Kupja nowe bojowe lětadła
Berlin (dpa/SN). Zwjazkowe knježerstwo chce wojerske lětarstwo Zwjazkoweje wobory we wobłuku miliardy eurow wopřijaceho ponowjenskeho programa z nowymi bojowymi lětadłami F-35 z USA wobrónić. Mašiny twarca lětadłow Lockheed Martin maja mjeztym 40 lět wužiwane mašiny typa Tornado narunać. F-35 je najmoderniše bojowe lětadło swěta a móže tež atomowe brónje nosyć. Kupić chce Němska 35 tajkich.
Kritizuje planowane wolóženja
Berlin (dpa/SN). Něšto dnjow do skónčenja najwjace škitnych naprawow koronawirusa dla politiku zwjazkoweho knježerstwa přiběrajcy kritizuja. Předsyda załožby za škit pacientow Eugen Brysch rjekny nowinarjam: „Hdyž nowy zakoń tak schwala, kaž planowane, bě dźěło minjeneju dweju lět podarmo.“ Wot 20. měrca ma najwjace naprawow wotpadnyć. Sydomdnjowska incidenca je z 1 543 padami mjeztym nowy rekord docpěła.
1,8 milionow ćěkancow dóšło
Z pisanym programom su wčera w narodnym stadionje „Ptače ...
Přihotuja ofensiwu
Kijew (dpa/SN). Po informacijach ukrainskeho generalneho staba přihotuja ruske jednotki w kraju wjacore ofensiwy. Za to spytaja zdobyte pozicije skrućić, so z materialom zastarać a so přerjadować. Ručež je wšitko hotowe, wočakuja nadpady na Charkiw, Sumy a Kijew.
Po ruskim nadpadźe z raketami njedaloko mjezy k Pólskej rosće starosć, zo móhła so wójna w Ukrainje dale rozšěrić. Při nadpadźe na lětanišćo njedaloko Lwiwa je znajmjeńša 35 ludźi žiwjenje přisadźiło. Ruska twjerdźi, zo je „180 wukrajnych zóldnarjow“ moriła a wulke mnóstwa wukrajnych bróni zničiła.
Scholz Erdoğana wopytał
Berlin/Ankara (dpa/SN). Zwjazkowy kancler Olaf Scholz (SPD) je so dźensa na nastupny wopyt do Turkowskeje podał. W stolicy Ankarje wočakowaše jeho popołdnju prezident Recep Tayyip Erdoğan k rozmołwje. Hišće dźensa wječor wočakowachu Scholza zaso w Berlinje. Turkowska wobhladuje so w konflikće Ukrainy dla jako posrědkowar. Čłonski kraj NATO pěstuje wuske styki z Kijewom a Moskwu. Minjeny štwórtk běštaj so wonkownaj ministraj Ukrainy a Ruskeje, Dmytro Kuleba a Sergej Lawrow prěni raz wot spočatka wójny zetkałoj. Byrnjež rozmołwy bjez wuslědka wostali, ma je Turkowska za wulki diplomatiski wuspěch.
Je to mjeztym pjaty nastupny wopyt Scholza zwonka Europskeje unije po spřisahanju. Do toho bě so w USA, Ukrainje, Ruskej a Israelu jako nowy zwjazkowy němski kancler předstajił.
Planuja wolóženja energije dla
Berlin (dpa/SN). Jako reakciju na spochi přiběrace płaćizny energije je wicekancler Robert Habeck (Zeleni) nowy pomocny paket zwjazkoweho knježerstwa připowědźił. Podróšenja w cyłym energijowym wobłuku mnohich ludźi poražeja, rjekny minister za hospodarstwo a škit klimy powěsćerni dpa. „Ekstremne kóšty za tepjenje, ekstremne płaćizny miliny a ekstremne płaćizny bencina domjacnosće poćežuja, čim snadniše maja dochody, ćim bóle.“
Habeck planuje na jednym boku wolóženja pola miliny, ćopłoty a mobility. Nimo toho dyrbjało so na polu eficientnosće a lutowanja miliny a přetrjeby bencina něšto činić, mjez druhim z ponowjenjom starych tepjenskich připrawow.
Zwjazkowy financny minister Christian Lindner (FDP) je so za statny připłatk při tankowanju wuprajił. Kak wulki rabat budźe, njeje dotal hišće znate. Suma hodźała so při zapłaćenju wotćahnyć. Generelne zniženje nadhódnotoweho dawka na bencin, kaž sej to mnozy žadaja, Lindner dale wotpokazuje.
Za měr w Ukrainje demonstrowali
To a tamne (14.03.22)
Protestujo přećiwo horendnym płaćiznam bencina a swarjacych šoferow dla je wobhospodarjer tankownje w Francoskej tankownju zawrěł. „Spjećuju so liter ćěriwa za 2,50 eurow předawać, njepodpěruju padustwo“, napisa tankownik Oliver Thomas na papjerku, kotruž je na tankowni we wsy Saint-Paulien wupowěsnył. „Njemóžu produkt za 2,47 eurow předawać, derje wědźo, zo sam wjace hač 0,04 centy na liter njezasłužam“, wón doda.
Krej na sćěnje wjaceposchodoweho domu je w Erfurće zasadźenje wohnjoweje wobory zawiniła. Wobydlerjo so starosćachu, dokelž njebě 22lětna wobydlerka durje wočiniła. Na to wohnjowi wobornicy durje namócnje wotewrěchu a naležnosć rozrisachu: 22lětna bě na balkonje krawe nutriny za swoje psy w dźěratym sudobju składowała. Zasadźenje wobornikow a nowe durje dyrbi wona nětko zapłaćić.
Wopory terora wopominali
Berlin (dpa/SN). Zwjazkowy justicny minister Marco Buschmann nochce pačenje towaršnosće přez terorizm akceptować. „Njemdrosći a błudej so spjećujemy, hdyž hromadźe stejimy“, rjekny politikar FDP składnostnje dźensnišeho narodneho wopominanskeho dnja za wopory teroristiskeje namocy. Chorhoje na twarjenjach Zwjazka wisaja dźensa połwysoko. Dźeń běchu po islamskich teroristiskich nadpadach w Madridźe lěta 2004 ze 191 smjertnymi woporami pomjenowali.
Rěča wo biologiskich brónjach
New York (dpa/SN). Bjezstrašnostna rada UNO zaběraše so dźensa po woli Ruskeje z biologiskimi brónjemi, kotrež USA pječa w Ukrainje produkuja. Wurjadne posedźenje měješe so popołdnju zahajić. Dotal njeje Ruska za wone chemiske labory w Ukrainje žane dopokazy předpołožić móhła. Tež UNO ničo wo biologiskich brónjach njewě. USA maja twjerdźenja Ruskeje za propagandu a zamylenski manewer.
Wuradźuja wo sćěhach wójny
