Wu Jingyu, chinska dobyćerka olympiskeje złoteje medalje w bojowym ...
Wöller za razniše pokuty
Berlin/Drježdźany (dpa/SN). Sakski nutřkowny minister Roland Wöller žada sej razniše chłostanja za nadpady na policistow. „Minimalne pokućenje ma znajmjeńša na poł lěta jastwa wučinjeć“, rjekny politikar CDU wčera nowinarjam. Chłostanja běchu minjenu wólbnu dobu drje hač na pjeć lět jastwa přiwótřili. Ale pjenježne pokuty jako najsnadniše chłostanje hižo njedosahaja, „trjebamy znajmjeńša poł lěta jastwa“.
Sewjerorynsko-westfalski nutřkowny minister Herbert Reul (CDU) žada sej nimo toho wjace towaršnostneje podpěry policistam. „Policisća chcedźa wědźeć, zo za nich něšto činimy!“ K tomu słuša tež lěpše wuhotowanje policije. Přepytowanje prawicarskeho ekstremizma mjez zastojnikami, štož bě nutřkowna ministerka Nancy Faeser (SPD) namjetowała, nutřkowni ministrojo CDU/CSU porno tomu skeptisce wobhladuja.
Poručeja Novovax
Za wolóženja hišće přezahe?
Berlin (dpa/SN). Zwjazkowy kancler Olaf Scholz nima wuměnjenja wolóženja w koronakrizy nastupajo hišće za spjelnjene. „Połoženje njeje za tym“, rjekny politikar SPD wčera wječor w telewiziji ZDF. Hladajo na Dansku, hdźež su faktisce wšitke wobmjezowanja zběhnyli, rjekny Scholz: „Myslu sej, zo činimy to, štož je za wobydlerjow prawe: škitamy jich žiwjenje a strowotu z naprawami, kiž smy zhromadnje z krajemi a zwjazkowym sejmom wobzamknyli a kotrež wulki dźěl wobydlerjow Němskeje wita.“
Mjeztym je so zwjazkowa lěkarska komora na schodźenkowy plan wuprajiła, zběhnyć wobmjezowanja koronawirusa dla. Jeli so połoženje infekcijow tak wuwiwa, kaž wot fachowcow připowědźene, budu ličby nowych padow wot kónca februara poněčim woteběrać“, rjekny prezident komory Klaus Reinhardt nowinarjam. „Zwjazk a zwjazkowe kraje dyrbjeli tohodla přihotowane być a po móžnosći hižo nětko tajke schodźenkowe plany zdźěłać, kotrež móhli potom nadźijomnje spěšnje zwoprawdźić.
To a tamne (03.02.22)
Psyčk z mjenom Jucy je w sewjerorynsko-westfalskim Herne šěsć hodźin trajace zasadźenje wohnjoweje wobory a Techniskeho pomocneho skutka zawinił. Wokoło 20 hodź. bě žona telefonisce zdźěliła, zo je so jeje lubušk Jucy w jamje liškow abo zajacow zminył. Na to pytachu pomocnicy z łopaćemi, bagrom a samo kanalowej kameru za nim, bjez wuspěcha. Nazajtra namakachu psyčka w zwěrjatowni, hdźež je jeho něchtó wotedał. Hdźe bě jeho wuhladał, wón njepřeradźi.
Kuriozne njezbožo z dźěćacym jězdźidłom bobbycarom w münsterlandskim Ahausu je wujasnjene. Před tydźenjomaj bě tam dźěćo do žony zrazyło, kotraž na to padny, so zrani a sej cholowy roztorha. Zrjadować pak to njemóžachu, dokelž bě mać małeho šofera žonje mylnje wopačne telefonowe čisło dała. Z pomocu swědka su ju mjeztym wuslědźili.
Daniel Günther wabi wo škit mjeńšin
Kiel (SN/JaW). Schleswigsko-holsteinski ministerski prezident Daniel Günther (CDU) je sej póndźelu w Kielu na widejowej konferency z prezidentku komisijie EU Ursulu von der Leyen wjace škita a spěchowanja za narodne mjeńšiny a jich rěče w Europje žadał. To pisatej schleswigsko-holsteinske knježerstwo a Federalistiska unija europskich narodnych mjeńšin (FUEN) na swojich internetnych stronach.
Minister nadźija so na měrc
Berlin (dpa/SN). W diskusiji wo móžnym zběhnjenju wobmjezowanjow koronawirusa dla ma zwjazkowy justicny minister Marco Buschmann (FDP) za předstajomne, zo hodźeli so naprawy srjedź měrca cofnyć. Wuměnjenje pak je, zo ličby infekcijow, kaž wot Roberta Kochoweho instituta wočakowane, wot srjedź februara zaso woteběraja. Druzy, kaž ministerski prezident Sewjerorynsko-Westfalskeje Hendrik Wüst (CDU), před tym warnuja. Nahubniki a hygienowe naprawy su po jeho měnjenju dale nuznje trěbne.
Maja serum za małe dźěći
Washington (dpa/SN). Němske předewzaće Biontech je zhromadnje ze swojim ameriskim partnerom Pfizer próstwu wo nuzowe přizwolenje swojeho seruma přećiwo koronawirusej za dźěći pod pjeć lětami zapodało. Nuzowe přizwolenje ma za dźěći wot šěsć měsacow płaćić. By to prěni serum za dźěći teje starobneje skupiny w USA był. Dotal njeje hišće jasne, kelko dozow seruma budu trjebać.
Planuja přiražku za tepjenje
Pomocnicy pytaja w ekuadorskej stolicy Quito dale za woporami lawiny ...
Pólski bencin tuni – tankownje we wulkej nuzy
Berlin/Drježdźany (dpa/SN). W Pólskej tankować je wot wčerawšeho hišće tuńše hač dotal – kraj je wot 1. februara dawk na ćěriwa znižił. Zwjazk wobhospodarjerjow garažow a tankownjow na sewjerowuchodźe Němskeje z toho wuchadźa, zo tankowanski turizm do směra na susodny kraj hišće raz widźomnje přiběra. Nadróžny wobchad přez mjezu je hižo minjene dny jasnje přiběrał, rjekny předsyda zwjazka Hans-Joachim Rühlemann powěsćerni dpa. Z dokładnym posudźowanjom połoženja liči Rühlemann přichodny kónc tydźenja. Ćěriwo móhło potom w Pólskej wo 65 centow tuńše hač w Němskej być. Zwjazk zastupuje w Berlinje a we wuchodoněmskich zwjazkowych krajach něhdźe 300 tankownjow.
Pólske knježerstwo je dawk na diesel a bencin wot 1. februara nachwilnje wot 23 na wosom procentow znižił. Naprawa ma ludźom w kraju hladajo na sćěhi inflacije pomhać.
