Berlin (dpa/SN). Politikar CDU Helge Braun je dodatny etat amploweje koalicije SPD, Zelenych a FDP wótrje kritizował. Bjezposrědnje do spočatka dźensnišeje debaty zwjazkoweho sejma rjekny bywši šef kanclerskeho zarjada: „To budźe jara chutna debata, dokelž so jara starosćimy. Je to jara zasadne ranjenje etatoweje solidarity w Němskej, štož tule runje dožiwjamy.“

Financny minister Christian Lindner (FDP) chce za inwesticije do škita klimy a digitalizacije 60 miliardow eurow přerjadować, kotrež běchu lětsa jako kredity hižo přizwolene, bjez toho zo bychu dotal trěbne byli. Lindner chce srědki w fondsu za klimu a transformaciju składować, zo bychu tež přichodne lěta hišće k dispoziciji byli. Nowe kredity Zwjazk z přerjadowanjom srědkow njetrjeba. Opozicija ma krok Lindnera přiwšěm za wustawu ranjacy, dokelž so srědki, kotrež běchu za bój přećiwo koronakrizy přizwolene, nětko za škit klimy a hinaše předewzaća wužiwaja. Wona chce etat wot wustawoweho sudnistwa pruwować dać.

Wjerškowe zetkanje EU z wuchodnymi krajemi – konflikt na Ukrainje

Brüssel (dpa/SN). Němska a Francoska chcetej napjatosće na rusko-ukrainskej mjezy nastupajo zaso sylnišo mjez Mo­skwu a Kijewom posrědkować. Hižo wčera běštaj so zwjazkowy kancler Olaf Scholz (SPD) a francoski statny prezident Emmanuel Macron z ukrainskim pre­zidentom Wolodimirom Zelenskim w Brüsselu zetkałoj. Wšitcy třo potwjerdźichu, zo chcedźa tak mjenowany Normandijowy format wožiwić, po kotrymž Němska a Francoska wot lěta 2014 mjez Ukrainu a Ruskej posrědkujetej. Ruska bě sej w tym lěće po namócnym powalenju ukrainskeho knježerstwa w Kijewje połkupu Krim přiswojiła. A započa separatistow podpěrać, kotřiž wuchodnu Ukrainu wojersce kontroluja, dokelž nochcedźa so na zapad wusměrjenemu kursej Kijewskeho knježerstwa přizamknyć.

Z chutnym a starosćiwym mjezwočom Rusku před nadpadom na Ukrainu warnować je politikarjam zapadneho swěta – bohužel tež němskim – mjeztym tajke něšto kaž wěriwym wšědny paćer. Njepřestajna wójnska retorika je k tomu wjedła, zo su nětko tež ći posledni wo tym přeswědčeni, zo Ruska wojerski nadpad přihotuje. Twjerdźenja Moskwy, zo žanu agresiju njeplanuje, so skerje připódla jewja. Wo čimž porno tomu scyła njerozprawjeja, su wojerske přihoty Ukrainy za nadpad na wuchodne kónčiny kraja, hdźež knježa tak mjenowani proruscy separatisća. Powěsćernje citowachu njedawno ukrainskeho generala ze słowami „smy přihotowani“. Widźeć běchu nowe tankowe wozydła zapadneje produkcije, přewostajene Ukrainje „za zakitowanje“. Njewěm, hač je připowědźenje Berlina a Parisa, mjez Mo­skwu a Kijewom posrědkować chcyć, chutnje měnjene. Mi znajmjeńša je jasne, zo by wojerska eskalacija do katastrofy wjedła. Marko Wjeńka

Zahrodnika za park hrodu Windsor pola Londona pyta britiska kralowna Elizabeth II., kaž z wotpowědneho nawěška kralowskeje swójby wuchadźa. Dźe wo to, so wo zahrodu starać „kotruž tysacy wobdźiwuja“, we wupisanju rěka. Nimo toho měł ­zajimc „zahorjeny za hladanje trawnika“ być. Poskićena mzda pak je wšo druhe hač kralowska: Queen chce jemu runje 22 800 eurow brutto wob lěto dać, ani 2 000 wob měsac, a to w Londonje, hdźež su žiwjenske kóšty wosebje wysoke.

Crystal meth w barbjenčkowych tyzkach abo ecstasy w hodownych kulach: Fantazija pašowarjow drogow na lětanišću Köln/Bonn tež lětsa žane hranicy nje­znaje. Najebać to su cłownicy jenož w nowembrje 600 kilogramow drogow sćazali. Dale namakachu dekoraciju z kokaina a marihuanu w meblowych platach.