Kritizuje špatny management
Zwjazk zastojnikow žada sej modernizaciju zjawneje słužby w Němskej
Berlin (dpa/SN). Zwjazk zastojnikow Němskeje (dbb) wobswědča Zwjazkej a zwjazkowym krajam zahubne wuswědčenje nastupajo krizowy management w koronapandemiji. Ludźo buchu ze „so spřećiwjacymi a bjezzmysłowymi naprawami zawjerćani“, rjekny předsyda dbb Ulrich Silberbach wčera na lětnym zjězdźe w Berlinje. Při tym nasta po jeho słowach zaćišć, „zo su w tutym kraju kóžde dźěćace narodniny lěpje organizowane hač statny krizowy management“.
Silberbach politice wumjetuje, zo so w swojim dźěle wotpohladnje dliji a zo so za „čorne nule“ hori. Tohodla su lěta dołho zapasli, zarjadnistwa na krizy přihotować. Tak so tež nichtó dźiwać njesmě, „hdyž ma Marokko šćěpjenje lěpje w horšći hač my“.
Wostańmy wěcowni
Hišće žane wuslědki za přistajenych Bofrost w regionje
Delnja Hórka (UM/SN). Tež druhe koło tarifowych jednanjow za stejnišćo předewzaća Bofrost w Malešanskej gmejnje je so bjez wuslědka zakónčiło. Po informacijach posłužboweho dźěłarnistwa ver.di njeje ze stron dźěłodawarja poskitk předležał. Ver.di žada sej připóznaće płaćiwych tarifowych zrěčenjow za wulko- a wonkowne wikowanje Sewjerorynsko-Westfalskeje tež na sakskich stejnišćach zwoprawdźić. Nimo stejnišća Malešanskeho wjesneho dźěla Delnja Hórka stej tež zawodaj w Delitzschu a rudnohórskim Adorfje potrjechenej. Šoferojo, kotřiž produkty Bofrost hnydom z awta předawaja, zasłužeja w Sakskej wob měsac něhdźe 400 eurow mjenje hač kolegojo na zapadźe Němskeje, kaž dźěłarnistwo informuje.
To a tamne (11.01.22)
Homoseksualne amplowe poriki maja wot tohole tydźenja w Braunschweigu za wjace tolerancy wadźić. Cyłkownje wosom amplowych mužikow su ze štyrjomi žónskimi a štyrjomi muskimi porikami z małej wutrobičku narunali. Znački maja „signal tolerancy, wotewrjenosće a akceptancy jenakosplažneje lubosće być“, rjekny wyši měšćanosta Thorsten Kornblum (SPD) k zahajenju akcije.
Přemało spara a napinacy šulski dźeń stej wosomlětnemu pachołej w sewjernej Němskej zjawne pytanje policije wunjesłoj. Hólčec bě po šuli njedaloko Kiela do busa zalězł, doma pak njedojěł. Tak informowaštaj staršej policiju, kotraž zjawnje za nim pytaše. Busowy šofer je hólca skónčnje namakał – spjaceho w zadnim dźělu busa. Policija wosomlětneho na to domoj dowjeze.
Bamž: Solidarita njeparujomna
Vatikan (B/SN). Tradicionalne silwesterske modlenje w Romskej Pětrowej cyrkwi je dekan kardinalneho kolegija Giovanni Battista Re swjećił. Bamž Franciskus drje bě přitomny a je tež sam prědował, ale strowotniskich přičin dla je nadawk cyłeje ceremonije kardinalej přepodał. W swojim prědowanju bamž wuzběhny, zo koronapandemija „začuće zamylenosće po cyłym swěće zesylnja“.
Zetkanje Taizé w Rostocku
Hamburg/Turin (B/SN). Rozsud za kóždolětne zetkanje na proze do noweho lěta je kónc decembra Taizéske ekumeniske zhromadźenstwo mnichow wozjewiło. Prěni raz njebudźe městnosć žana europska metropola. „Tak je region wokoło Rostocka wulka šansa“, praji farar Bad Doberana Albrecht Jax, kiž bě město Rostock namjetował. Dale wón wuzběhny, zo budu křesćenjo a njekřesćenjo z cyłeje wokoliny zapřijeći, tež městne sportowe towarstwa, wohnjowe wobory, zwjazki ludoweje solidarity atd. Zaměr zetkanja je zeznajomić so z cyrkwinskej situaciju hosćićelskeho regiona a zeznać hosćićelske swójby.
Nowe partnerstwo nabožinow
Baerbock: Rom wažny partner
Berlin/Rom (dpa/SN). Zwjazkowa wonkowna ministerka Annalena Baerbock je italske knježerstwo jako wažneho zwjazkarja noweje amploweje koalicije SPD, Zelenych a FDP wuzběhnyła. Klimje tyjacy přetwar hospodarstwa, solidaritu w pandemiji a wutworjenje europskeho azyloweho systema nastupajo mamy w Romje dobrych zwjazkarjow“, rjekny politikarka Zelenych dźensa do wotlěta do Roma. Tam wočakowaše ju kolega w zastojnstwje Luigi di Maio k rozmołwam.
