Scholz lěpši diplomat
Namóc přiběra
To a tamne (13.12.21)
W spowědnym stole z wohenjom hrajkał je sej jědnaćelětny pachoł w bayerskim Kissingu. Nimo toho je tam sobotu popołdnju tež stólcy a papjeru zapalił. Woheń na zbožo njewudyri, najebać to nastachu w farskej cyrkwi swj. Bjarnata zesmudźene a sazowe blaki. Policija trochuje škodu na něhdźe tysac eurow. Što je hólca k tomu pohnuło, dotal njewědźa. Staroby dla pak njeje wón hišće chłostajomny.
Swěcy awta zaswěćał je mały psyk w juhozapadnej Pfalcy. Swědk wobkedźbowaše, kak pos w Herschbergu w awće zaskakuje a poněčim wšitke swěcy jězdźidła zaswěća. Policija wobsedźerku psa zwěsći. Ta zastojnikam rozłoži, zo so psyk rady na te wašnje zabawja a tak je nawuknył wšitke swěcy aktiwizować. „Žonje bu tuž doraznje wotradźene psej tež hišće pokazać, kak ma z awtom jěć“, w nic cyle chutnje měnjenej zdźělence rěka.
Namjety předleža
Drježdźany/Budyšin (juny/SN). Čłonki a čłonojo Rady za serbske naležnosće w Sakskej prócuja so dale wo lěpšu podpěru gremija w jeho čestnohamtskim dźěle ze stron statnych instancow. Tohodla chcedźa so na swojim přichodnym zetkanju ze serbskopolitiskimi rěčnikami stron w Sakskim krajnym sejmje zetkać. Za to trěbne přihoty su sej na swojim wčerawšim posedźenju dorěčeli, zdźěli čłon gremija Julian Nyča. „W minjenych tydźenjach a měsacach běchu čłonojo rady w intensiwnej wuměnje myslow z přisłušnym ministerstwom wo móžnych pućach, wobsahowe a zarjadniske dźěło gremija přichodnje lěpje podpěrać. Wotpohlad radźićelow je, wutworić jednaćelnju z přistajenej wosobu, kotraž měła serbsku radu Sakskeje při přihotach posedźenjow, wobsahowych rešeršach a organizowanju zetkanjow ze zastupnikami ministerstwow a dalšich zarjadow podpěrać, kaž je to w Braniborskej hižo z wašnjom“, rěka ze stron rady. Za swoje předewzaće je serbska rada ministerstwu hižo konkretne namjety předpołožiła.
Přiwozmu ludźi z Afghanistana
Brüssel (dpa/SN). Hladajo na dramatiske połoženje po přewzaću mocy přez talibanow w Afghanistanje su Němska a 14 dalšich krajow EU zwólniwe, něhdźe 40 000 škita wosebje potrěbnych Afghaničanow přiwzać. To je komisarka EU na nutřkowne naležnosće Ylva Johansson po wčerawšim wuradźowanju nutřkownych ministrow EU zdźěliła. Jeničce Němska chce 25 000 ćěkancow přiwzać. Při tym jedna so wo ludźi, kotřiž běchu tam za wukrajne wójska dźěłali.
Rěča wo winowatosći šćěpjenja
Berlin (dpa/SN). Zwjazkowy sejm a Zwjazkowa rada chcyštej dźensa wo nowych naprawach koronawirusa dla wuradźować. Po planach noweje amploweje koalicije SPD, Zelenych a FDP maja so sobudźěłaćerjo chorownjow a hladarnjow winowatostnje pře koronu šćěpić dać, zo bychu pacienća a wobydlerjo mjenowanych domow lěpje škitani byli. Sobudźěłaćerjo maja hač dosrjedź měrca chwile certifikat wo šćěpjenju předpołožić.
Přećiwo hidźe w syći
W mnohich městach, kaž tule w Rostocku, budki adwentnych wikow, ...
Scholz wukonja nastupne wopyty
Paris/Brüssel (dpa/SN). Dwaj dnjej po swojim spřisahanju jako zwjazkowy kancler je so Olaf Scholz dźensa na swoju prěnju wukrajnu jězbu do Parisa a Brüssela podał. W francoskej stolicy chcyše so politikar SPD z prezidentom Emmanuelom Macronom zetkać. W Brüsselu steja rozmołwy z prezidentku komisije EU Ursulu von der Leyen a z generalnym sekretarom NATO Jensom Stoltenbergom na programje. Wčera bě so hižo Annalena Baerbock (Zeleni) w Brüsselu jako nowa wonkowna ministerka Němskeje předstajiła.
Wažny europski susodny kraj Francoska je po tradiciji prěni pućowanski zaměr nowych zwjazkowych kanclerow a zwjazkowych wonkownych ministrow. Před 16 lětami bě kanclerka Angela Merkel (CDU) zhromadnje z tehdyšim wonkownym ministrom Frankom-Walterom Steinmeierom (SPD) zhromadnje do Parisa a Brüssela lećała.
Lauterbach za chłostanja
Žane wobmjezowanja k hodam
Berlin (dpa/SN). Zwjazk a zwjazkowe kraje njeplanuja najprjedy raz žane přidatne wobmjezowanja přez hodowne swjate dny, chcedźa pak połoženje dale wobkedźbować. Přichodny tydźeń ma so planowana rada fachowcow schadźować, zo by połoženje noweje wirusoweje warianty omikron dla dokładnišo posudźowała. To je ministerski prezident Sewjerorynsko-Westfalskeje Hendrik Wüst (CDU) po wčerawšich wuradźowanjach zastupjerjow Zwjazka a krajow připowědźił.
Zwjazkowy kancler Olaf Scholz (SPD) chcył tohorunja wědomostny posudk wočaknyć a potom hladać, hač tuchwilne postajenja dosahaja. W nuzy měli krótkodobne naprawy na dnjowy porjad stajić. Scholz potwjerdźi, zo tuchwilne daloko sahace wobmjezowanja za nješćěpjenych tež přez hody dale płaća.
Kaž Berlinski knježacy wyši měšćanosta Michael Müller rjekny, je bjeze wšeho móžno so hody ze swójbu a přećelemi zetkać. Kóždy pak ma na swój škit dźiwać.
Institut: Triažu rjadować
Berlin (dpa/SN). Němski institut za čłowjeske prawa ma hladajo na wuwiće koronapandemije zakonske rjadowanje tak mjenowaneje triaže za nuznje trěbne. „Status šćěpjenja njesmě žanu rólu hrać“ w prašenju, štó dóstanje w padźe móžneho přećeženja strowotniskeho systema intensiwnolěkarske zastaranje a štó nic, potwjerdźi direktorka instituta Beate Rudolf wčera w Berlinje. Tež wosoba, kotraž so „njerozumnje abo njesolidarisce“ zadźerži, ma prawo na strowotu.
W swojej najnowšej lětnej rozprawje namołwja institut hladajo na móžne problemy w chorownjach: „Němska trjeba čłowjesko- a wustawoprawnisce wopodstatnjene zasady jako zakład rozsudow, komu lěkarjo najprjedy pomhaja. Tajke zakonske rjadowanje měło aspekty postajić, kotrež njesmědźa za wuzwolenje pacientow žanu rólu hrać, kaž su to hišće wočakowany čas žiwjenja, žiwjenska kwalita, wužitk za towaršnosć abo staroba. Zakonjedawar njemóže čakać, doniž Zwjazkowe wustawowe sudnistwo wo tym njerozsudźi. Tuchwilna praksa na intensiwnych stacijach starych a zbrašenych „diskriminuje“, kaž institut zwěsća.
