Berlin/Washington/Moskwa (dpa/SN). Po swojim wčerawšim nastupnym wopyće pola prezidenta USA Joewa Bidena je zwjazkowy kancler Olaf Scholz (SPD) dźensa ze swojimi prócowanjemi wo diplomatiske rozrisanje konflikta Ukrainy dla pokročował. W běhu dnja chcyše so wón z francoskim prezidentom Emmanuelom Macronom a pólskim prezidentom Andrzejom Dudu k rozmołwam zetkać. Macron bě wčera w Moskwje a Kijewje rozmołwy wjedł. Po rozmołwje z ruskim prezidentom Wladimirom Putinom bě Macron přeswědčeny, zo je diplomatiske rozrisanje napjatosćow w Europje móžne. Putin zapadej wumjetowaše, zo tutón napjatosće wokoło Ukrainy wužije, zo by antirusku politiku šěrił.

Wonkowna ministerka Annalena Baerbock (Zeleni) chcyše so na frontowej liniji mjez Ukrainu a ruskimi separatistami wo połoženju wobhonić.

Demonstracije přećiwnikow politiki korony dla před kubłanišćemi

Drježdźany (dpa/SN). Ličba politisce motiwowanych njeskutkow na šulach Sakskeje je dale woteběraca. Tole wuchadźa z wotmołwy krajneho knježerstwa na małe naprašowanje politikarki Lěwicy Kerstin Köditz w krajnym sejmje. Po tym su loni cyłkownje 53 tajkich njeskutkow registrowali. We wšitkich padach su přepytowanja zahajili. Lěta 2020 bě jich 77 padow było, lěto do toho 105.

„Po statistice jedna so přewažnje wo tak mjenowane propagandowe delikty kaž našćuwanje ludu abo wužiwanje zakazanych symbolow. Za tym chowaja so po dotalnych nazhonjenjach nacionalsocialistiske insignije a neonacistiske parole, kotrež so wočiwidnje stajnje zaso na zakładnych šulach jewja“, Köditz rjekny.

Diplomatiske kanale napjateho połoženja konflikta Ukrainy dla so žela. Za zapad z USA a NATO na čole wostanje wažne, ćišć na Rusku wukonjeć. Znata šema dale płaći, zo winik na wuchodźe tči. Wobhladaš-li sej, što je po wčerawšich zetkanjach we Washingtonje, w Kijewje a Moskwje zjawnosć docpěło, pytnješ jenož pola francoskeho prezidenta Macrona wěste zrozumjenje za strachi Ruskeje nastupajo wójsko NATO před jeje mjezu. Zo zapad skónčnje z Ruskej rěči njeje tuž wuspěch zaměrneho diplomatiskeho postupowanja partnerow na samsnej runinje, ale jeničce poslednjej šansy dołžene, zo k najhóršemu njedóńdźe. Hišće pak płaća ­dogmy pakta NATO wjace hač wěstotne zajimy kraja, kotryž dyrbješe dwójce w swojich stawiznach surowe zaničowanja ze zapada na swojim teritoriju znjesć. Wo krutej woli za europsku měrowu architekturu z Ruskej njemóže dale rěč być. Jednaja-li pak diplomaća strózbje dosć, hodźała so tajka zawěsće docpěć. Axel Arlt

Dźiwje swinjo na konopeju je wobydlerku w sewjerorynsko-westfalskim Hagenje njemało nastróžiło a zasadźenje policije zawinowało. Něhdźe 60 kilogramow ćežka wurosćena ranca bě so přez terasowe durje do domu zadobyła, stwu přeborkała a so skónčnje lehnyła. Policistam dyrbješe žona při telefonje potwjerdźić, zo nježortuje. Zastojnicy wołachu hajnika, kiž zwěrjo do swobody pušći.

Drogi susoda w swojim bydlenju składowała je rentnarka w Rüsselsheimje pola Darmstadta. 1,4 kilogramy kokaina, hašiša, marihuany a 12 000 eurow chowaše 70lětna w kófru. Policija w Darmstadtće z toho wuchadźa, zo žona wědźeše, zo jeje 35lětny susod z drogami wikuje. Přećiwo woběmaj su sudniske jednanje zahajili. Zastojnicy běchu kófer našli, po tym zo njeběchu w bydlenju 35lětneho tak derje kaž žane drogi namakali.