To a tamne (25.02.22)
Psa na lisćinje čłonow su francoscy konserwatiwni republikanojo při wólbach swojeho kandidata za prezidentske wólby 10. apryla stejo měli. Jedyn z čłonow bě w korčmje mysličku zrodźił a swojeho psa Clovisa pod swojej adresu napisał a samo čłonski přinošk zapłaćił. Nowinarjam bě napadnyło, zo maja republikanojo třoch zemrětych a psa na lisćinje. Čłon na to swój „žort“ přizna.
Do jamy błóta padnyła je žona, jako so w lěsu w delnjobayerskim Egingu wuchodźowaše, a njemóžeše so hižo sama wuswobodźić. Wohnjowi wobornicy su 60lětnu skónčnje z dźěry njedaloko Passauwa wućahnyli. Cyłu hodźinu dyrbješe žona w štyri kwadratne metry wulkej dźěrje wutrać a wołaše wo pomoc. Přemjerznjenu dowjezechu ju do chorownje. Dźěra bě drje přez dešć minjenych dnjow nastała.
Třoch wojakow morili
Damaskus (dpa/SN). Při nalěće israelskich wojerskich lětadłow w Syriskej su třo wojacy žiwjenje přisadźili. Krótko po połnocy běchu objekty njedaloko stolicy Damaskusa z raketami wobtřěleli, syriska powěsćernja Sana zdźěla. Israelska armeja so k rozprawam njewupraji. Israel chce z nalětami w susodnej Syriskej wliw Irana wobmjezować, kotryž tam wobrónjene milicy podpěruje.
Wolij so raznje podróša
New York/London (dpa/SN). Płaćizny zemskeho wolija su dźensa po nadpadźe Ruskeje na Ukrainu raznje rozrostli. Barrel (159 litrow) sewjeromórskeje družiny Brent płaćeše prěni króć po lěće 2014 wjace hač sto dolarow. Tež druhe družiny, kaž Texas Intermediate, so chětro podróšichu. Ruski prezident Wladimir Putin bě dźensa rano nadpad na wuchodnu Ukrainu přikazał. Zapad to wótrje zasudźa a připowědźi dalše sankcije.
Žadaja sej nowe spěchowanje
Pólscy ratarjo, čłonojo konserwatiwneho a jara aktiwneho agrarneho ...
Pomoc droheje energije dla – naprawy šwikane
Berlin (dpa/SN). Planowany paket wolóženjow zwjazkoweho knježerstwa jako wurunanje za stupace płaćizny energije žněje tójšto kritiki. Paritetiski dobroćelski zwjazk ma jón za socialnje njesprawny. Podobnje zwurazni to wobswětoškitna organizacija Greenpeace. Tež opozicija w zwjazkowym sejmje rěči wo njedosahacych naprawach.
Koalicija SPD, Zelenych a FDP bě so wčera wječor na to dojednała, popłatk za ekomilinu, dotal dźěl płaćizny miliny, hižo spočatk julija zběhnyć. Pawšalu za powołanskich dojězdźowarjow wot januara zwyša. Bjezdawkowu sumu dochodoweho dawka zwyša wo 200 na nětko 1 200 eurow. Wot chudoby potrjechenym dźěćom wupłaća wot 1. julija měsačnje 20 eurow. Přijimarjam Hartza IV a zakładneho zawěsćenja wupłaća jónkrótnje sto eurow.
Póstnicy pod krutymi prawidłami
Köln/Düsseldorf (dpa/SN). W porynskich kónčinach su dźensa w 11.11 hodź. nadróžny karnewal zahajili – koronapandemije dla hinak hač zwučene. Sewjerorynsko-Westfalska je městam dowoliła, tak mjenowane nałožkowe pasma zarjadować. Tam smědźa póstnicarjo pod prawidłom 2G+ swjećić.
W Kölnje wočakowachu tysacy wobdźělnikow: Tamniše měšćanske zarjadnistwo bě cyłe město jako „nałožkowe pasmo“ deklarowało. Tak płaći za karnewalistow po cyłym měsće 2G+: To rěka, zo dyrbja wotchorjeni abo dwójce šćěpjeni być a zo trjebaja přidatny negatiwny test, chiba třeće šćěpjenje.
W korčmach dyrbja trójce šćěpjeni hišće aktualny spěšnotest předpołožić. Porjadowy zarjad chce dodźerženje z městnami kontrolować a w padźe ranjenja bolostne pokuty wukazać. Winowatosć, pod hołym njebjom nahubnik wužiwać, je Köln zběhnył, tež w hosćencu njetrjebaja ludźo za čas póstnic škit před hubu a nosom wužiwać. Přiwšěm su namołwjeni kedźbować.
Z wójnu přestać!
