Struchłe wuhlady
Wita legalizaciju
To a tamne (26.11.21)
List z jastwa dósta Bochumska policija, kotraž je z njeho chětro hnuta. W lisće so 31lětny zastojnikam dźakuje. Muž rysuje, kak je so w jastwje nakazał. Nětko chcył so na „čisty nowy započatk“ zwažić. Policisća běchu muža w lěću w Bochumje zajeli, dokelž mějachu wukaz zajeća přećiwo njemu jebanstwa dla, po tym zo bě wón swoje pjenjezy w kazinach přečinił. „Snano bě trjeba widźeć, kak w jastwje je, zo bych sej swobodu wažił“, wón pisa.
Zmužity wodźer wosoboweho awta zadźerža na awtodróze A14 pola Schwerina transporter, kotrehož šofer bě do womory padnył. 57lětny bě widźał, zo je šofer transportera bjez wědomja. Ze swojim wosobowym awtom jědźeše tuž pomału před transporterom a jón tak skónčnje zadźerža. Wobě jězdźidle so wobškodźištej. 48lětneho wodźerja transportera dowjezechu do chorownje.
Iniciatiwu MSPI chcedźa dale podpěrać
Strony SPD, Zwjazk 90/Zeleni a FDP předstajichu wčera w Berlinje naćisk koaliciskeho zrěčenja jako zakład za wutworjenje zhromadneho zwjazkoweho knježerstwa. Wuprajili su so wosebje nastupajo europsku wobydlersku iniciatiwu Minority SafePack (MSPI).
Budyšin (SN/at). Zastupjerjo narodnych mjeńšin w Němskej w předležacym naćisku koaliciskeho zrěčenja dokładnje za tym hladaja, kotru kedźbnosć jim přichodna ampla přicpěwa. Konkretnje su to tři sady: „Narodne mjeńšiny – danska mjeńšina, friziska ludowa skupina, němscy Sintojo a Romojo a serbski lud – su samozrozumliwy wobstatk našeje wjelorakeje towaršnosće.“ a „Iniciatiwu Minority SafePack proaktiwnje podpěrujemy a ju w Němskej zwoprawdźamy. Projekty k zachowanju a rozwiću mjeńšin, jich rěčow a kulturow wutwarjamy.“
Tragedija na morju
Calais (dpa/SN). Při podnurjenju čołma z ćěkancami po puću z Francoskeje do Wulkeje Britaniskeje je so znajmjeńša 27 ludźi zatepiło. Njezbožo sta so před pobrjohom francoskeho Calaisa w Doverskim přeliwje. Francoski ministerski prezident Jean Castex rěčeše wo tragediji. W sewjernej Francoskej čakaja tysacy migrantow na składnosć, dóstać so do Wulkeje Britaniskeje. Francoska policija je mjeztym štyrjoch pašowarjow zajała. Jedyn z nich pječa z Němskeje pochadźa.
Nowa hranica překročena
Berlin (dpa/SN). Ličba na koronawirus zemrětych ludźi w Němskej je hódnotu 100 000 překročiła, kaž z informacijow Roberta Kochoweho instituta wuchadźa. Strowotniske zarjady su jemu 351 smjertnych woporow w běhu 24 hodźin přizjewili, cyłkowna ličba wot spočatka pandemije wučinja nětko 100 119. Prěni króć je tež ličba nowoinfekcijow hranicu překročiła: Strowotniske zarjady su institutej w běhu minjenych 24 hodźin 75 961 dalšich natyknjenjow z koronawirusom zdźělili.
Warnuja před namocu
Tež čěske strowotnistwo je přiběraceje ličby natyknjenjow z ...
Merkel rěči z Morawieckim
Berlin (dpa/SN). Amtěrowaca zwjazkowa kanclerka Angela Merkel (CDU) je dźensa z pólskim ministerskim prezidentom Mateuszom Morawieckim w Berlinje wo napjatym połoženju na běłorusko-pólskej mjezy wuradźowała. W běhu popołdnja chcyštaj wonaj zjawnosć zhromadnje wo wuslědkach informować.
Hižo přez tydźenje spytaja tysacy migrantow z Běłoruskeje wonkownu mjezu Europskeje unije přewinyć a so do Pólskeje abo baltiskich statow předrěć. EU běłoruskemu mócnarjej Aleksanderej Lukašenkej wumjetuje, zo ćěkancow z krizowych kónčin zaměrnje do Běłoruskeje wabi a jich dale do EU sćele, zo by ju tak pod ćišć stajił a so za sankcije ze stron zjednoćenstwa statow Europy wjećił.
Krótkodźěło podlěšene
Nalada mjez zawodami dale špatna
Mnichow/Berlin (dpa/SN). Nalada mjez němskimi předewzaćelemi je so w nowembru znowa pohubjeńšiła. Wot instituta Ifo zwěsćena wobchodna klima, najwažniši konjunkturny barometer Němskeje, je porno oktobrej wo 1,2 na nětko 96,5 dypkow woteběrała, kaž institut wčera w Mnichowje zdźěli. Je to pjaty woteběracy měsac za sobu. Fachowcy wšak běchu snadniši spad wočakowali. Woni maja wuslědk naprašowanja za znamjo stagnacije, snano samo woteběraceho hospodarstwa.
Tež němska Industrijna a wikowanska komora (DIHK) je hladajo na přiwótřenu koronakrizu alarmowana. Prezident DIHK Peter Adrian rjekny powěsćerni dpa: „Dobre wuwiće na akcijowych wikach njesmě nas slepić. Mnohim předewzaćam Němskeje so hižo zaso chětro špatnje dźe. Mnozy samostatni, małe rjemjeslniske a srjedźostawske zawody město rozmacha skerje nowu krizu dožiwjeja.“
Při naprašowanju posudźuja zawody swoje tuchwilne połoženje a wuhlady do přichoda.
Scholz liči z přihłosowanjom
SPD, Zeleni a FDP so na koaliciske zrěčenje dojednali – Lěwica kritiska
Berlin (dpa/SN). Po dojednanju wodźacych zastupnikow SPD, Zelenych a FDP na koaliciske zrěčenje wo wutworjenju po wšej Němskej prěnjeje tak mjenowaneje amploweje koalicije su nětko čłonojo a delegaća na rjedźe. Hižo dźensa chcychu so Zeleni swojich čłonow prašeć, hač koaliciskemu zrěčenju a personalnym planam nowe knježerstwo nastupajo přihłosuja. Wothłosowanje ma dźesać dnjow trać a digitalnje abo z listom móžne być. Za přihłosowanje dosaha jednora wjetšina. We wobłuku SPD a FDP maja delegaća spočatk decembra na stronskimaj zjězdomaj koaliciske zrěčenje wotžohnować.
Byrnjež w koaliciskich jednanjach wšitke tři strony kompromisam přizwolić dyrbjeli, je sej přichodny zwjazkowy kancler Olaf Scholz (SPD) wěsty, zo wšitke tři strony zrěčenju přihłosuja. „To sym jara optimistiski. Je to dobry wuslědk z wida wšitkich třoch stron“, rjekny wón wčera wječor w telewiziji ARD.
