Zo njebudźe prěni wopyt noweho zwjazkoweho kanclera Olafa Scholza (SPD) do Waršawy ryzy zabawa, bě zwoprědka jasne. Drastiske plakaty, stajace bywšu zwjazkowu kanclerku Angelu Merkel (CDU) na jednu runinu z Hitlerom a Goebbelsom, běchu jasny signal, kajka atmosfera w susodnym kraju knježi a štó ju poprawom šěri – Waršawske knježerstwo. Najebać to je Scholz swój nadawk zmištrował a dopokazał, zo je lěpši diplomat hač jeho wonkowna ministerka Annalena Baerbock (Zeleni). Ta bě so za razniši kurs přećiwo Moskwje wuprajiła, Scholz je za wotputansku politiku. Baerbock bě so zjawnje přećiwo płunowodej Nord Stream 2 nastajiła, Scholz so temje wuwiny. Mjeztym zo spyta so nowa wonkowna ministerka profilować, nowy kancler z wulkej čućiwosću postupuje, štož je wosebje Ruskej napřećo wo wjele mudriše. Snano njeby tak špatne było, byštaj-li so Scholz a Baerbock w tajkich wažnych naležnosćach wothłosowałoj. Marko Wjeńka

Erfurt (dpa/SN). Nutřkowny minister Durinskeje Georg Maier (SPD) starosći so přiběracych namócnosćow při protestach přećiwo politice koronawirusa dla. „Zwólniwosć k namocy na tajkich zarjadowanjach widźomnje přiběra. Stat dyrbi konsekwentnje reagować“, Maier rjekny. Kónc tydźenja dyrbješe policija wjacore demonstracije rozpušćić.

W spowědnym stole z wohenjom hrajkał je sej jědnaćelětny pachoł w bayerskim Kissingu. Nimo toho je tam sobotu popołdnju tež stólcy a papjeru zapalił. Woheń na zbožo njewudyri, najebać to nastachu w farskej cyrkwi swj. Bjarnata zesmudźene a sazowe blaki. Policija trochuje škodu na něhdźe tysac eurow. Što je hólca k tomu pohnuło, dotal njewědźa. Staroby dla pak njeje wón hišće chłostajomny.

Swěcy awta zaswěćał je mały psyk w juhozapadnej Pfalcy. Swědk wobkedźbowaše, kak pos w Herschbergu w awće zaskakuje a poněčim wšitke swěcy jězdźidła zaswěća. Policija wobsedźerku psa zwěsći. Ta zastojnikam rozłoži, zo so psyk rady na te wašnje zabawja a tak je nawuknył wšitke swěcy aktiwizować. „Žonje bu tuž doraznje wotradźene psej tež hišće po­kazać, kak ma z awtom jěć“, w nic cyle chutnje měnjenej zdźělence rěka.

Drježdźany/Budyšin (juny/SN). Čłonki a čłonojo Rady za serbske naležnosće w Sakskej prócuja so dale wo lěpšu podpěru gremija w jeho čestnohamtskim dźěle ze stron statnych instancow. Tohodla chcedźa so na swojim přichodnym zetkanju ze serbskopolitiskimi rěčnikami stron w Sakskim krajnym sejmje zetkać. Za to trěbne přihoty su sej na swojim wčerawšim posedźenju dorěčeli, zdźěli čłon gremija Julian Nyča. „W minjenych tydźenjach a měsacach běchu čłonojo rady w intensiwnej wuměnje myslow z přisłušnym ministerstwom wo móžnych pućach, wobsahowe a zarjadniske dźěło gremija přichodnje lěpje podpěrać. Wotpohlad radźićelow je, wutworić jednaćelnju z přistajenej wosobu, kotraž měła serbsku radu Sakskeje při přihotach posedźenjow, wobsahowych rešeršach a organizowanju zetkanjow ze zastupnikami ministerstwow a dalšich zarjadow podpěrać, kaž je to w Braniborskej hižo z wašnjom“, rěka ze stron rady. Za swoje předewzaće je serbska rada ministerstwu hižo konkretne namjety předpołožiła.