Wo mordarstwje znowa jednaja
Bratislava (dpa/SN). Štyri lěta po zamordowanju wotkrywanskeho žurnalista Jána Kuciaka a jeho slubjeneje Martiny Kušníroveje chcedźa w Słowakskej přećiwo pozdatnemu nadawkidawarjej znowa sudnisce jednać. Kaž rěčnica sudnistwa Katarina Kudjáková powěsćerni dpa potwjerdźi, zahaja nowy proces přećiwo milionarej Mariánej Kočnerej a sobuskućićelce přichodnu póndźelu na wosebitym sudnistwje za organizowanu kriminalitu w Pezinoku wuchodnje Bratislavy.
Tehdy 27lětny inwestigatiwny žurnalist a jeho slubjena buštaj 21. februara 2018 w swojim domje we wsy Vel’ká Mača zatřělenaj. Hakle po jeho smjerći wozjewjene reportaže žurnalista wo splećenju politiki a hospodarstwa zbudźichu masowe protesty, na čož dyrbješe słowakske knježerstwo wotstupić. W procesu přećiwo mordarjej Kuciaka běchu Kočnera a jeho komplicowku Alenu Zsuzsovu pobrachowacych dopokazow dla wuwinowali, štož je mjezynarodnje wulke rozhorjenje wuskutkowało. Nětko dyrbitaj Kočner a Zsuzsová, kotrajž druhich njeskutkow w jastwje sedźitaj, znowa před sudnistwo.
To a tamne (24.02.22)
Kaž bychu sej to dorěčeli: Předwčerawšim, 22. februara 2022, je we woběmaj uniwersitnymaj chorownjomaj Sakskeje dokładnje 22 dźěći na swět přišło, jědnaće w Lipšćanskej uniwersitnej klinice a jědnaće w Drježdźanskej. Tak bě druha palencowa ličba woblubowaniša hač prěnja 2.2.22. Tón dźeń bě so w Lipšćanskej klince pjeć ćěšenkow narodźiło, w Drježdźanskej wosom.
Wikowarja falšowanych šćěpjenskich wupokazow je policija w Berlinje lepiła. 19lětny bě z bydlenja swojeju staršeju w měšćanskim dźělu Kreuzberg z wopačnymi dokumentami wikował. Wón bě wupokazy z nalěpkami, lěkarskim kołkom a podpismom w interneće poskićał. Jako chcyše štyri tajke šćěpjenske wupokazy na Dieffenbachowej přepodać, jeho zastojnikaj zaještaj. W bydlenju namakaštaj na to kołki a nalěpki.
Zmužite modlitwy za Klětno
Wustajeńca w ewangelskej cyrkwi dopomina na wuchowanje wsy 1990
Časnik na transparenće pokazuje pjeć do dwanaćich. Widźeć je ratarski statok wosrjedź zelenje. Bjez přestaća bližo so jemu hoberski brunicowy bager. „Što je wažniše? Wuhlo abo domizna?“, takle rěkaše prašenje młodeje wosady 1988 na baneru z třoch dźělow wobstejacym. W Klětnjanskej ewangelskej cyrkwi wón hišće dźensa na hrožace wotbagrowanje wsy přez Bjerwałdsku brunicowu jamu dopomina. Horjeka w loži Božeho domu pokazuje wustajeńca tuchwilu tehdyše swědki časa. „Klitten – Klětno 1990“ rěka jeje hesło. Je to fotowa a filmowa dokumentacija wo wuchowanju Klětnoho před 32 lětami a nawjazuje na dźaknu nutrnosć w tamnišej Klětnjanskej ewangelskej cyrkwi 6. februara.
Konkretne plany wobstali
Wot dźensa płaća wolóženja
Drježdźany (SN). Wolóženja nastupajo postajenja koronapandemije dla je sakske knježerstwo wčera wobzamknyło, dźensa hižo su wone płaćiwosć za dobu hač do 3. měrca nabyli.
Tak njejsu zetkawanja, na kotrychž so jeno šćěpjeni abo wustrowjeni wobdźěleja, po ličbje wjace wobmjezowane. Je-li na priwatnym zetkanju znajmjeńša jedna nješćěpjena wosoba pódla, płaći wobmjezowanje na jednu domjacnosć plus dwě wosobje z dalšeje domjacnosće. Dotalne rjadowanje přiješe jednu domjacnosć a jednu wosobu.
Za chowanja a zmandźelenja njeje ličba wobdźělenych dlěje wobmjezowana, při čimž je dale trjeba dopokaz po prawidle 3G předpołožić.
Tele wolóženja płaća, doniž njejsu definowane wućeženje łožow w chorownjach schodźenk přećeženja docpěli: W drobnowikowanju dopokaz 3G wotpadnje, nošenje FFP2-nahubnika wostanje winowatosć. 3G płaći dale w muzejach, wopomnišćach, wustajeńcach a nutřkownych rumnosćach zwěrjencow a při wužiwanjach sportowych připrawow pod hołym njebjom (wšudźe dotal 2G).