Mortwi při wohenju
New York (dpa/SN). Při wohenju w bydlenskim domje w New Yorku je znajmjeńša 19 ludźi žiwjenje přisadźiło. Mjez smjertnymi woporami je dźewjeć dźěći, kaž město zdźěli. Dalši wobydlerjo so zranichu, někotři su hišće w kritiskim stawje. Je to jedna z najwjetšich wohnjowych katastrofow w młódšich stawiznach města. New-Yorkski měšćanosta Eric Adams rěčeše wo „wulkej tragediji“.
Wojerski zwjazk wuradźuje
Sakska Šwica w kóždym počasu wabi, tež w zymskim. Hinak hač w ...
Rekordny staw inflacije
Luxemburg (dpa/SN). Inflacija w europasmje je kónc decembra dalši rekord docpěła. Płaćizny za přetrjebarjow běchu w decembru wo pjeć procentow wyše hač lěto do toho, kaž statistiski zarjad Eurostat w Luxemburgu informuje. Je to najwyša inflaciska kwota po zawjedźenju eura w lěće 2002. W nowembru wučinješe wona 4,9 procentow.
Rozrost płaćiznow w decembru bě šesty za sobu. Hłownje wina na stupacych płaćiznach w krajach ze zhromadnej měnu běchu spochi přiběrace kóšty za energiju. Te běchu w decembru 26 procentow wyše hač lěto do toho. Zežiwidła podróšichu so wo 3,2 procentaj, posłužby wo 2,9 procentow.
Najsylniša bě inflacija kónc lěta 2021 w baltiskich krajach. W Estiskej bě rozrost płaćiznow z dwanaće procentami najwjetši. Slědujetej Litawska z 10,7 a Letiska ze 7,7 procentami. Najniše bě podróšenje na kupje Malta z 2,6 procentami. Němska zaběra w europskim přirunanju z 5,7 procentami srjedźne městno wšěch krajow z eurom. Srjedźodobny zaměr Europskeje centralneje banki (EZB) dweju procentow su we wšěch krajach europasma překročili. EZB z tym liči, zo płaćizny w běhu lěta zaso woteběraja.
Lauterbach: Dalše naprawy trěbne
Berlin (dpa/SN). Zwjazkowy minister za strowotnistwo Karl Lauterbach wočakuje, zo su w boju přećiwo warianće koronawirusa omikron dalše naprawy trěbne. Wot Zwjazka a zwjazkowych krajow dojednane prawidło „2G-plus“ w gastronomiji a nowe prawidła karanteny mjenowaše politikar SPD wčera wječor w telewiziji ARD wuspěch. „Sym sej wěsty, zo nam to pomha.“ Zdobom wón doda, zo drje naprawy njedosahaja, omikron přewinyć. „Ličby dale přiběraja. Tuž budu dalše naprawy trěbne, jeli tak daloko budźe. Tuchwilne naprawy su najprjedy raz wažna kročel doprědka.“
Zwjazk a kraje běchu so minjeny pjatk dojednali, prawidło „2G-plus“ w hosćencach, kofejownjach a korčmach nałožować. Po tym maja tam jenož hišće šćěpjeni a wustrowjeni z přidatnym negatiwnym koronatestom kaž tež ludźo z třećim šćěpjenjom přistup.
Politikar Zelenych Janosch Dahmen w telewiziji ZDF njewuzamkny, zo prawidło „2G-plus“ tež w dalšich wobłukach towaršnostneho žiwjenja nałožuja.
Zazběh wažnych jednanjow
Zastupnicy USA a Ruskeje jednaja a wuradźuja
Genf (dpa/SN). Zastupnicy USA a Ruskeje schadźuja so dźensa w šwicarskim Genfje. W srjedźišću rozmołwow steja koncentracija ruskich wojerskich jednotkow na mjezy k Ukrainje a žadanja Moskwy za wěstotnymi garantijemi ze stron NATO. Wobě stronje warnowaštej hižo zwoprědka před přewulkimi wočakowanjemi. Genfske zetkanje je zazběh cyłeho rjadu wažnych jednanjow w tymle tydźenju.
Wonkowny minister USA Antony Blinken rjekny wčera, zo je ćežko „w atmosferje eskalacije z brónju při hłowje Ukrainy“ wuspěchi docpěć. Zdobom wón potwjerdźi, zo njebudu USA wo cofnjenju swojich jednotkow z wuchodneje Europy jednać. Nimo toho nochcedźa Ruskej přilubić, zo so NATO dale na wuchod njerozšěri. Zastupnik knježerstwa USA rjekny, zo nima Moskwa wo tym rozsudźić, z kim druhe kraje zwjazki tworja.
