Hofreiter chce Putina nuzować
Berlin (dpa/SN). Politikar Zelenych Anton Hofreiter chce z dodawanjom ćežkich bróni Ukrainje ruskeho prezidenta Wladimira Putina nuzować, wo skónčenju wójny w Ukrainje jednać. „Dyrbi situacija nastać, w kotrejž režim w Ruskej spóznawa, zo swoje zaměry njedocpěje a zo je zwólniwy ke chutnym jednanjam“, rjekny předsyda wuběrka zwjazkoweho sejma za europske naležnosće rozhłosownikam. Ruska měła potom tež zwólniwa być „suwerenitu Ukrainy zaručić a so dalšich wójnskich planow wzdać“.
Je mjeztym wotwidźeć a připowědźene, zo Ruska jako přichodne republiku Moldawsku nadpadnje, Hofreiter rjekny. Hdyž po ćežkich brónjach tež přiwótřene embarga skutkuja, „potom budźe wójna tež režimej Putina pře droha“. Po měnjenju Hofreitera wobsteji ruske knježerstwo z ideologow a kleptokratow, kiž so na kóšty ludu wobohaćeja.
GEW žada sej miliardy za kubłanje
Essen (SN). Předsydka dźěłarnistwa za kubłanje a wědomosć (GEW) Maike Finnern je sej wčera žadała, zo měli 100 miliardow eurow wosebiteho zamóženja za kubłanje wužiwać. Z pjenjezami měli naprawy financować, kotrež polěpša runoprawnosć šansow w Němskej. „Samsne kubłanske šansy su rozsudne za wuwiće našeje towaršnosće a zmóžnjeja wobdźělenje a samo postajene w žiwjenju“, Finnern wčera na manifestaciji Němskeho zwjazka dźěłarnistwow w Essenje wuzběhny.
Předsydka GEW dale wujasni, zo chce amplowa koalicija kubłanske naprawy zwoprawdźić, wšako je to w koaliciskim zrěčenju předwidźane. Dale pak wona zwěsći, zo so nowe knježerstwo rady inscenuje. Wuznamne słowa pak měli tež zwoprawdźić. „Tak derje kaž plany klinča, tak mało so wo płaćiznach rěči, kotrež so za připowědźenymi naprawami chowaja“, wona wujasni. A hižo nětko po pjeć měsacach je wočiwidne, zo knježi w koaliciji njeměr. Předewšěm FDP sej ekstremnje wjele dowola.
Steja před wužadanjemi
Demonstraciju dźěłarnistwow 1. meje tež w Budyšinje wotměli
Budyšin (CS/SN). Demonstracija na wčerawšej 1. meji w Budyšinje steješe pod hesłom „Zhromadnje přichod wuhotować“. Prěni społnomócnjeny dźěłarnistwa IG metal wuchodna Sakska a předsyda wokrjesa Zwjazka němskich dźěłarnistwow wokrjesa Uwe Garbe je k tomu na Žitnych wikach rěčał. Do toho su čłonojo rejowanskeje šule Mühlmann fitnesorejowanski koncept Zumba předstajili. Přichod wuhotować zdobom woznamjenja, zo je so w dźěłarnistwach generaciska změna přewjedła, při čimž je so tohorunja mentalita změniła. Město toho, zo by so prjedy prajiło, zo so ničo změnić njeda, wěnuja so dźensa přichodej. Dale a bóle přistajeni rozsudźa, zo chcedźa w zawodach wostać a za dobre dźěło wojować. Při tym jedna so wo dźěłowu zhromadnosć z wulkim sebjewědomjom, kotraž sej wotpowědnu česćomnosć žada. Dźěłarnistwa pak steja před wulkimi wužadanjemi předewšěm nastupajo koronu a ukrainsku wójnu, kotraž wuwije so na humanitarnu katastrofu.
Plista Scholzej?
Sakske sudnistwa chětro zaběrane
Drježdźany (dpa/SN). Nimo koronapandemije su sćěhi dieseloweho wotpłunoweho skandala sakske sudnistwa 2021 chětro zaběrali. Po informacijach Sakskeho wyšeho krajneho sudnistwa (OLG) wučinješe skandal z 1 124 zapodatymi padami 43 procentow wšěch ciwilnych skóržbow. Mjeztym su jědnaće wosebitych senatow wutworili, kotrež tež tute pady wobdźěłuja, prezident Leon Ross zdźěli. Wyše krajne sudnistwo měješe něhdźe pjećinu wjace padow na blidźe hač lěto do toho. Mjeztym ličby zapodaćow na krajnych sudnistwach poněčim zaso woteběra. Cyłkownje su na OLG 966 padow nimo tych dieseloweho skandala dla zličili. Jedna so předewšěm wo skóržby kóštowych a namrěwstwowych naležnosćow dla. Nimo toho wobjednawaja 19 padow wotškódnjenjow předołhich sudniskich a přepytowanskich jednanjow dla.
Za čas pandemije pobrachowaše po informacijach Rossa sčasami wjace hač sto přistajenych, dokelž běchu schorjeli abo w karantenje. Při wšěm móžachu dźěłowu kmanosć sudnistwow zaručić a přewulkim zastatkam zadźěwać, Ross zdźěla.
Zaso přiběrace přenocowanja
To a tamne (02.05.22)
W nižozemskim Utrechće je štyrilětny hólčec wčera rano njewobkedźbowany z awtom swojeje maćerje njezbožo zawinował a do parkowaneju jězdźidłow zajěł, na čož wustróžany ćekny. Trochu zdaleny je šofer hólčeca wuhladał a policiju zawołał. Bórze na to dóńdźe pola zastojnikow pokazka na njezbožo z wopušćenym awtom. Jako policija z pomocu znački mějićelku jězdźidła wuslědźi, so runje tak pad z namakanym hólčecom wujasni, wšako bě to jeho mać.
Dokelž chcyše 80lětny šofer awta zražce z kóčku na kupje Usedom zadźěwać je jězdźidło na prawy bok wodźił a do betonoweho sćežora prasnył. Awto bu při tym chětro wobškodźene a tež 50lětny sobujěducy so zrani. Njezbožo je haćenje na dróze pola Heringsdorfa wuskutkowało. Što je so z kóčku stało je njeznate, ale po wšěm zdaću je wustróžana twochnyła.
Moskwa nochce koridor
Moskwa (dpa/SN). Ruska je žadanja za jednanjemi wo koridor za we woclowni Azovstal zawrjenych wotpokazała. „Prezident Putin je cyle jasnje rjekł: Ciwilisća smědźa hić, wojowarjo dyrbja zawod wopušćić a swoje brónje złožić“, zdźěli rěčnik Krjemla Dmitrij Pjeskow statnej powěsćerni Tass. Jim garantuja žiwjenje a strowotniske zastaranje, wjace pak nic. Cofnjenje jednotkow nochce Moskwa dowolić. Ukrainski prezident Wolodymyr Zelenskyj žada sej humanitarny koridor.
Scholz: Nadpad na demokratiju
Berlin (dpa/SN). Wot ruskeho prezidenta Wladimira Putina zahajena wójna njeměri so po měnjenju zwjazkoweho kanclera Olafa Scholza (SPD) jenož přećiwo Ukrainje, ale přećiwo demokratiji scyła. Putin nima jenož zaměr, Ukrainu zničić, piše Scholz w hóstnym přinošku w nowinje Welt. „Wójna měri so přećiwo wšemu, što demokratiju wučinja: Swobodźe, runohódnosći před zakonjom, samopostajowanju a čłowjeskej dostojnosći.“
Skrótša čas izolacije
