Awstriski zwjazkowy kancler Nehammer pola ruskeho prezidenta Putina

Wien (dpa/SN). Awstriski zwjazkowy kancler Karl Nehammer chcyše so dźensa w Moskwje z ruskim prezidentom Wladimirom Putinom zetkać. Nehammer je tak třeći zapadny politikar, kiž je so po wudyrjenju wójny k Putinej do Moskwy podał. Konserwatiwny knježerstwowy šef bě wčera wječor zjawnosć wo swojich planach informował, zo chcył z Putinom wo móžnym skónčenju wójny rěčeć. Rěčnik Krjemla Dmitrij Pjeskow je krótko po tym wobkrućił, zo je zetkanje wobeju politikarjow dźensa popołdnju w Moskwje planowane.

Hłowny zaměr jězby k Putinej je zarjadowanje humanitarnych pasmow, po kotrychž móhli ludźo wójnske kónčiny wopušćić, přiměr a dospołne wotkryće wójnskich złóstnistwow. Ukrainske knježerstwo wočakuje přichodne dny „wulku bitwu“ na wuchodźe kraja. Tuž je jara wažne, tajke pasma zarjadować. Nimo toho Nehammer rjekny, zo chcył dialog mjez Ukrainu a Ruskej spěchować. Wón nochcył Putinej „moralisce neutralnje“ napřećo stupić. „Rěčeć njerěka, so swojich pozicijow wzdać, nawopak, ja jemu swoju rjeknu.“

Dwanaće kandidatkow a kandidatow kóždehožkuli politiskeho směra, něhdźe 75 procentow wólbneho wobdźělenja a naposledk hišće trěbny rozsud z přidatnym wothłosowanjom (ani Charles de Gaulle njezamó so po wólbnej reformje z lěta 1962 w prěnim kole direktnje pře­sadźić) – w Francoskej njeje to runjewon njewšědne. Nětko dyrbja naši zapadni susodźa třeći raz postajić, hač přichodne prezidentstwo snano prawicarjam dowěrja. Byrnjež předsydka Rassemblement National (RN; do toho: Front National) krydu žrała a sej runja populistam po wšěm swěće pozicije politiskich přećiw­nikow přiswojiła („Wyše mzdy!“ „Mjenje dawkow!“ „Přirodoškit je domiznoškit!“), słuša jeje strona dale jasnje do ekstremistiskeho spektruma. Dotal je jeničce ­kandidat wotewrjenje rasistiskeje a za­klawsulěrowanje antisemitiskeje strony „Recon­quete (wróćobobyće)“ wólbne doporučenje za nju podał. Poměry to skoro kaž pola nas. Bosćan Nawka

Britojo, kotřiž rady pinguiny liča a kiž chcyli někotre měsacy w Antarktice žiwi być, móža so za cyle wosebite dźěło přizjewić. Organizacija Antarctic Heritage Trust pyta zajimcow za dźěło w přistawje Port Lockroy. Něhdyše wojerske zepěranišćo na kupje Goudier Island je wot lěta 2006 muzej a sobu najizolowaniša póstowa filiala swěta. Nadawk mustwa je, twarjenja hladać, pinguiny ličić a jich zawostajenstwa zrumować.

Kačka je sej nócnu kupjel z ćopłej wodu w jednej z Mnichowskich halowych kupjelow lubić dała. Sobudźěłaćerjo objekta zwěrjo pjatk rano w jednym z basenkow wuhladachu, wohnjowa wobora zdźěla. Wšitke pospyty, kačku z wody wuhnać, pak zwrěšćichu. Skónčnje móžachu přiwołani wohnjowi wobornicy zwěrjo popadnyć a do swobody pušćić. Kak bě kačka do kupjele přišła, njewědźa.

Jenož mało dnjow po kóncu wobmje­zowanjow koronapandemije dla měł diskusijny forum w Kamjencu přinošować, sej wo krokach do přichodnych tydźe­njow dorozumić.

Kamjenc (BG/SN). Fakt je, zo ličba ze­mrětych ličbu porodow we Łužicy jasnje přesahuje. Z tym problemom pak so we wjetšinje statow Europskeje unije bědźa. Na to skedźbni Manuela Reck­ling z krajneho statistiskeho zarjada w přednošku wo wuwiću ludnosće w Budyskim wo­krjesu. Wona poda zawod do diskusijneho foruma „Zazběh po pandemiji“ ze sakskim ministrom financow Hartmutom Vorjohannom. Přeprosył bě zapósłanc Sakskeho krajneho sejma Alojs Mikławšk (wobaj CDU) wčera do hosćenca na Kamjenskej Pastwinej horje. Ličby wujewja spad ludnosće, přednošowarka wuzběhny, jenož w dwurěčnych kónčinach Budyskeho wokrjesa je wuwiće pozitiwniše.