po tym zo stej stronje BSW a CDU w Sakskej sonděrowanske rozmołwy minjenu srjedu bjez wuslědkow zakónčiłoj, chcetej CDU a SPD w běhu tydźenja wo wutworjenju mjeńšinoweho knježerstwa rěčeć. Wotpowědny poskitk rozmołwy CDU socialdemokraća zawčerawšim přiwzachu. „Zamołwitosć za naš kraj a wobydlerjow stej najwažnišej“, zwurazništaj předsydka sakskeje SPD Kathrin Michel a předsyda Henning Homann. Hižo štwórtk maja frakcija SPD krajneho sejma a krajne předsydstwo kaž tež wotpowědne gremije CDU wo wuslědkach rozmołwow wuradźować.
Kretschmer je stabilita
Wobchodnicy optimistiscy
Drježdźany (dpa/SN). Sakscy wobchodnicy zhladuja najebać wšu kupnu zdźeržliwosć ludźi optimistiscy na zahajacy so hodowny wikowanski čas. Byrnjež wuchadne połoženje skerje njewěste było, je so tak mjenowany konsumowy barometer naposledk tola trochu polěpšił, rjekny René Glaser, hłowny jednaćel sakskeho wikowanskeho zwjazka. „Tole zbudźa nadźiju na wuspěšny dohodowny čas.“
Za měsacy nowember a december liči zwjazk wikowarjow, zo wobrot wo 1,3 procenty rozrosće. Z tym drje hibaja so dochody na niwowje minjeneho lěta. „Tež w lěće 2024 přińdu ludźo do hodownje wupyšenych a wobswětlenych městow, zo bychu tam tradicionalne dohodowne wiki wopytali a hodowne dary nakupowali“, Glaser rjekny.
Wobchody Sakskeje maja po informacijach wikowanskeho zwjazka poslednjej měsacaj lěta něhdźe pjeć miliardow eurow wobrota. Po tutym puću nadźěłaja wobchody w tymle času hač do štwórćiny swojeho cyłolětneho wobrota. Tež w internetnym wikowanju wočakuja wobroty na niwowje lońšeho lěta. Wulke impulsy rozrosta pak njenastanu.
1 500 nowych štomow za Choćebuz
To a tamne (11.11.24)
Zaměrnje duchownych wobšudźiłoj staj bratraj-dwójnikaj w Francoskej. Za to je jeju sudnistwo w Le Havre zasudźiło. Hłowny skućićel bě so pola duchownych přizjewił, twjerdźo, zo je tón jeho zmandźelił a zo tči w pjenježnych wuskosćach. Druhdy wudawaše so skućićel jako policist a wulesći sej po tutym puću bankowe daty. Zo je so zaměrnje na duchownych měrił, jebak z tym wopodstatni, zo chcyše so za splažne znjewužiwanje wjećić.
Zajeli su policajskeho nawodu wotrjada za hospodarsku kriminalitu španiskeje narodneje policije. Muž je zhromadnje ze swojej mandźelskej pječa sam z drogami wikował, pjenjezy „płokał“ a so wobtykać dał. Při přepytowanju domu namakachu zastojnicy wjace hač 20 milionow eurow, kotrež běchu zdźěla w sćěnach schowane. W běrowje šefa policije nańdźechu dalši milion eurow.
Zmužitosć ludźi wuzběhnyła
Berlin (dpa/SN). Prezidentka zwjazkoweho sejma Bärbel Bas je zmužitosć ludźi w bywšej NDR wuzběhnyła, kotřiž su před 35 lětami, 9. nowembra 1989, murju mjez wuchodom a zapadom powalili. „Wuchodni Němcy su z měrniwej rewoluciju demokratiji w Němskej wulku słužbu wopokazali“, rjekny politikarka SPD dźensa w zwjazkowym sejmje. „Woni su tak tež wšemu swětej z přikładom za měrniwu rewoluciju. Bas na po pokaza, zo steji 9. nowember 1938 tež za surowosć nacijow.
Habeck chce kandidować
Berlin (dpa/SN). Robert Habeck chce Zelenych jako kanclerski kandidat do wólbneho boja wjesć. Tole je powěsćernja dpa w Berlinje zhoniła. Swoju kandidaturu chcyše Habeck w běhu dnja wozjewić. Oficialnje pomjenować chcedźa jeho na zwjazkowym zjězdźe přichodny pjatk we Wiesbadenje. Zeleni docpěwaja při woprašowanjach dwanaće procentow. Předsyda CDU Friedrich Merz rjekny: Zeleni maja znajmjeńša hišće humor.
Tesla jenož hišće třeći
