Drježdźany (dpa/SN). Tež Sakska dóstanje po lěta trajacej diskusiji zakoń wo runostajenju. Krajny sejm je wčera po dwěmaj lětomaj wothłosowanja naćisk knježerstwoweje koalicije wo runostajenju žonow a muži w zjawnej słužbje po zdźěla kontrowersnej debaće z wjetšinu schwalił – přećiwo hłosam AfD. Justicna ministerka Katja Meier (Zeleni) rjekny, zo přinjese zakoń wjace sprawnosće mjez splahomaj w statnym a komunalnym zarjadnistwje. Wona je sej wěsta, zo je ­zakoń tež předewzaćam z přikładom. ­Zakoń njeje „žana prowokacija“, rjekny Meyer po zdźěla raznej kritice z rjadow frakcije AfD. Wón płaći wot 1. januara 2024 a naruna 30 lět stary zakoń wo spěchowanju žonow. Zakoń zmóžnja fleksibelne dźěłowe časy a polěpša móžnosće žonow, za swoje prawa skoržić.

New York (dpa/SN). Zwjazkowe knježerstwo je na hłownej zhromadźiznje UNO w New Yorku mjezynarodne zrěčenje za škit morjow swěta podpisało. Dojednanje je škrička nadźije za morja tutoho swěta, za ludźi swěta, ale tež za zjednoćene narody, rjekny wonkowna ministerka Annalena Baerbock wčera při zhromadnym nowinarskim terminje z wobswě­towej ministerku Steffi Lemke (wobě ­Zeleni) w New Yorku. Něhdźe 80 statow bě zrěčnje podpisało. Z nim je móžno, w přichodźe na swětowych morjach škitne pasma postajić a hospodarske aktiwity w morjach pruwować, hač wotpowěduja směrnicam přirodoškita.

Rozestajenje na hłownej zhromadźiznje bjezstrašnostneje rady UNO

New York (dpa/SN). Ruski wonkowny minister Sergej Lawrow je z raznymi wumjetowanjemi zapadej napřećo na narěč ukrainskeho prezidenta Wolodymyra ­Zelenskeho w bjezstrašnostnej radźe UNO reagował. W retorice zapadnych njepřećelow Ruskeje su stajnje zaso słowa słyšeć kaž „inwazija“, „aneksija“ abo „agresija“, ale žane słowo wo přičinach problema, rjekny Lawrow wčera wječor w bjezstrašnostnej radźe UNO w New Yorku. We wobłuku wobšěrneho stawizniskeho pojednanja wupraji so Lawrow wo wuwićach na 2014 wot Ruskeje wobsadźenej Krimje a wo jednanjach ze zapadom w tutej naležnosći. Zdawa so, zo ma zapad strach před fachowej diskusiju, rjekny Lawrow, wumjetujo zapadej demagogiju a „kompleks mudrišeho“. Zapad powołujo so na normy a zasady, hdyž jeho potrěbnosćam wotpowěduja. Tole pak je k nowym napjatosćam wjedło. Lawrow zapadne kraje namołwješe, wšitke postajenja charty UNO spjelnić.

Baku (dpa/SN). Po dobyću azerbajdźanskeje armeje w najnowšich wojowanjach wo kónčinu Hórskeho Karabacha su zastupnicy Karabachskich Armenjanow k dojednanjam dojěli. Z wida awtoritarneho nawodnistwa w Baku ma při zetkanju w měsće Yevlax wo „reintegraciju“ Hórskeho Karbacha do Azerbajdźana hić, statna powěsćernja Azertac dźensa rozprawješe. Jako posrědnicy přitomni su w kónčinje prezentni ruscy wojacy.

Azerbajdźan bě wot Armenjanow wobsydlenu kónčinu Hórskeho Karabacha wutoru z raketami a artileriju nadpadnył. Wčera běchu so wojersce podležani Armenjenjo podali. Mnozy so nětko boja, zo jich z domizny wućěrja abo – jelizo wostanu – zo stanu so z woporom azerbajdźanskeje namocy. Při wojowanjach minjenych dnjow je znajmjeńša 200 ludźi žiwjenje přisadźiło.

Něhdyšej sowjetskej republice Azerbajdźan a Armeniska hižo wjele lět wo Hórski Karabach wojujetej. Přez wolij zbohatnjeny a sylniši Azerbajdźan je lěta 2020 wulke dźěle kraja wróćo zdobył. Armenjenjo čuja so wot Ruskeje a knježerstwa w Eriwanje přeradźeni.